ހުޅުމާލެ 1 ގެ ފްލެޓުތައް ކައިރީގައި ގަވާއިދާ ހިލާފަށް ޕާކުކޮށްފައިވާ ސައިކަލްތައް ޓޯކުރަނީ

ހުޅުމާލެ 1 ގައި އެންމެ ފުރަތަމަ އިމާރާތްކުރި ފްލެޓުތަކުގެ ދެމެދުގައި ހިނގަން ހާއްސަކޮށްފައި އޮންނަ ސަރަހައްދުގައި ޕާކުކޮށްފައިވާ ސައިކަލްތައް ޓޯކުރުމުގެ މަސައްކަތް ފުލުހުން ފަށައިފި އެވެ.

މިއަދު ހަވީރުން ފެށިގެން ފުލުހުން ވަނީ އެ ފްލެޓުތަކުގެ ދޮރުމަތީގަ އާއި ސިޑިތަކުގެ ދަށުގައި ބަހައްޓާފައި ހުރި އެތައް ސައިކަލެއް ޓޯކޮށްފަ އެވެ.

ހުޅުމާލޭގެ ފްލެޓުތައް ކައިރީގައި ސައިކަލްތައް ޕާކުކުރާނެ ސަރަހައްދުތައް ކަނޑައަޅައި، ފްލެޓް އިމާރާތްތަކުގެ ދެމެދުން ހިނގަން ހާއްސަކޮށްފައި އޮންނަ ސަރަހައްދަށް ވެހިކަލް ވަނުން މަނާކޮށް އެކަން އަންގައިދޭ ބޯޑު ވެސް ހުންނަނީ ޖަހައިފަ އެވެ. އެކަމަކު އެ މަގުތަކުގައި ޕާކުކުރުމާއި ބާރަށް ސައިކަލް ދުއްވުން އާންމުވެ ޝަކުވާ އޮންނަނީ ބޮޑުވެފަ އެވެ.

ހުޅުމާލޭގައި ބައެއް ފްލެޓްތަކުގެ ކައިރިން އޮންނަ ހުސް ޖާގަތަކުގައި ކާރާއި ޕިކަޕް ފަދަ ތަކެތި ވެސް ޕާކުކޮށްފައި ހުރެ އެވެ.

އާންމު ދަތުރުފަތުރާއި ޕަބްލިކް ޓްރާންސްޕޯޓަށާއި ހިނގާބިނގާވެ އުޅޭ މީހުންނަށް ދަތިވާ ގޮތަށް ގަވާއިދާ ހިލާފަށް ޕާކުކޮށްފައި ހުންނަ އުޅަނދުތައް ޓޯކުރުން މެދުކަނޑާލާފައި އޮތުމަށް ފަހު އަލުން މަސައްކަތް ފުލުހުން މި ފަހުން ފެށީ މީގެ ހައެއް މަސް ކުރިންނެވެ.

ގަވައިދާ ހިލާފަށް ޕާކުކުރާ އުޅަނދުތައް ޓޯކުރުމަށް ފަހު އަނބުރާ ދެނީ 48 ގަޑިއިރު ފަހުންނެވެ. އަދި ޓްރެފިކް ގާނޫނާއި ގަވައިދާ ހިލާފްވާ އެއް ވެހިކަލް ދޫކުރަނީ ޓޯކުރާތާ 15 ދުވަސް ފަހުންނެވެ.