ގޮންޖެހުންތައް އަދިވެސް ބޮޑު، އެކަމަކު ޝިއުރީގެ އުންމީދުތައް މާ މަތީގައި!

މިދިޔަ އަހަރުގެ ޖޫން މަހު އެމްއެމްޕީއާރުސީގެ މެނޭޖިން ޑިރެކްޓަރުގެ މަގާމާ އިބްރާހިމް ޝިއުރީ ހަވާލުވެވަޑައިގަތީ މުޅިން ސުމަކުންނެވެ. ޓީޓީ ކުޅުމާއި އެ ކުޅިވަރު ކުރިއެރުވުމުގައި މުޅި އުމުރު ހޭދަކުރެއްވި ޝިއުރީ ރާއްޖޭގެ އެންމެ ބޮޑު ސިނާއަތް ޕްރޮމޯޓް ކުރުމާ ހަވާލުވެވަޑައިގަތީ ގޮންޖެހުންތައް ބޮޑު ދުވަސްވަރެއްގަ އެވެ. ސިޔާސީ އޮއިވަރު ވެސް ހުރީ އެހާ ފަސޭހަ ގޮތަކަށް ނޫނެވެ. އަނެއްކޮޅުން ޓޫރިޒަމް ޕްރޮމޯޓް ކުރުމުގައި ވެސް ދަތިތަކެއް ހުއްޓެވެ. ރާއްޖޭގެ އިގުތިސާދީ ހާލަތު ވެސް އޭނާ އަށް އެހާ ބޮޑަކަށް މަރުހަބާއެއް ނުކިޔަ އެވެ.

އެކަމަކު، ސިނާއަތުގައި ނަގާކިޔާ އިސްބޭފުޅުންގެ ފާޑުވިދާޅުވުންތަކާއި ހުރި ކަންބޮޑުވުންތައް ކަނުލައި އަޑުއައްސަވައި، އެ ބޭފުޅުން ބޭނުންވާ ފެންވަރަށް އެމްއެމްޕީއާރުސީ މެދުވެރިކޮށް ރާއްޖެ އިޝްތިހާރު ކުރުމުގެ މަސައްކަތް ފުޅާކުރެއްވި އެވެ. މިދިޔަ އަހަރު ނިންމައިލީ އެ ކާމިޔާބުތަކާ އެކު އެވެ.

ލިބިފައިވާ ކުޑަ ބަޖެޓުގެ ތެރެއިން އެންމެ ބޭނުންވާ ގޮތަށް ރާއްޖެ އިޝްތިހާރު ނުކުރެވުނު ނަމަވެސް، ޝިއުރީ ބޭނުންވަނީ، ލިބުނު އެއްޗެއް ބޭނުންކޮށްގެން ވެސް މިހާރަށް ވުރެ ތިންގުނަ އިތުރަށް ރާއްޖެ އިޝްތިހާރު ކުރުމުގެ ހަރަކާތްތައް ފުޅާ ކުރާށެވެ. އިގުތިސާދީ ދަތިތައް އޭނާ އަށް އެނގިވަޑައިގަންނަވަ އެވެ.

ތިރީގައި މިވަނީ މިދިޔަ ހަފުތާގެ އަންގާރަ ދުވަހު "މިހާރު" އަށް ޝިއުރީ ދެއްވި އިންޓަވިއުއެއްގެ މުހިންމު ބައިތަކެވެ.

މިދިޔަ އަހަރު ވެސް ދިމާވީ މާލީ ގޮތުން ގޮންޖެހުންތަކެއް. ގައުމަށް ވެސް ކުރިމަތިވެފައި އޮތް އެ އުނދަގޫތައް އެމްއެމްޕީއާރުސީ އަށް ވެސް އޮތް. އަޅުގަނޑުމެން ވެސް ކުރިއަށް ގެންދަން ބޭނުންވި މާކެޓިން ކެމްޕެއިންތައް ވެސް ގެންދަން ބޭނުންވި ލެވެލްގައި ނުގެންދެވުނު.

