ޕޮލިސް ފްލެޓްތަކަށް އިތުރަށް 355 މިލިއަން ހޭދަކުރި، މަޝްރޫއު ހިންގީ ވަކި ބަޔަކަށް ފައިދާވާ ގޮތަށް: އޮޑިޓް

ފުލުހުންގެ ވެލްފެއާ ކުންފުނި ޕޮލްކޯ އިން ވަކި ބަޔަކަށް ފައިދާވާ ގޮތަށް ހުޅުމާލޭގައި އިމާރާތްކޮށްފައިވާ ފްލެޓްތަކަށް މިހާތަނަށް 1 ބިލިއަން ރުފިޔާ ހަރަދުކޮށްފައިވާ ކަމަށާއި އެއީ، 355 މިލިއަން ރުފިޔާގެ ގެއްލުމުގައި ހިންގާފައިވާ މަޝްރޫއެއް ކަމަށް އޮޑިޓާ ޖެނަރަލްގެ އޮފީހުން ބުނެފި އެވެ.

ޖޫން، 23، 2013 ގައި ފެށި ފުލުހުންގެ ހައުސިން ޕްރޮޖެކްޓް، ބްލޫސް ހައުސިންއާ ގުޅިގެން ހަދައި އާއްމުކޮށްފައިވާ އޮޑިޓުގައި ބުނީ އެ މަޝްރޫއުއަށް މިހާތަނަށް 1.06 ބިލިއަން ރުފިޔާ ހަރަދުކޮށްފައިވާ ކަމަށެވެ. އަކަ ފޫޓަކަށް 1،851 ރުފިޔާގެ ރޭޓުން ހަރަދުކޮށްފައިވާ އިރު މިހާތަނަށް ކުރި ހަރަދަކީ މަޝްރޫއުގެ ދެގުނަ އަގު ކަމަށް އޮޑިޓުގައިވެ އެވެ.

އޮޑިޓުގައި ބުނީ ފިނޭންސް މިނިސްޓްރީގެ ޓެންޑާ އިވެލުއޭޝަން ބޯޑުން ހޯދި މައުލޫމާތާއި އަމިއްލަ ފަރާތްތަކުގެ ކޮންސްޓްރަކްޝަން މަސައްކަތްތަކުގެ އަގުތަކަށް ބަލާއިރު އެފަދަ މަޝްރޫއެއްގެ އެވްރެޖް އަގު ކަމަށް ބެލެވެނީ އަކަ ފޫޓަކަށް 1300 ރުފިޔާ އާއި 1500 ރުފިޔާގެ ރޭޓު ކަމަށެވެ.

އެ ރޭޓުން ބަލާ ނަމަ، އޮޑިޓުގައި ބުނި ގޮތުގައިއެ މަޝްރޫއުގެ އަގަށް ޖެހެނީ 745.3 މިލިއަން ރުފިޔާ އެވެ. އަދި އެންމެ ބޮޑުވެގެން ވެސް 859.9 މިލިއަން ރުފިޔާ ކަމަށް އޮޑިޓުގައި ވެ އެވެ.

"މި އަންދާޒާ އަގުތަކަށް ބަލާ ނަމަ، މި މަޝްރޫއުއަށް 354.7 މިލިއަން ރުފިޔާ އާއި މަދުވެގެން 240.1 މިލިއަން ރުފިޔާ އިތުރަށް ހަރަދުކޮށްފައިވާ ކަމަށް މި އޮފީހުން ދެކެމެވެ،" އޮޑިޓް ރިޕޯޓުގައިވެ އެވެ.

އޮޑިޓުގައި ބުނީ އެ މަޝްރޫއުގެ ފުރަތަމަ އެއްބަސްވުމުގެ އަގު ކަމުގައިވާ 580 މިލިއަން ރުފިޔާއާ އަޅާބަލާއިރު މި މަޝްރޫއުއަށް މިހާތަނަށް ހިނގާފައިވާ ހަރަދު 481 މިލިއަން ރުފިޔާއަށް އިތުރުކަމަށެވެ.

އޮޑިޓުގައި ބުނީ އަގު ގާތްގަނޑަކަށް ދެގުނަ ހަރަދުކޮށްފައިވުމުން ދައްކުވައިދެނީ މިފަދަ ބޮޑެތި ޕްރޮޖެކްޓްތައް ހިންގުމުގެ ފަންނީ ގާބިލުކަން ޕޮލްކޯގައި ނެތް ކަމެވެ. ކޮންޓްރެކްޓަރުންނަށް ފައިދާވާ ގޮތަށް އެއްބަސްވުންތަކަށް ބަދަލުގެނެސްފައިވުމާއި ފްރޯޑާއި ކޮރަޕްޝަނުގެ އަމަލުތަކަށް ޝައްކުކުރެވޭ ކަންކަން މި މަޝްރޫއުގެ ތެރޭގައި ހިންގާފައިވާ ކަމަށް ވެސް އޮޑިޓުގައި ބުންޏެވެ.

