މާލީ އިސްލާހީ ފިޔަވަޅުތައް ރަނގަޅު، އެކަމަކު ތަންފީޒުކުރަން ވަގުތު ކުޑަތަން އެބަވޭ: އައިއެމްއެފް

ރާއްޖޭގެ މާލީ އަދި އިގުތިސާދީ ދަތިކަމާ ގުޅިގެން، ސަރުކާރުން އަޅަން ހުށަހަޅާފައިވާ އިސްލާހީ ފިޔަވަޅުތަކަކީ ކޮންމެހެންވެސް އަޅަންޖެހިފައިވާ ފިޔަވަޅުތަކެއް ކަމަށާއި ނަމަވެސް އެ ފިޔަވަޅުތައް ތަންފީޒު ކުރުމަށް ވަގުތު ކުޑަތަންވަމުންދާ ކަމަށް، އިންޓަނޭޝަނަލް މަނިޓަރީ ފަންޑު (އައިއެމްއެފް) އިން މިއަދު ބުނެފި އެވެ.

ރާއްޖޭގެ އިގުތިސާދީ އަދި މާލީ ހާލަތު ވަޒަން ކުރަން މި ވަގުތު އައިސް އުޅޭ އައިއެމްއެފްގެ ވަފްދުން އެއްކުރި ބައެއް މައުލޫމާތުތައް މިއަދު ވަނީ ރައްޔިތުންގެ މަޖިލީހުގެ އިގުތިސާދީ އަދި މާލިއްޔަތު ކޮމިޓީގެ ޖޮއިންޓް ކޮމިޓީއާ ހިއްސާކޮށްފަ އެވެ.

އެ ވަފްދުގައި އިސްކޮށް ހުންނެވި ޕިޔާޕޯން ސޮޑްސްރިވިބޫން ވިދާޅުވީ، ރާއްޖޭގެ ޓޫރިޒަމަށް އަހަރުން އަހަރަށް އަންނަ ކުރިއެރުމަކީ ފާހަގަކުރަންޖެހޭ ކަމެއް ކަމަށެވެ. މިދިޔަ އަހަރު ރާއްޖޭގައި ތާރީހުގައި ފުރަތަމަ ފަހަރަށް ދެ މިލިއަން ޓޫރިސްޓުން ޒިޔާރަތްކުރިކަން ފާހަގަކުރައްވައި، މި އަހަރު ވެސް ފަސް ޕަސެންޓުން ކުރިއަރާނެ ކަމަށް ލަފާކުރެއްވޭ ކަމަށް އޭނާ ވިދާޅުވި އެވެ.

މާލީ އަދި އިގުތިސާދީ ދަތިކަމުން އަރައިގަތުމަށް ސަރުކާރުން އެކުލަވާލާފައިވާ އިގުތިސާދީ އިސްލާހީ އެޖެންޑާގައި ހިމަނާފައިވާ ފިޔަވަޅުތަކަށް އައިއެމްއެފްގެ ފަރާތުން އޭނާ މަރުހަބާ ވިދާޅުވި އެވެ.

މިގޮތުން، ސަބްސިޑީ އާއި އާސަންދަ ދިނުމުގެ ނިޒާމާއި ދައުލަތް ހިންގުމުގެ ހަރަދު ކުޑަކުރުމާއި ސަރުކާރު ހިއްސާވާ ކުންފުނިތަކުގެ ހިންގުން ހަރުދަނާ ކުޑަކުރުމާ އެކު ފައިސާ ޗާޕު ކުރުން މި ސަރުކާރުން ހުއްޓައިލުމަކީ ކޮންމެހެން ކުރަންޖެހިފައިވާ ކަންކަމުގެ ގޮތުގައި ޕިޔާޕޯން ފާހަގަކުރެއްވި އެވެ.