މި އަހަރު އެ އަށް ވުރެ ކްރިއޭޓިވްކޮށް، ހަރަކާތްތަކެއް ބާއްވަން އެބަ ޕްލޭން ކުރަން. ހާއްސަކޮށް އިންޑިއާގައި ކޮންމެ މަހަކު ވެސް ހާއްސަ ހަރަކާތެއް ބާއްވަން ޕްލޭން ވަނީ ކުރެވިފައި. އިންފްލުއެންސަރުން ރާއްޖެ ގެނައުމާއި ސެލެބްރިޓީ ކޮލަބްރޭޝަންތަކެއްގެ މަސައްކަތް އެބަކުރޭ.

މި އަހަރު ވެސް އިންޑިއާގައި ރޯޑްޝޯއެއް ބާއްވައި، ބޮލީވުޑް ނައިޓެއް ބާއްވާނެ. އޯޓީއެމް ފެއާއެއް ވެސް ބާއްވަން ވަނީ ނިންމާފައި. އަޅުގަނޑަށް ވަރަށް ބޮޑު އުންމީދެއް އެބައޮތް އިންޑިއާ މާކެޓު ފުޅާކުރެވޭނެ ކަމަށް. އަޅުގަނޑުމެން ބޭނުންވަނީ ކުރިން އެޗީވް ނުވި، ރާއްޖޭގެ ޓޮޕް ތްރީ އަށް އިންޑިއާ އަރުވަން.

އެންމެ ބޮޑު ހަރަކާތަކަށް ވާނީ އޯޓީއެމް ފެއާ. އެއީ އިންޑިއާގައި އޮންނަ އެންމެ ބޮޑު ޓްރެވަލް ފެއާ. އެ ފެއާގެ ކުރިއަށް އަޅުގަނޑުމެން މި ރާވަނީ ބޮލީވުޑް ނައިޓް. އެ ހަރަކާތުގައި އިންޑިއާގެ ސެލެބްރިޓީން ބައިވެރިވާނެ. މިދިޔަ އަހަރު ވެސް ބޭއްވި ގޮތަށް މި އަހަރު ވެސް އެ ހަރަކާތް އޮންނާނެ އަންނަ މަހު.

އެހެން ގައުމުތަކާ އަޅާ ކިޔާ އިރު އިޝިތިހާރު ކުރުމަށް ވަރަށް ބޮޑެތި ބަޖެޓުތައް އެބައޮތް. ވަރަށް ބޮޑަށް ހަރަދު ކުރޭ. މި ސަރަހައްދަށް ބަލާއިރު އެންމެ ކުޑަ ހަރަދެއް މާކެޓިން އަށް ހިންގަނީ ރާއްޖެ ކަން އެބަ އެނގޭ. މިހާރު ކުރާ ހަރަދަށް ވުރެ އަޅުގަނޑުމެން އެބަޖެހޭ ވަރަށް ބޮޑުތަން އިތުރު ކުރަން. އެހެން ގައުމުތަކުން ލޯ މަރާލާފައި ވެސް އެ ގައުމުތަކުގެ ޕްރޮމޯޝަން ހަރަކާތްތަކަށް އެބަ ހަރަދު ކުރޭ.

އެފަދަ ބޮޑު ހަރަކާތްތައް ހިންގުމުން، ރިޓާން ވެސް އިތުރުވާ ތަން އެބަ ފެނޭ. އެހެންވީމާ، އަޅުގަނޑަށް ދަންނަވަން ކެރޭ މާކެޓިން އަށް ކުރާ ހަރަދަކީ ނަގައިލެވޭނެ ހަރަދެއް ނޫނޭ. މާކެޓިން އަކީ އެ ކުރާ އިންވެސްޓްމެންޓެއްގެ ރިޓާން ލިބޭނެ ކަމެއް.

