ހުޅުމާލެ މަގުތަކުގައި ހުރި ބާ ވެހިކަލްތައް ނަގަން ފަށައިފި

ހުޅުމާލޭގެ މަގުތަކުގައި ހުރި ބޭނުން ނުކޮށް ގިނަ ދުވަސްވީ ވެހިކަލްތަކާއި ބާ ވެހިކަލްތައް ނަގަން މިއަދު ފަށައިފި އެވެ.

ޓްރާންސްޕޯޓް މިނިސްޓްރީން އެކްސްގައި ކުރި ޕޯސްޓެއްގައި ބުނީ ދިގު މުއްދަތެއް ވަންދެން ބޭނުން ނުކޮށް، ހުޅުމާލޭގެ މަގުތަކުގައި ހުރި ގިނަ އަދަދެއްގެ އުޅަނދުފަހަރު ޓޯކޮށްފައިވާ ކަމަށެވެ. އަދި އެއީ ޓްރެފިކް ޑިކޮންޖެޝަން ޕްރޮގްރާމުގެ ދަށުން ކުރި މަސައްކަތެއް ކަމަށް މިނިސްޓްރީން ބުންޏެވެ.

މިއީ މަގުތަކުގެ ތޮއްޖެހުން ކުޑަ ކުރުމަށާއި އާންމު ދަތުރުފަތުރުގެ ނިޒާމު އިތުރަށް ހަރުދަނާ ކުރުމަށް އަދި މަގުމަތީގައި ހިނގާވެބިނގާވެ އުޅޭ މީހުންނަށް ފަސޭހަކަމާ އެކު ދަތުރު ކުރެވޭނެ މާހައުލެއް ހޯދައިދިނުމަށް ކުރިއަށް ގެންދާ ޕްރޮގްރާމެއް ކަމަށް މިނިސްޓްރީން ބުންޏެވެ.

މިނިސްޓްރީން މި މަސައްކަތް ކުރަނީ ފުލުހުންނާ ގުޅިގެންނެވެ.

މީގެ ކުރިން ވެސް އެކި ފަހަރު މަތިން ވަނީ ހުޅުމާލޭގެ މަގުތަކުގައި ބޭނުން ނުކޮށް ގިނަ ދުވަސްވެފައި ހުރި ވެހިކަލްތައް ނަގައިފަ އެވެ.

މި އުޅަނދުތައް ނަގަން ފެށިއިރު، ހުޅުމާލޭގެ މަގުތަކުގައި ހަމައެއްލަމައެއް ނެތި ޕާކުކުރާ މައްސަލަ ވެސް ވަނީ ވަރަށް ބޮޑުވެފަ އެވެ. އެގޮތުން ހިނގާފައި އުޅޭ މީހުންނާއި ދުއްވާ އެއްޗެއްސަށް ވެސް ދަތިވާ ގޮތަށް ހުޅުމާލޭގެ މަގުތަކުގެ ދެ ފަރާތުގައި ގިނަ އަދަދެއްގެ ވެހިކަލްތައް ޕާކުކޮށްފައި ހުރެ އެވެ.