އޮޑިޓުގައި ބުނި ގޮތުގައި ޕޮލްކޯ އިން މަސައްކަތް ކޮށްފައި ވަނީ ވަކި ފަރާތަކަށް މަންފާ ލިބޭ ގޮތަށް މި މަޝްރޫއުގެ މަސައްކަތް ކުރިއަށް ގެންދާށެވެ.

އޮޑިޓުގައި ފާހަގަކުރާ ގޮތުގައި ޕޮލްކޯ އިން ހަދާފައިވާ 628.7 މިލިއަން ރުފިޔާގެ ކޮންޓްރެކްޓްތަކަކީ ވަކި ފަރާތަކަށް ސީދާ ގޮތުންނާއި ނުސީދާ ގޮތުން އެސޯޝިއޭޓެޑް ކުންފުނިތަކެއް ކަމަށް ބެލެވެ އެވެ. އެގޮތުން އެ ފަރާތަކީ ނޫމަޑީގެ ރެޕްރެސެންޓަޓިވް، އައިލެންޑް އެކްސްޕާޓްގެ މެނޭޖިން ޑިރެކްޓަރު އަދި ދެ ކޯމަސްގެ މެނޭޖިން ޑިރެކްޓަރާ އާއިލީ ގުޅުން އޮންނަ މީހެއް ކަމަށް ބެލެވޭ ކަމަށް ބުންޏެވެ.

"މީގެ އިތުރުން އައިލެންޑް އެކްޕާޓުން ސަބްކޮންޓްރެކްޓް ކޮށްފައިވާ ކުންފުނިތަކުގެ ތެރެއިން ގްލޯބަލް އެކްސްޕްރެސް އާއި ފުނާކީ އިމްޕޯޓް އެންޑް އެކްސްޕޯޓް ކޯގެ އޭނަރަކީ ވެސް mr.x ކަން ފާހަގަކުރަމެވެ." އޮޑިޓުގައިވެ އެވެ.

އޮޑިޓުގައި ބުނި ގޮތުގައި ޕޮލްކޯ އިން ކޮންޓްރެކްޓަރުންނާ އެކު ހަދާފައިވާ އެއްބަސްވުންތަކުގެ ދަށުން ދީފައިވާ މާލީ ލުއިތަކާއި އަގުތައް އިތުރުކޮށްދިނުމާއި ކޮންޓްރެކްޓުގެ މުއްދަތު އިތުރުކުރުން ފަދަ ހުރިހާ ފައިދާއެއް ސީދާ ގޮތުންނާއި ނުސީދާ ގޮތުން އެ ފަރާތަށް ލިބިފައިވެ އެވެ.

mr.x އަށް ސީދާ ގޮތުންނާއި ނުސީދާ ގޮތުން ދައްކާފައިވާ ފައިސާތައް:

- ނޫމަޑި - 96،324،299ރ.

- އައިލެންޑް އެކްސްޕާޓް - 441،944،785ރ.

- ގްލޯބަލް އެކްސްޕްރެސް - 70،024،572ރ.

- ފުނަކީ އިމްޕޯޓް އެންޑް އެކްސްޕޯޓް - 36،223،214ރ.

- ޑީކޭއެމް ވޯލްޑްވައިޑް - 24،013،521ރ.

- ދެކޯމަސް - 14،225،777ރ.

ހުޅުމާލޭ ފޭސް އެކެއްގައި 13 ބުރީގެ 3 ޓަވަރުގެ މަސައްކަތް ކުރުމަށް އެންމެ ފުރަތަމަ ހަވާލުކުރީ 19 ޖޫން 2013 ގައި 580.2 މިލިއަން ރުފިޔާއަށެވެ. އެ މަޝްރޫއު ނޫމަޑިއާ ހަވާލުކުރީ 24 މަސް ދުވަހުން ނިންމައި ހަވާލުކުރާ ގޮތަށެވެ.

އެ މަޝްރޫއުގައި އެންމެ ފުރަތަމަ ހަވާލުކުރީ 300 ހައުސިން ޔުނިޓް އަޅާށެވެ. އެކަމަކު އެކި ފަހަރު މަތިން ހައުސިން ޔުނިޓްތަކުގެ އަދަދު ބަދަލުކޮށް އެންމެ ފަހުން ހަވާލުކޮށްފައި ވަނީ 361 ހައުސިން ޔުނިޓް އަޅާށެވެ.

އެކަމަކު ނޫމަޑިއަށް މަސައްކަތް ނުނިންމިގެން ފަހުން އައިލެންޑް އެކްސްޕާޓްއާ ހަވާލުކުރިޔަސް ފަހުން އެ ކުންފުންޏާ އެކު ހެދި އެއްބަސްވުން އުވާލަން ޖެހުނީ ވެސް އެތަން ނުނިމި ދިގުލައިގެން ދިއުމުންނެވެ.

އެންމެ ފަހުން 2021 ގައި އެ ފްލެޓްތައް ނިންމަން ހަވާލުކުރީ އަމީން ކޮންސްޓްރަކްޝަނާ އެވެ.