ފުޅައެޅި މޭވާ އާއި ތަރުކާރީން ރަން ވަނައެއް!

ކޭކެއް ވެސް ގިނަފަހަރަށް ކަމުދާނީ ބަލާލަން ރީތި ކުލަތަކާއި މާތަކާ އެކު ޑިޒައިންގެ ވެސް ފުރިހަމަކަން ފެނުމުންނެވެ. އެކަމަކު، ޒުވާން މިޝްކާ އަލީ ސަމީރު (މިއްކޮ) ބޭނުންވީ ކޭކެއް ރީތިވާ އެންމެ އާއްމު ކަންކަމަށް ޗެލެންޖްކުރާށެވެ.

އޭނާ ތައްޔާރުކުރި "ދަ ރޮޓަން ފީސްޓް" ކޭކުގައި ފެންނަނީ ވަކަރު ބޯޑެއްގެ މަތީގައި ދުވެ ދުވެ ތިބި މީދާތަކަކާއި ކުނި މޭވާ އާއި ތަރުކާރީ ތަކެކެވެ. މުބާރާތުގެ އެއް ވަނަ ލިބުނީ މި ކޭކުގެ އުފެއްދުންތެރިކަމާއި ހުނަރުވެރި ކަމަށެވެ.

މި އަހަރުގެ ފުޑް އެންޑް ބެވަރޭޖަސް ޝޯގެ ބޭކް އެންޑް ޑެލިކަސީ މުބާރާތުގެ ނޮވެލްޓީ ކެޓަގަރީއަށް ހެދި ކޭކުން، މިއްކޮ ބުނި ގޮތުގައި، ވަރަށް ފުން މާނަތަކެއް ދޭހަކޮށްދެ އެވެ. އުނިކަމާއި ކުނިކަމާއި ފުޅަތަކުގެ ތެރެއިން އޭނާ ދައްކައިދޭން ބޭނުންވީ ހިތްގައިމު ކަމެވެ. ފޮރުވިފައިވާ ރީތިކަމެވެ. މަޑުޖެހުމެއް ނެތި ދިރިއުޅުން ކުރިއަށްދާނެ ކަމެވެ.

"ބޭނުންވީ ވަރަށް ޔުނީކް އެއްޗެއް ހަދަން. މީހުންނަށް ކޭކެއް ރީތިވާ އާންމު ކަންކަމަށް ޗެލެންޖުކުރަން ބޭނުންވީ... ރޮޓަން ފީސްޓް ގެ ޚިޔާލު އައީ އިމްޕާފެކްޝަން އަދި ޑިކޭގެ ކޮންސެޕްޓް އިން. އެއްޗެއް ނެތި ފަނާވެގެންދާ އެ ޕްރޮސެސްގެ ފުރިހަމަކަން ދައްކައިދޭން ބޭނުންވީ،" މިއްކޮ ބުންޏެވެ.

"މައި ކޭކްސް އެންޑް ސްވީޓްސް" ގެ ފަރާތުން އިންތިޒާމު ކުރާ ބޭކްސް އެންޑް ޑެލިކަސީ މުބާރާތަކީ ޝެފް ގިލްޑް މޯލްޑިވްސްގެ އެންޑޯސްމަންޓާ އެކު ކުރިއަށްދާ މުބާރާތެކެވެ. މި މުބާރާތުގެ ނޮވެލްޓީ ކެޓަގަރީއަކީ އަސްލާ އެއްގޮތް ކޭކުތަކަށް ހާއްސަ ކެޓަގަރީ އެވެ. މިދިޔަ އަހަރު ވެސް މި ކެޓަގަރީން އެއްވަނަ ލިބުނީ މިއްކޮ ތައްޔާރުކުރި "އެންޝާންޓެޑް ވުޑްލެންޑް ޑިލައިޓް" ނަން ދީފައިވާ ކޭކަށެވެ.

ކަޅު ފަހާއި، ފެހި ވިނަތަކެއް މަތީ މުށި ކުލައިގެ ފުއްލާއެއް ތްރީ ޑީކޮށް ތައްޔާރުކޮށް، ފިޔާތޮށި މާތަކަކުން އިތުރު ފުރިހަމަކަމެއް އެ ކޭކަށް ގެނެސް ދިނެވެ.

