ކުއްޔާއި ރެސްޓޯރަންޓްތަކުގެ އަގުން ރަށްރަށުގެ އިންފްލޭޝަން މައްޗަށް

އަތޮޅުތެރޭގެ އިންޕްލޭޝަން ރޭޓު 0.8 ޕަސެންޓުން 4.3 ޕަސެންޓަށް މައްޗަށް އަރައިފި އެވެ.

މަރުކަޒީ ބޭންކް އެމްއެމްއޭގެ ތަފާސް ހިސާބުތަކުން ދައްކާ ގޮތުން މިދިޔަ އަހަރުގެ ނޮވެމްބަރު މަހަކީ، މިހާތަނަށް އެންމެ ބޮޑަށް އިންޕްލޭޝަން އިތުރުވި މަހެވެ. އެ މަހުގެ އިންފްލޭޝަން ހުރީ 4.3 ޕަސެންޓުގަ އެވެ. އަދި އޭގެ ކުރީ މަހު ހުރީ 0.8 ޕަސެންޓުގަ އެވެ. އެއީ 3.5 ޕަސެންޓުގެ އިތުރުވުމެކެވެ.

އާންމު ގޮތެއްގައި މާލެއާ އަޅާބަލާއިރު އަތޮޅު ތެރޭގައި ތަކެތީގެ އަގުތައް މައްޗެވެ. މިދިޔަ ނޮވެމްބަރު މަހު މާލެ ސަރަހައްދުގެ އިންފްލޭޝަން ހުރީ 3.9 ޕަސެންޓުގަ އެވެ.

އަތޮޅުތެރޭގައި އެންމެ ބޮޑަށް އަގުތައް އުފުލިފައި ހުރީ ގޭގެ ކުއްޔާއި ރެސްޓޯރެންޓުތަކުގެ އަގުތަކެވެ. އެތަކެތީގެ އިންފްލޭޝަން ހުރީ 27.5 ޕަސެންޓުގަ އެވެ. މިއީ އޭގެ ކުރީ މަހަށް ވުރެ 27 ޕަސެންޓު އިތުރު އަދަދެކެެވެ. އޮކްޓޫބަރު މަހުގައި ކުއްޔާއި ރެސްޓޯރެންޓްތަކުގެ އަގުތައް ހުރީ 0.1 ޕަސެންޓުގަ އެވެ. މިއީ ނޮވެމްބަރު މަހުގެ އިންފްލޭޝަން އެހާ ބޮޑަށް އިތުރުވުމުގެ އެއް ސަބަބަކެވެ.

އަތޮޅުތެރެއިން ލިބޭ ކާބޯތަކެތީގެ އަގުތަކުގެ އިންފްލޭޝަން މިހާރު ހުރީ 3.5 ޕަސެންޓުގަ އެވެ.

އަތޮޅުތެރޭގައި ދޭ ސިއްހީ ހިދުމަތާއި ދަތުރުފަތުރާއި މަހުގެ ބާވަތްތަކުގެ އިތުރުން ތައުލީމީ ހިދުމަތްތަކާއި ކަރަންޓާއި ފެނުގެ ހިދުމަތްތަކުގެ އަގުތައް ވެސް ވަނީ މައްޗަށް ގޮސްފަ އެވެ. ނަމަވެސް، މުއާސަލާތީ ހިދުމަތްތަކާއި ގޭތެރެއަށް ބޭނުންވާ ސާމާނުތަކުގެ އިންފްލޭޝަން ވަނީ ދަށްވެފަ އެވެ.

މިދިޔަ އަހަރުގެ ނޮވެމްބަރު މަހުގެ ކުރިން އެ އަހަރުގެ އިންފްލޭޝަން އެންމެ މަތިން ރެކޯޑު ކޮށްފައިވަނީ ޖެނުއަރީގަ އެވެ. އެ މަހު އިންފްލޭޝަން ހުރީ 1.3 ޕަސެންޓުގަ އެވެ. އެހެންވެ، ނޮވެމްބަރު މަހުގެ އިތުރުވުމަކީ އެ މަހާ އަޅާބަލާއިރު 70 ޕަސެންޓުގެ އިތުރުވުމެކެވެ.