އެމްއެފްޑީއޭގައި ޑީޖީއެއް ނެތި ހަ އަހަރު، މަގާމަށް މީހަކު ނެގުން ސީއެސްސީން މަޑުޖައްސާލައިފި

މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) ގެ ޑިރެކްޓާ ޖެނެރަލްގެ މަގާމަށް ބޭފުޅަކު އައްޔަން ކުރުމަށް އިންޓަވިއު ކުރުމަށްފަހު، އެ މަސައްކަތް ސިވިލް ސާވިސް ކޮމިޝަން (ސީއެސްސީ) އިން މަޑުޖައްސާލައިފި އެވެ.

އެނގިފައިވާ ގޮތުގައި މިދިޔަ އަހަރު އެމްއެފްޑީއޭގެ ޑީޖީގެ މަގާމަށް ކުރިމަތިލާން ހުޅުވާލުމުން ހަތަރު ބޭފުޅަކު އެ މަގާމަށް ކުރިމަތިލި އެވެ. އަދި މިދިޔަ އަހަރު އެ މަގާމުގެ އިންޓަވިއު އާއި އެގްޒާމް ވެސް ކުރިއަށް ގެންދިޔަ އެވެ.

އެކަމަކު މަގާމަށް ކުރިމަތިލި މީހުންނަށް ލިބުނު މާކްސް އާންމު ކުރުމުގެ ކުރިން ސީއެސްސީން ވަނީ އެމްއެފްޑީއޭގެ ގާނޫނަށް އިސްލާހެއް ގެނައުމުގެ މަސައްކަތް ކުރަމުންދާ ކަމަށް ބުނެ، އެ މަގާމަށް މީހަކު އައްޔަން ކުރުމުގެ މަސައްކަތް މެދުކަނޑާލައިފަ އެވެ.

އެ އިދާރާގެ ޑިރެކްޓާ ޖެނެރަލްގެ މަގާމުގައި އެންމެ ފަހުން ހުންނެވީ ޝަރީފާ އާދަމް މަނިކެވެ. އޭނާ އެ މަގާމުން ވަކިވެވަޑައިގަތީ 2019 ގަ އެވެ.

އޭގެ ފަހުން އެ މަގާމަށް ކުރިމަތިލާން ކުރީގެ ސަރުކާރުގެ ދުވަސްވަރު ހުޅުވާލުމުން އޭރު އެ މަގާމަށް ކުރިމަތިލެއްވީ ރައީސް ޑރ. މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދެވެ. ސާޖިދާ އަށް އެ މަގާމަށް އައްޔަން ކުރުމަށް ހެލްތު މިނިސްޓްރީން 2020 ވަނަ އަހަރު ނިންމުމަށްފަހު އެ ނިންމުން ބަދަލުކުރީ އިދާރީ އޮނިގަނޑަށް ބަދަލެއް ގެންނަން އުޅޭ ކަމަށް ބުނެ އެވެ.

އެކަމަކު ދެވަނަ ފަހަރަށް އެ މަގާމަށް މީހަކު ހޯދަން އަނެއްކާވެސް އޭރު އިއުލާންކުރި އެވެ. އެ މައްސަލަ ސާޖިދާގެ ފަރާތްޕުޅުން އޭރު ވަޒީފާއާ ބެހޭ ޓްރައިބިއުނަލަށް ހުށަހެޅުމުން އެ ޓްރައިބިއުނަލުން ވެސް ނިންމީ އެކަމަނާއަށް އެ މަގާމު ދޭން އަމުރު ނުކުރެވޭނެ ކަމަށެވެ. އަދި އެ މައްސަލަ ހައި ކޯޓާއި ސުޕްރީމް ކޯޓަށް ހުށަހެޅުމުން އެ މައްސަލަ ބަލައިނުގަންނަން އެ ދެ ކޯޓުން ވެސް ނިންމި އެވެ.

ސުޕްރީމް ކޯޓުގެ ނިންމުމުގައިވަނީ ސާޖިދާއަށް އެ މަގާމު ނުދޭން އޭރުގެ ސަރުކާރުން ނިންމީ ރައީސް މުއިއްޒުގެ އަނބިކަނބަލުންނަށް ވާތީ ކަމަށް ބެލެވެން ނެތް ކަމަށެވެ. އަދި އެކަމަނާއާ މެދު ތަފާތު ކޮށްފައިވާ ކަމަށް ބުނެފައި ވިޔަސް، ތަފާތު ކުރި ގޮތެއް ބުނެ ނުދެވޭ ކަމަށް އެ ނިންމުމުގައިވެ އެވެ.