އޭރު މިއްކޮގެ އުމުރަކީ 17 އަހަރެވެ. އޭގެ އަހަރެއް ފަހުން އޭނާ އަނެއްކާވެސް ރަން މެޑަލް މި ދިފާއުކުރީ ރާއްޖޭގެ ކުޅަދާނަ އެތައް ބަޔަކާ ވާދަކޮށްގެން މޮޅު، ތަފާތު ހިޔާލަކުންނެވެ.

މިއްކޮގެ އުފެއްދުމުގައި އަސްލު ކޭކުން ތައްޔާރުކޮށްފައި ވަނީ ބަަރަބޯ އެވެ. ޑާކް ޗޮކްލެޓާއި ކޮފީ ރަހައިގެ ކޭކުގައި މިއްކޮ ދެން ބޭނުންކޮށްފައި ހުރީ ސޯލްޓެޑް ކެރަމަލްއާ މިކްސް ނަޓްސް އެވެ. ކޭކުގައި ބޭނުންކޮށްފައިވާ ހުރިހާ މޭވާތަކާއި ތަރުކާރީ އަދި މީދާ ތައްޔާރުކޮށްފައި ހުރީ އެއްވެސް މޯލްޑެއް ބޭނުންނުކޮށް ފޮންޑަންޓުންނެވެ.

މުޅި ކޭކު ނިންމާލަން ފަސް ދުވަސް ހޭދަވިއިރު، އެންމެ އުނދަގޫ ކަމަކަށްވީ ކޮންމެ އެއްޗެއްވެސް އޭގެ އެންމެ އަސްލާ އެއްގޮތް ބައްޓަމާއި ޓެކްސްޗާ އަދި ކުލައިން ތައްޔާރުކުރުމަށެވެ. އަދި ހުރިހާ އެއްޗެއް ވެސް ކުނިވެގެންދާއިރު އެ އަންނަ ތަފާތުތައް ވީހާވެސް ފުރިހަމައަށް ދައްކަން އެކި އެކްސްޕެރިމެންޓުތައް ހަދަން ޖެހުނުކަމަށް މީއްކޮ ބުންޏެވެ.

"ކުނިވާ ގޮތާއި، އެ ކުލަތަކާއި ފުޅަ އެހުންނަ ގޮތް ބަލަން މާރުކޭޓަށް ގޮސް ފޮޓޯ ނަގައި ސާމްޕަލް މޭވާ ތަކެއް ގަނެ ގޭގައި ބަހައްޓައިގެން ރިކޯޑު ކުރަމުން ދިޔައީ. ވަަރަށް ބައިވަރު ފޮޓޯތައް ބެލިން އަސްލު އެހުންނަ ޓެކްސްޗާ ތައް ބަލަން" މީއްކޮ ކިޔައިދިނެވެ.

މި މުބާރާތުގައި ދެން މިއްކޮ ވާދަކުރީ ޑްރެސް ދަ ކޭކް ކެޓަގަރީގަ އެވެ. މި ކެޓަގަރީގައި އޭނާ ތައްޔާރުކުރި ބާގާ ކޭކަށްވަނީ ބްރޯންޒް މެޑަލް ލިބިފަ އެވެ.

މިހާ ފުރިހަމަ ކޭކުތަކަކުން އާޝޯހު ކުރުވާއިރު، މިއީ މުޅިންހެން އޭނާގެ މަންމައާ އެކު ބަދިގެތެރެއިން ދަސްކޮށް ފައްކާކުރި ހުނަރެެކެވެ.