އަޅުގަނޑުމެންގެ [އަމާޒަކީ] މިހާރު ކަނޑައަޅާފައި އޮތް ބަޖެޓު ދެގުނަވުން [ގާތްގަނޑަކަށް 300 މިލިއަން ރުފިޔާއަށް އިތުރުވުން]. (މި އަހަރަށް އެމްއެމްޕީއާރުސީ އަށް ކަނޑައަޅާފައިވަނީ 154 މިލިއަން ރުފިޔާގެ ބަޖެޓެކެވެ.)

އަޅުގަނޑުމެން މާކެޓު ކުރަން ސޯޝަލް މީޑިއާތައް ވެސް ވަރަށް ފުޅާކޮށް އެބަ ބޭނުން ކުރަން. އެކަމަކު އޭގެ މާނައަކީ އިންޓަނޭޝަނަލް ކެމްޕެއިންތައް ރަން ކުރާއިރު، އަޅުގަނޑުމެން ޕްރޮމޯޓު މި ކުރަނީ ލަގްޒަރީ ޑެސްޓިނޭޝަނެއްގެ ގޮތުގައި. އަޅުގަނޑުމެން މި ތަން އެޓްރެކްޓް ކުރަނީ ވެސް، ބޮޑު ޕަސެންޓެއް ލަގްޒަރީ ޓްރެވަލާސް އިން އައީމާ. އެކަން ކުރަން އެބަޖެހޭ، އެފިލިއޭޓުވާން އިންޓަނޭޝަނަލް ލަގްޒަރީ ބްރޭންޑުތަކާ ވެސް. އެފަދަ ފަރާތްތަކާ ކޮލަބްރޭޓްވާ އިރު އެފަދަ ބޭފުޅުނަށް ދައްކަންޖެހޭ ފައިސާ ވެސް ކުޑައެއް ނުވޭ.

މިސާލަކަށް ވަރަށް ހައި އެންޑް ބްރޭންޑަކާ އަޅުގަނޑުމެންނާ ގުޅުނީމާ، އެ ބޭފުޅުންގެ އެތައް ބައިވަރު ފޮލޮވާސް. އެ ބޭފުޅުން ދޭ މެސެޖު ވެސް ވަރަށް ޕަވާފުލްވޭ. އެހެން ގައުމުތަކުން އެފަދަ ހަރަކާތްތަކަށް ބޮޑެތި ހަރަދުތަކެއް އެބަ ކުރޭ. އެއީ ރާއްޖެ އިޝްތިހާރު ކުރާ އިރު ވިސްނާލަން އެބަޖެހޭ ކަމެއް.

މިސާލަކަށް ފުޓްބޯޅަ ސްޓޭޑިއަމެއްގެ ޑިޖިޓަލް ޑިސްޕްލޭ އަށް އެރުވުމުން ވެސް، އެތައް ބަޔަކަށް އެބަ ރާއްޖެ އިޝްތިހާރު ކުރެވޭ. އެފަދަ ކަންކަން ކުރާ ނަމަ އިތުރު ހަރަދުތައް ކުރަން ޖެހޭ

މިދިޔަ އަހަރު އަޅުގަނޑުމެންނަށް ބޭއްވުނީ ގާތްގަނޑަކަށް 90 ހަރަކާތް. އެހެންވީމާ އެ އަށް ވުރެ ދެގުނަ ކުރަން އެބަ ޓާގެޓު ކުރަން. ބަޖެޓު އެއްވަރު ވިޔަސް ހަރަކާތްތައް އިތުރު ކުރަން ކްރިއޭޓިވް ގޮތްތައް މި ބަލަނީ. މިދިޔަ އަހަރު ފެއާތަކަށް ވެސް ކުރި ހޭދަތައް ކުޑަކޮށްފައި ވާނެ.

މީގެ ކުރިން ކުރާ ހަރަދުތައް ކުޑަކޮށް، އެ ފައިސާ އެހެން އިތުރު ކަންކަމަށް ހޭދަކުރަން ވަނީ ނިންމާފައި. އަޅުގަނޑުމެން އަތުގައި އޮތީ ލިމިޓެޑް ފަންޑުތައް.

