ޖެނެރޭޝަނަލް ބޭން ފާހަގަކުރުމަށް 24 ގަޑިއިރުގެ ދުވުން ފަށައިފި

ޖެނެރޭޝަނަލް ބޭންއަށް އަމަލުކުރަން ފާހަގަކުރުމަށް 24 ގަޑިއިރުގެ ދުވުން މިއަދު ފަށައިފި އެވެ.

މާލޭގެ އެކުވެނި ޓްރެކްގައި ހަވީރު 4:00 އިން ފެށިގެން މާދަމާ ހަވީރު 4:00 އާ ހަމައަށް އެ ދުވުން އެ ކުރިއަށް ގެންދާނެ އެވެ.

ދުންފަތް ކޮންޓްރޯލްކުރުމާ ބެހޭ ގާނޫނަށް މިދިޔަ މެއި މަހު ގެނައި ބަދަލުގައިވާ ގޮތުން 2007 ވަނަ އަހަރުން ފެށިގެން އުފަންވެފައިވާ މީހުންނަށް އަދި އުފަންވާނެ މީހުންނަށް ދުންފަތުގެ ބާވަތްތައް ވިއްކުން މަނާވާނެ އެވެ. އެއާ އެކު، ކޮންމެ އުމުރެއްގެ މީހަކަށް ވިއަސް އެ ފަދަ ބާވަތެއް ދެން ވިއްކޭނީ އުމުރު ކަށަވަރު ކުރުމަށް ފަހުގަ އެވެ.

ރާއްޖެ އިން ޖެނެރޭޝަނަލް ބޭން އަށް އަމަލުރަން ފެށުން ފާހަގަކުރުމުގެ ދުވުން ފެށުމުގެ ރަސްމިއްޔާތުގައި ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވީ ދުޅަހެޔޮ ސިއްހަތެއް ލިބުމަކީ އިންސާނަކަށް ލިބޭނެ އެންމެ އަގުހުރި ނިއުމަތް ކަމަށެވެ. އަދި އެ ނިއުމަތަށް ޝުކުރުވެރިވުމަކީ، އެކަމަށް އިހުމާލު ނުވެ، ރައްކާތެރިވުން ކަމަށް ނާޒިމް ވިދާޅުވި އެވެ.

"ސަލާމަތް ސިއްހަތެއްގައި ހުރުމަކީ ދިރިހުރުމާއި ދިރިއުޅުން އެކަމެއްގެ މައްޗަށް ބިނާވެގެންވާ ކަމެއްކަން އަބަދުވެސް އަޅުގަނޑުމެން ހަނދާނުގައި ބަހައްޓަންޖެހޭ،" ނާޒިމް ވިދާޅުވި އެވެ.

އޭނާ ވިދާޅުވި ގޮތުގައި، މި ސަރުކާރުގެ ސިއްހީ ދާއިރާގެ ސިޔާސަތަކީ، ދުޅަހެޔޮ ފަރުދެއް، ދުޅަހެޔޮ އާއިލާއެއް އަދި ދުޅަހެޔޮ މުޖުތަމައުއެއް ބިނާކުރުމެވެ.

ރާއްޖޭގައި ދިމާވާ ސިއްހީ ގިނަ މައްސަލަތައް ގުޅިފައިވަނީ ދިރިއުޅުމުގައި ގެންގުޅޭ، ސިއްހަތާ ބީރައްޓެހި އަދި ބޮޑެތި ބަލިތަކަށް ހުށަހެޅޭ އާދަތަކާ ކަމަށާއި އެހެންވެ، އެ ފަދަ އާދަތަކުން މުޖުތަމައު ރައްކާތެރިކޮށް އަދި ދުޅަހެޔޮ އާދަތަކަށް އާއްމުން އަހުލުވެރިކޮށް ސިއްހީ ގޮތުން ދުޅަހެޔޮކަމަށް މަގުފަހިވާނެހެން ކަންކަން ތަރުތީބު ކުރުމަކީ އެންމެ ސަމާލުކަން ދޭންޖެހޭ ކަންކަން ކަމަށް މިނިސްޓަރު ވިދާޅުވި އެވެ.

ޑަބްލިއުއެޗްއޯ އިން ރާއްޖެ ކަނޑައަޅާފައިވާ މަންދޫބު، ޕޭޑެން ވަނީ ދުންފަތުން ދިވެހިން ސަލާމަތްކުރަން ސަރުކާރުން އަޅާ ފިޔަވަޅުތަކަށް މަރުހަބާ ވިދާޅުވެފަ އެވެ. އޭގެ ތެރޭގައި ވޭޕް މަނާކުރުމާއި ދުންފަތުގެ ބާވަތްތަކުގެ ޑިއުޓީ ބޮޑުކުރުން އަދި އެ ފަދަ ތަކެތި އިސްތިހާރުކުރުން މަނާކުރުން ހިމެނެ އެވެ.

އެ ކަމަށް އެއްބާރުލުންދީ، ދުންފަތުން ސަލާމަތްވެފައިވާ ގައުމަކަށް ރާއްޖެ ހަދައި އެކަން ކާމިޔާބުކޮށްދިނުމަށް އޭނާ ވަނީ އެދިވަޑައިގެންފަ އެވެ.

މީގެ ހަތަރު އަހަރު ކުރިން އާއްމުކުރި ސްޓެޕްސް ސާވޭ ދައްކާގޮތުން، ރާއްޖޭގެ ކޮންމެ ހަތަރު މީހަކުން އެކަކު ދުންފަތުގެ އިސްތިއުމާލް ކުރެ އެވެ. ސްކޫލު އުމުރުގެ ކުދިންގެ ގާތްގަނޑަކަށް 45 ޕަސެންޓް ކުދިން ދުންފަތުގެ ކޮންމެ ވެސް ބާޥަތެއް ބޭނުން ކުރާ ކަމަށް 2019 ގައި ހެދި ގްލޯބަލް ޔޫތު ޓޮބޭކޯ ސާވޭއިން ދައްކަ އެވެ.