ތަރައްގީގައި ބޮޑު ރަށެއް، ކުޑަ ރަށެއް ތަފާތެއް ނުވާނެ: ރައީސް

ރަށްރަށުގެ ތަރައްގީގައި އާބާދީއަށް ބެލުމެއް ނެތި ހުރިހާ ރަށެއް ހަމަހަމަ ވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ހއ. އަތޮޅަށް ރައީސް ކުރައްވަމުން ގެންދަވާ ދަތުރުފުޅުގެ ތެރެއިން، އެ އަތޮޅުގެ އެންމެ އާބާދީ ކުޑަ ރަށް ކަމަށްވާ މޮޅަދޫއަށް ރައީސް ވަނީ މިއަދު ވަޑައިގެން އެ ރަށުގެ ރައްޔިތުންނާ ބައްދަލު ކުރައްވައިފަ އެވެ. އެ ބައްދަލު ކުރެއްވުމުގައި ރައީސް ވިދާޅުވީ މޮޅަދޫގެ އާބާދީ މަދުވުމަކީ އެ ރަށުގެ ރައްޔިތުންނަށް ލިބެން ޖެހޭ ހިދުމަތްތަކުން މަހްރޫމްވާން ޖެހޭ ސަބަބެއް ނޫން ކަމަަށެވެ.

"އަޅުގަނޑު އަބަދުވެސް ދަންނަވާ ވާހަކައެއް، އަޅުގަނޑަށް ހަމަ ހަގީގަތުގައި ވެސް ކޮންމެ ރައްޔިތެއް ވެސް ހަމަހަމަ،" އެމަނިކުފާނު ވިދާޅުވި އެވެ.

"އެއީ މިގޮތަށް އާބާދީގެ ގޮތުން ކުޑަ ރަށަކަށް ވިޔަސް އަދި އެންމެ ބޮޑެތި އާބާދީތަކަށް ވިޔަސް، ހުރިހާ ރައްޔިތުން އަޅުގަނޑަށް ހަމަހަމަ."

ރައީސް ވަނީ މޮޅަދޫގެ ރައްޔިތުން އުންމީދުކުރާ ގޮތަށް ބާރު ސްޕީޑުގައި ކަންކަން ކުރުމަކީ ސަރުކާރުގެ ސިޔާސަތު ކަމަށް ވިދާޅުވެފަ އެވެ.

ރައްޔިތުން ބޭނުންވާ ގޮތަށް ކަންކަން ފުރިހަމަކޮށް ދެއްވާނެ ކަމުގެ ޔަގީންކަން ދެއްވަމުން، އެމަނިކުފާނު ވަނީ މޮޅަދޫގައި ބައެއް މަޝްރޫތައް ހުއްޓިފައި ހުރިކަން ފާހަގަ ކުރައްވައިފަ އެވެ. އެގޮތުން އެ ރަށަށް އެންމެ މުހިންމު އެއް މަޝްރޫއަކީ ފެނާއި ނަރުދަމާގެ މަޝްރޫއު ކަމަށް ވާއިރު، އެ މަޝްރޫއު ހުއްޓިފައި އޮތުމަކީ ކުރީގެ ސަރުކާރުން ވެފައިވާ އިހުމާލެއް ކަމަށް އެމަނިކުފާނު ވިދާޅުވި އެވެ.

ރައީސް ވަނީ މޮޅަދޫގައި ހުއްޓިފައި މަޝްރޫއުތައް އަވަހަށް ނިންމައިދޭނެ ކަމުގެ ޔަގީންކަން ދެއްވައިފަ އެވެ.