އަޅުގަނޑުމެން އަބަދުވެސް ލަގްޒަރީ، ހަނީމޫން ދެން ޑައިވިން ޑެސްޓިނޭޝަނެއްގެ ގޮތުގައި މި އޮންނަނީ. އެކަމަކު އަޅުގަނޑުމެންގެ ވިސްނުން މިހާރު އެބަ ކޮންމެވެސް ވަރަކަށް ބަދަލު ކުރަންޖެހޭ. ޑައިވާސިފައި ކުރާ ވާހަކަ ދެއްކިއަސް އޭގެ ހަގީގީ މާނައިގައި މަސައްކަތްތަކެއް އަދި ނުކުރެވޭ.

ޑައިވާސިފައި ކުރަންޏާ އެބަޖެހޭ އަޅުގަނޑުމެންގެ އެހެން ޕްރޮޑަކްޓްތައް ވެސް ޝޯކޭސް ކުރަން. އޭގެ ތެރޭގައި ސްޕޯޓްސް ޓޫރިޒަމަކީ ވެސް ކުރެވިދާނެ ކަމެއް. މިސާލަކަށް ސްޕާޓަން ރޭސް ފަދަ ހަރަކާތްތައް ވެސް ބޭއްވިދާނެ. ބައެއް ޓޫރިސްޓުން އެބަތިބި ކަމާކަން ފަށާފައި އެފަދަ އިވެންޓްތަކުގައި ބައިވެރިވާ ޓޫރިސްޓުން. ބޭރު ބަޔަކާ ގުޅިގެން ވެސް އެފަދަ ހަރަކާތްތައް ރާއްޖޭގައި ބޭއްވިދާނެ.

ރާއްޖެއަކީ ފިލްމު ޓޫރިޒަމަށް ވެސް ޕޮޓެންޝަލް ގައުމެއް. ސްޓާ ވޯސް ވެސް ރާއްޖޭގައި ޝޫޓްކުރި. އެ ވާހަކަތައް ވެސް ދައްކަން ޖެހޭ ގޮތަކަށް އަޅުގަނޑުމެންނަކަށް ނުދެއްކޭ. އެފަދަ ކަންކަން އެހެން ގައުމުތަކުން ވެސް ކުރަނީ ކިހިނެއްތޯ ބަލަން ޖެހޭ. ޕޮލިސީތައް ވެސް އެފަދަ ކަންކަން ކުރަން ފަސޭހަވާނެ ގޮތަށް އެބަ ރާވަން ޖެހޭ.

ހެލްތު އެންޑް ވެލްނަސް އަކީ ވެސް މިހާރަށް ވުރެ ބޮޑަށް ފުޅާކުރެވޭނެ ދާއިރާއެއް. އޭގެ ތެރެއިން ދިވެހި ބޭސް ވެސް ޕްރޮމޯޓު ކުރެވޭނެ. ކުދިކުދި ނީޝް މާކެޓުތަކަށް ވެސް ރާއްޖެ ޕްރޮމޯޓުކޮށް، އާމްދަނީ ހޯދޭނެ ގޮތްތައް ފުޅާކުރަން ޖެހޭ.

މި އަހަރު އަޅުގަނޑުމެން ލޯންޗު ކޮށްފައި ވާނެ "ވޯލްޑް ބިގަސްޓް ގިވްއަވޭ". ޑަބްލިއުޓީއެމްގައި ލޯންޗުކުރީ. އަޅުގަނޑުމެން މި ދެނީ 265 ހޮލިޑޭސް. ކޮންމެވެސް ބަޔަކަށް މި ދެނީ. އެހެންވީމާ 52 ހަފުތާގެ ޗުއްޓީ މި ދެނީ. ކޮންމެ މަހަކު ވެސް ކޮންމެވެސް ހަތަރު ނަސީބުވެރިއަކަށް ޗުއްޓީ ހޭދަކުރުމުގެ ފުރުސަތު ލިބޭނެ.