މިއްކޮގެ މަންމަ މަރިޔަމް ޝަފާނާ (ކޭކްސް ބައި ޝަފީ) އަކީ ވެސް އަސްލާ އެއްގޮތް ކޭކުތައް އެޅުމުގައި މަގްބޫލު ފަރާތެކެވެ. އަދި 2024 ގައި ކުރިއަށްދިޔަ ފުޑް އެންޑް ހޮސްޕިޓާލިޓީ އޭޝިއާ މޯލްޑިވްސް (އެފްއެޗްއޭއެމް)ގެ ގްލޯބަލް ކަލިނަރީ ޗެލެންޖް އެންޑް އެގްޒިބިޝަންގެ އާޓިސްޓިކް ޕޭސްޓްރީ ޝޯޕީސް ކެޓަަގަރީއަށް ޝަފީ ތައްޔާރުކުރި ސިންގާ ކޭކަށް ވަނީ ރަން މެޑަލް ލިބިފަ އެވެ.

މިއްކޮ ބުނި ގޮތގައި މަންމަ ކޭކު އަޅައި ޑެކަރޭޓު ކުރާއިރު އޭނާ އަށް އަބަދުވެސް ސަމާލުކަން ދެވެ އެވެ. އަދި މިފަހުން މަންމަ އަށް އެހީތެރިވެދީ އުޅުމުގެ ތެރެއިން ކޭކު އެޅުމުގެ އެކި ހުނަރުތަކާއި އުކުޅުތައް ދަސްވި ކަމަށް ބުންޏެވެ.

"މި ދާއިރާއަށް ޝައުގުވެރިވީ މަންމަގެ ފަރާތުން. ކޭކު އެޅުމަށް މަންމަގެ ހުންނަ ޕެޝަން ފެނި، އަދި ކޭކު އަޅާއިރު މުޅި ގޭތެރޭގައި ވެސް އެ ހުންނަ ފޯރި ފެނި ހަމަ މި ދާއިރާއިން ކުރިއަށްދާން ބޭނުންވީ. އަދި މި ކަމަކީ އަމިއްލައަށް ކްރިއޭޓިވް އެކި ކަންކަން ކުރެވޭނެ ކަމަކަށްވާތީއާ، އަމިއްލަ އަށް ތައްޔާރުކުރާ އެއްޗެއްގެ ފެނި އޭގެ ރަހަ ކަމުދިޔައިމަ މީހުންނަށް އެލިބޭ އުފާވެރިކަމުން ވަރަށް ހިތްހަމަޖެހޭ" މި ދާއިރާއިން ކުރިއަށްދާން އޭނާ ނިންމީ ގޮތާ ބެހޭ ގޮތުން މީއްކޮ ބުންޏެވެ.

ރަސްމީ މަސައްކަތެއް ގޮތުގައި ކޭކު ނޭޅިއަސް މިއްކޮ އަބަދުވެސް ކުރެހުމާއި، އުފެއްދުންތެރި ފަންނަށް ލޯބިކުރެ އެވެ. ސްކޫލު ދައުރުން ފެށިގެން ކުރަހައި ކުލަޖައްސާ އަދި ކްލޭ ފަދަ ތަކެތިން ސްކަލްޕްޓިން ފަދަ ހުނަރުތައް އޭނާވަނީ ދަސްކޮށްފަ އެވެ. އެއާއެކު އޯލެވެލްގައި ވެސް އާޓް އެންޑް ޑިޒައިން ކިޔެވިއިރު އެކި ކަހަލަ އާޓް ފޯމްތައް ދަސްވި އެވެ.

އޭނާ ވަނީ ގައުމީ ޔުނިވާސިޓީން ކަލިނަރީ އާޓްސްގެ ދާއިރާއިން ސެޓްފިކެޓް 3 ނިންމައިފަ އެވެ. މިހާރު އޭނާ ދަނީ މި ކޯހުގެ ޑިޕްލޮމާ ފުރިހަމަ ކުރަމުންނެވެ.

މިވަގުތު ކިޔަވަން އިސްކަން ދިން ނަމަވެސް އޭނާ އުއްމީދުކުރަނީ އަމިއްލަ ވިޔަފާރިއެއް ފެށުމަށެވެ. އެކަން ކާމިޔާބު ކުރެވޭނެ ކަން އަމިއްލަ ނަފްސަށް ގަބޫލުކުރަނީ "ރޮޓަން ފީސްޓް"ގެ ޗެލެންޖުންނެވެ.