ޕެރިސް އެގްރީމެންޓުން އެމެރިކާ ވަކިވުމުން، ރާއްޖޭގެ މޫސުމީ ހާލަތު ބެއްލެވުމަށް ޓްރަމްޕަށް ނަޝީދުގެ ދައުވަތެއް

ޕެރިސް ކްލައިމެޓް އެއްބަސްވުމުން އެމެރިކާ ވަކިވާން ނިންމެވުމުން ހިތާމަ ކުރައްވާ ކަމަށް ވިދާޅުވެ، އެމެރިކާގެ އާ ރައީސް ޑޮނަލްޑް ޓްރަމްޕް ރާއްޖެ އަށް ވަޑައިގެން، މޫސުމީ ބަދަލުތަކުން ކުރަމުންދާ ނޭދެވޭ އަސަރުތައް ބައްލަވައިލެއްވުމަށް، ކްލައިމެޓް ވަލްނަރަބަލް ފޯރަމް (ސީވީއެފް) ގެ ސެކްރެޓަރީ ޖެނެރަލްގެ ހައިސިއްޔަތުން، ކުރީގެ ރައީސް މުހައްމަދު ނަޝީދު ދައުވަތު ދެއްވައިފި އެވެ.

އެމެރިކާގެ 47 ވަނަ ރައީސްގެ ގޮތުގައި، އެ ގައުމުގެ ވެރިކަމަށް ރޭ އެނބުރި ވަޑައިގެންނެވުމާ އެކު، ޓްރަމްޕް ނިންމެވި ވަރުގަދަ ނިންމުންތަކުގެ ތެރޭގައި ޕެރިސް ކްލައިމެޓް އެއްބަސްވުމުން އަނެއްކާވެސް ވަކިވުން ހިމެނެ އެވެ.

ސީވީއެފުން ނެރުނު ބަޔާނެއްގައި ނަޝީދު ވަނީ އެމެރިކާގެ އާ ސަރުކާރާ އެކު މަސައްކަތް ކުރުމުގެ ފުރުސަތު ލިބިވަޑައިގެންނެވުމުން މަރުހަބާ ވިދާޅުވުމާ އެކު، ޕެރިސް އެގްރީމެންޓުން އެމެރިކާ ވަކިވާން ނިންމުމުން ހިތާމަކުރައްވާކަން ހާމަކުރައްވައިފަ އެވެ.

ނަޝީދު ވިދާޅުވި ގޮތުގައި، ބޮޑެތި ގައުމުތަކުން ތިމާވެއްޓަށް ދެމުންދާ ގެއްލުންތައް ކުޑަކުރުމަށް ހަދާފައިވާ ޕެރިސް އެގްރީމެންޓަކީ، މުސޫމީ ބަދަލުތަކުގެ ނޭދެވޭ އަސަރުތައް ތަހައްމަލު ކުރަމުންދާ ތަރައްގީވަމުން އަންނަ ކުދި ގައުމުތަކަށް ލިބުނު އުއްމީދެއް ކަމަށެވެ.

ނަޝީދު ވިދާޅުވި ގޮތުގައި، މޫސުމީ ނުރައްކާތަކުން އެންމެ ނާޒުކު ގައުމުތަކުގެ މުސްތަގުބަލު ނެތެމުން ދާއިރު، މިއީ އެމެރިކާ ފަދަ ބޮޑެތި ގައުމުތަކުން އިސް ނަގައި، އޮއިވަރު ބަދަލުކުރަން ނަމޫނާ ދައްކަންވީ ވަގުތެވެ.

"އަޅުގަނޑު، ރައީސް ޓްރަމްޕަށް ދައުވަތު އަރުވަން، އަޅުގަނޑުގެ އުފަން ގައުމު ރާއްޖެ ހިމެނޭ ގޮތަށް، އަޅުގަނޑުމެންނަށް ކުރިމަތިވެފައިވާ ބައެއް ގޮންޖެހުންތައް ގާތުން ބައްލަވައިލެއްވުމަށް،" ރާއްޖެ އަށް ޒިޔާރަތް ކުރެއްވުމަށް ޓްރަމްޕަށް ދައުވަތު ދެއްވަމުން ނަޝީދު ވިދާޅުވި އެވެ.

"އެ މަނިކުފާނުގެ ވެރިކަމުގެ މި ނިންމެވުމާ މެދު ދެވަނަ ވިސްނެވުމަކަށް ވަޑައިގަތުމަށްޓަކައި، އަޅުގަނޑު ރައީސް ޓްރަމްޕަށް ދައުވަތު އަރުވަން، އުދައެރުމުން ފެށިގެން، ހޫނުގަދަވުމާއި ގްލޭސިއާސްތައް ވިރުމާއި ދަނޑުބިންތައް ފަނާވެ ގޮސްފައިވާ މަންޒަރުތައް ގާތުން ބައްލަވައިލެއްވުމަށް."

ނަޝީދު ވިދާޅުވީ މޫސުމީ ކާރިސާތަކާ ދެކޮޅަށް ކުރާ މަސައްކަތުގައި ހުރިހާ ގައުމުތަކެއް ގުޅިގެން އެއް އަމާޒަކަށް މަސައްކަތް ކުރަންޖެހޭ ކަމަށެވެ. އަދި ޕެރިސް އެއްބަސްވުމުގައި އެމެރިކާ އިން އަލުން ބައިވެރިވާނެ ކަމަށް ޔަގީން ކުރައްވާ ކަމަށް ވެސް އެ ބަޔާނުގައި ނަޝީދު ވިދާޅުވި އެވެ.

ފްރާންސްގެ ވެރިރަށް ޕެރިސްގައި 2015 ވަނަ އަހަރު ގައުމުތަކުން އިގުރާރުވީ، ދުނިޔޭގެ ހޫނުމިން މަތިވުން ހުއްޓުވުމަށްޓަކައި ޖައްވަށް ވިހަ ގޭސްތައް ބޭރުކުރުން މަދުކުރުމަށެވެ.

އެ އެއްބަސްވުމުން ފަރުމާކޮށްފައިވަނީ، އެމެރިކާ އިގުތިސާދީ ހަރަކާތްތައް ހީނަރުވާ ގޮތަށް ކަމަށް ވިދާޅުވެ، ޓްރަމްޕްގެ ފުރަތަމަ ވެރިކަމުގެ ތެރޭގައި އެ އެއްބަސްވުމުން އެމެރިކާ ވަކިވި އެވެ. ނަމަވެސް، ރައީސް ޖޯ ބައިޑެންގެ ސަރުކާރުން ޓްރަމްޕްގެ އެ ނިންމެވުން ބާތިލުކޮށް، ޕެރިސް އެގްރީމެންޓުގައި އަލުން ބައިވެރިވީ 2021 ވަނަ އަހަރު އެވެ.

ރައީސްކަމުގެ މަގާމުގެ ހުވާ ކުރެއްވުމަށް ފަހު، ގައުމާ މުހާތަބު ކުރައްވަމުން ޓްރަމްޕް ވަނީ، ވަކި ފަރާތަކަށް ބުރަވެ، އެމެރިކާގެ ވިޔަފާރިތަކަށް ގެއްލުވަމުންދާ އެއްބަސްވުމުން ވަކިވާން ނިންމެވިކަން އިއުލާނު ކުރައްވައިފަ އެވެ.