ނަމަވެސް، ރާއްޖޭގެ ދަރަންޏާއި ފިސްކަލް ޑެފިސިޓަށް ބޭރާއި އެތެރެއިން ޕްރެޝަރު ބޮޑުވަމުންދާ ކަމަށް ވިދާޅުވެ، އޭނާ ވަނީ ސަރުކާރުން ހުށަހަޅާފައިވާ ފިޔަވަޅުތައް ތަންފީޒު ކުރަން ވަގުތު ކުޑަވަމުންދާ ކަމުގެ އިންޒާރު ދެއްވައިފަ އެވެ.

"ހަރުދަނާ ފިޔަވަޅުތައް ނާޅައިފި ނަމަ ކުރިއަށް އޮތް އަހަރުތަކުގައި ދަރަންޏާއި ފިސްކަލް ޑެފިސިޓް އިތުރަށް ބޮޑުވެގެންދާނެ. މި ކަން ކުރުމަށް ވަގުތު ވަރަށް ކުޑަތަންވެއްޖެ،" ޕިޔާޕޯން ވިދާޅުވި އެވެ.

އޭނާ ވިދާޅުވި ގޮތުގައި، މިދިޔަ އަހަރު ތަކުގައި އުމްރާނީ ތަރައްގީގެ މަޝްރޫއުތައް އިންތިހާއަށް ގިނަވުމުގެ ސަބަބުން ޑެފިސިޓަށް ނޭދެވޭ އަސަރުކުރި އެވެ.

ނަމަވެސް، މިހާރު އުމްރާނީ ތަރައްގީގެ މަޝްރޫއުތައް ވެސް ކޮންމެވެސް މިންވަރަކަށް މަޑުޖައްސާލައި، ކޮންމެހެން ބޭނުންވެފައިވާ ކަންކަމަށް އަމާޒު ކުރުމަކީ ރަނގަޅު ނިންމުމެއްގެ ގޮތުގައި އޭނާ ފާހަގަކުރެއްވި އެވެ.

އެކަމަކު، މިހާރު އުމްރާނީ ތަރައްގީގެ މަޝްރޫއުތައް ވެސް ކޮންމެވެސް މިންވަރަކަށް މަޑުޖައްސާލައި، ކޮންމެހެން ބޭނުންވެފައިވާ ކަންކަމަށް އަމާޒުކުރުމަކީ ރަނގަޅު ނިންމުމެއްގެ ގޮތުގައި އޭނާ ފާހަގަކުރެއްވި އެވެ.

"އުމްރާނީ ތަރައްގީގެ މަޝްރޫއުތަކާއި އިޖުތިމާއީ ޕްރޮގްރާމުތައް ވެސް ހިންގަންވާނީ، އެ ގައުމެއްގެ މާލީ ހާލަތަށް ރިއާއަތްކޮށް ގައުމަށާއި ރައްޔިތުންނަށް އެންމެ ބޮޑު ފައިދާއެއް ކުރާނެ ގޮތަކަށް،" ޕިޔާޕޯން ވިދާޅުވި އެވެ.

ކޮރަޕްޝަން ޕާސެޕްޝަން އިންޑެކްސް (ސީޕީއައި)ގައި ތިން ދަރަޖަ ފަހަތަށް ގޮސްފައިވާކަން ފާހަގަކުރައްވައި، އެކަމާ މެދު އައިއެމްއެފުން ދެކޭ ގޮތް ސާފުކުރަން މެމްބަރަކު ކުރެއްވި ސުވާލަކަށް ޖަވާބު ދެއްވަމުން، ޕިޔާޕޯން ވިދާޅުވީ ދައުލަތުގެ ފިސްކަލް ޒިންމާގެ ގާނޫނުތައް ތައާރަފްކުރުމުގެ ސަބަބުން ދައުލަތުގެ މާލީ ކަންކަން ބެލެހެއްޓުމުގައި ދެފުށްފެންނަ ގޮތަށް ކުރިއަށް ގެންދިޔުމަށް އިތުރު ހިތްވަރަކަށް ވާނެ ކަމަށެވެ.