މިއީ ދުނިޔޭގައި ނުކުރާ ކަމެއް. ފުރަތަމަ ކެމްޕެއިން، އާ އަހަރުގައި މި ފެށީ. މިހާރު ވެސް ވަރަށް ބައިވަރު މީހުން، 3،000 މީހުން އެ ހަރަކާތުގައި ބައިވެރިވެފައިވޭ. އޭގެ ތެރެއިން އަޅުގަނޑުމެން މި ހޮވަނީ. ރިސޯޓުތަކާ ޕާޓްނާ ވެގެން މި ހަރަކާތް ބާއްވަނީ.

ކުރިއާ ހިލާފަށް ހަރަކާތްތައް ބާއްވާއިރު، އާންމުކޮށް އޮންނަ މޭޖާ އިވެންޓްތައް ބާއްވާ، ޑިޖިޓަލް ކެމްޕެއިންތައް އިތުރު ކުރަން ވެސް އިސްކަން ދޭނަން. ވަރަށް އަވަހަށް ލޯންޗު ކުރާނަން ގްލޯބަލް އެމްބެސިޑާ ޕްރޮގްރާމެއް ވެސް. އެއީ ދުނިޔޭގެ ފެންވަރުގެ ސެލެބްރިޓީން މެދުވެރިކޮށް ރާއްޖެ އިޝްތިހާރު ކުރަން ފަށާ ކަމެއް.

މިޑުލްއީސްޓުގައި ވެސް ރޯޑްޝޯތަކެއް ތަފާތުކޮށް، ކުރިއަށް ގެންދާނަން. ވެބްސައިޓު ވެސް ރީ-ޑިޒައިންކޮށް، ވިޒިޓް މޯލްޑިވިްސް ޝޮޕެއް ވެސް ލޯންޗު ކުރަން ވެސް ޕްލޭން ކުރެވިފައިވޭ.

ޔޫރަޕް އަދި ސެންޓްރަލް އޭޝިއާ އާއި އެމެރިކާގެ އާ މާކެޓުތަކަށް ވެސް އިސްކަން ދޭނަން. ރާއްޖެ އިޝްތިހާރު ކުރާ އިރު އެމްބަސީތަކާ އެކު ވެސް ގިނަ ހަރަކާތްތަކެއް ބޭއްވުމަށް ނިންމާފައިވޭ. ވަރަށް ފަހުން ވާނީ ނިއުޔޯކްގައި އޮތް ފެއާއެއްގައި ވެސް އެމްބަސީ ސްޓާފުން ބޭނުންކޮށްގެން ބައިވެރިވެފައި.

އަޅުގަނޑުމެން މި ފޯކަސް ކުރަނީ ޓޫރިސްޓުންގެ ވަކި އަދަދެއް ހާސިލް ކުރުމަށް ވުރެ، މި ވަގުތު ރާއްޖޭގައި ހުރި ބެޑް ކެޕޭސިޓީ ފިލް ކުރެވޭނެ ގޮތްތަކެއް ހޯދައިދޭން. މި ފަހަރު ނަންބަރަށް އެހާ ވަރަކަށް ނުބަލަން. އެކަމަކު ބެޑް ކެޕޭސިޓީ ފިލް ކުރަން އިސްކަން ދޭނަން.

މިސާލަކަށް އަޅުގަނޑުމެން ޖެހޭނީ މީގެ ކުރިން ނުކުރާ ގޮތަށް މާކެޓު ކުރަން. އަޅުގަނޑުމެންގެ ވަރަށް ބޮޑު ފޯކަސްއެއް އެބައޮތް މީގެ ކުރިން ޑިމާންޑު ނެތް އޭރިއާތަކަށް އިސްކަން ދީގެން މާކެޓު ކުރުން. އަދި އޮފް ސީޒަނަށް ހާއްސަ ހަރަކާތްތަކެއް ވެސް ހިންގަން އިސްކަންދޭނަން.