މުސްލިމުންނަށް ނަފްރަތު އުފެއްދުމުގެ ވާހަކަތައް އިންޑިއާގައި މިދިޔަ އަހަރު ވަރަށް ބޮޑަށް އިތުރުވި: ރިޕޯޓް

އިންޑިއާގެ ބޮޑުވަޒީރުކަމުގެ މަގާމަށް ނަރެންދުރަ މޯދީ ވަޑައިގެންފަހުން އެ ގައުމުގައި މުސްލިމުންނާ ދެކޮޅު އަމަލުތަކާއި ވާހަކަތައް އިތުރުވެފައި ވިޔަސް މިދިޔަ އަހަރަކީ އެފަދަ ކަންކަން ވަކިން ބޮޑަށް އިތުރުވި އަހަރެއް ކަމަށް އެމެރިކާގެ ތިންކް ޓޭންކެއްގެ ރިޕޯޓެއްގައި ބުނެފި އެވެ.

އިންޑިއާ ހޭޓް ލެބް (އައިއެޗްއެލް) ގެ ރިޕޯޓުގައި ބުނެފައި ވަނީ މި ބިރުވެރި ބަދަލަކީ ވެރިކަންކުރާ ބާރަތިޔާ ޖަނަތާ ޕާޓީ (ބީޖޭޕީ) އާއި ހިންދޫ ވަތަނީ ހަރަކާތުގެ ފިކުރީ އެދުންތަކުގެ ސަބަބުން ދިމާވެފައިވާ ގޮތް ކަމަށެވެ.

މިދިޔަ އަހަރު އިންޑިއާގައި ބޭއްވި އާންމު އިންތިހާބުގެ ތެރޭ، މޯދީ އަށް ފާޑުކިޔާ މީހުންނާއި ހައްގުތަކަށް މަސައްކަތްކުރާ ޖަމާއަތްތަކުން ވަނީ މޯދީ އާއި އޭނާގެ ބީޖޭޕީން ހިންދޫންގެ ތާއީދު ހޯދުމަށް ކެމްޕެއިންގައި މުސްލިމުންނާ ދެކޮޅަށް ވާހަކަ ދެއްކުން ވަރަށް ބޮޑަށް އިތުރުކޮށްފައިވާ ކަމަށް ތުހުމަތުކޮށްފަ އެވެ.

މޯދީގެ އެއްވުންތަކުގައި މުސްލިމުންނަކީ "ގަދަބާރުން" އިންޑިއާއަށް ވަދެގަނެގެން އުޅޭ ބައެއްގެ ގޮތުގައި ސިފަކޮށްފައިވެ އެވެ. އަދި އިދިކޮޅު ކޮންގްރެސް ޕާޓީން ކާމިޔާބު ހޯދައިފި ނަމަ ގައުމުގެ ވަސީލަތްތައް މުސްލިމުންނަށް ބަހާނެ ކަމަށް ވެސް ވިދާޅުވި އެވެ.

އިންތިހާބުގައި މޯދީ އަށް ތިން ވަނަ ދައުރެއް ކަށަވަރު ވިޔަސް، ބީޖޭޕީގެ ފުރިހަމަ އަޣުލަބިއްޔަތު ވަނީ ގާނޫނު ހަދާ މަޖިލީހުން ގެއްލިފަ އެވެ.

"ބައި މަދު ދީންތަކަށް އަމާޒުކޮށް ނަފުރަތު އުފެއްދުމުގެ މައްސަލަތައް 2023 ވަނަ އަހަރު 668 ގައި ހުރި އިރު، 2024 ވަނަ އަހަރު އެ އަދަދު ވަނީ 1،165 އަށް އިތުރުވެފައި، މިއީ 74.4 ޕަސެންޓް އިތުރުވުމެއް،" އައިއެޗްއެލްގެ ރިޕޯޓުގައިވެ އެވެ.

މިދިޔަ އަހަރަކީ އިންޑިއާގެ އާންމު އިންތިހާބުގެ އަހަރަށް ވުމުން، ނަފްރަތު އުފެއްދުމުގެ ވާހަކަތައް ބައްޓަންވެގެން ދިޔަ ގޮތް ވެސް ބަދަލުވެފައިވާ ކަމަށް ވެސް އެ ރިޕޯޓްގައިވެ އެވެ.

ނަފްރަތު އުފެދޭ ވާހަކަތަކުގެ 98.5 ޕަސެންޓް މުސްލިމުންނަށް އަމާޒުކޮށްފައިވާ ކަމަށާއި އޭގެ ތެރެއިން ދެބައިކުޅަ އެއްބަޔަށްވުރެ ގިނަ ވާހަކަތައް ދައްކާފައިވަނީ ބީޖޭޕީ ނުވަތަ އެ ޕާޓީގެ ބައިވެރިންގެ ކޮންޓްރޯލް އޮންނަ ސްޓޭޓްތަކުގައި ކަމަށް އެ ރިޕޯޓުގައި ބުނެފައިވެ އެވެ.

ނަފްރަތު އުފެދޭ ގޮތަށް ބީޖޭޕީގެ ލީޑަރުން 450 އަށް ވުރެ ގިނަ ފަހަރު ވާހަކަ ދައްކާފައި ވާއިރު، އޭގެ ތެރެއިން 63 ތަގުރީރަކީ މޯދީގެ ތަގުރީރުތައް ކަމަށް ވެސް ރިޕޯޓުގައިވެ އެވެ.

މި ރިޕޯޓުގައި ކޮށްފައިވާ ތުހުމަތުތަކަށް ބީޖޭޕީގެ ބަހެއް ހޯދަން އޭއެފްޕީން ސުވާލުކުރުމުން ޖަވާބެއް ނުދިނެވެ. އެކަމަކު މިއީ ބީޖޭޕީން އަބަދުވެސް އިންކާރުކުރާ ތުހުމަތުތަކެކެވެ.

އިންޑިއާގައި މުސްލިމުންގެ އާބާދީ 220 މިލިއަނަށް އަރާއިރު ހިންދޫ ވަތަނީ ފިކުރުގެ ސަބަބުން މުސްލިމުން އުޅެންޖެހިފައިވަނީ ކުރިމަގާ މެދު ބިރުވެރިކަމެއްގެ ތެރޭގަ އެވެ. -- އޭއެފްޕީ