މިއަދުގެ ކޮމިޓީގެ ބައްދަލަވުމުގައި، އެމްޑީޕީގެ ބައެއް މެމްބަރުން ވަނީ އިންޑިޔާއިން މިދިޔަ އަހަރުގެ ފަހުކޮޅު ނެގި 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީ އާ ގުޅޭގޮތުން ވެސް އައިއެމްއެފްގެ ވަފްދާ ސުވާލުކުރައްވައިފަ އެވެ.

އެކަމާ ގުޅިގެން ޕިޔާޕޯން ވިދާޅުވި ގޮތުގައި، އެ ފެސިލިޓީގެ ސަބަބުން ރާއްޖޭގެ ފިސްކަލް އަދި ދަރަނި މެނޭޖްކުރުމުގެ ހާލަތަށް ކޮންމެވެސް ވަރެއް ލުޔެއް ލިބޭނެ އެވެ.

އަދި ނިޒާމީ ސިފައެއްގައި ގައުމެއްގެ މާލީ ކަންކަންކަމަށް މިފަދަ ބޮޑެތި ބަދަލުތައް ގެންނައިރު، އެފަދަ ބަފަރުތަކެއް ހުރުމަކީ ވެސް މުހިންމު ކަމެއް ކަމަށް އޭނާ ވިދާޅުވި އެވެ.

ޕިޔާޕޯން ވިދާޅުވި ގޮތުގައި، ރާއްޖެއަށް ކުރިމަތިވެފައިވާ ފަދަ މާލީ ދަތިކަމުން އަރައިގަތުމުގެ އެންމެ ފުރަތަމަ ފިޔަވަޅަކީ ދަތިކަން ކުރިމަތިވެފައިވާ ކަން ގަބޫލުކޮށް، އެކަމުން އަރައިގަތުމަށް ޕްލޭނެއް އެކުލަވައިލުމެވެ.

ނަމަވެސް، އެ ޕްލޭނާ އެއްގޮތަށް ފިޔަވަޅުތައް ތަންފީޒުކުރުން އަވަސް ކުރަންޖެހޭ ކަމަށް، މިއަދުގެ ކޮމިޓީ ބައްދަލުވުމުގެ ތެރެއިން އޭނާ ވަނީ ތަކުރާރުކޮށް ވިދާޅުވެފަ އެވެ.

އަދި ކުރިއަށް ތަނުގައި ވިޔަފާރިކުރުމުގެ މާހައުލު ރަނގަޅުކޮށް، ދައުލަތް ހިންގުމުގެ ނިޒާމު ހަރުދަނާކޮށް، ހުނަރު ތަރައްގީކުރުން އިތުރުކުރުމަކީ ވެސް ހަރުދަނާ، ވަށައިޖެހޭ އަދި ދެމެހެއްޓެނެވި އިގުތިސޯދީ ކުރިއެރުމަށް އެހީތެރިވެދޭނެ މުހިންމު ފިޔަވަޅުތަކެއްގެ ގޮތުގައި އޭނާ ވަނީ ފާހަގަކުރައްވައިފަ އެވެ.

ދައުލަތުގެ ހަރަދު ކުޑަކުރުމަށް ދައުލަތުގެ ބަޖެޓުގައި ހިމަނާފައިވާ ފިޔަވަޅުތައް ނާޅައިފި ނަމަ ބަޖެޓަށް ތިން ބިލިއަން ރުފިޔާ އިތުރުވާނެ ކަމަށް ފިނޭންސް މިނިސްޓްރީން ލަފާކުރެ އެވެ. އެހެންވެ، އިސްލާހީ އެއްވެސް ފިޔަވަޅެއް ކަނޑައަޅާފައިވާ ގޮތަށް ކުރިއަށް ނުގެން ގޮސްފި ނަމަ މި އަހަރުގެ ބަޖެޓުގައިވާ 57 ބިލިއަން ރުފިޔާ، 60 ބިލިއަން ރުފިޔާއަށް އިތުރުވުމުގެ ފުރުސަތު އެބަ އޮތެވެ.