ހޫނުވި ޕެނަލްޓީ ޝޫޓައުޓްގައި އޭދަފުށި ބަލިކޮށް ގަން ސެމީ އަށް

ގޯލްޑަން ފުޓްސަލް ޗެލެންޖް 2025 ގެ ކުއާޓާ ފައިނަލުގައި ޕެނަލްޓީ ޝޫޓައުޓްގައި އެންމެ ފަހުގެ ޗެމްޕިއަން ބ. އޭދަފުށި ބަލިކޮށް ލ. ގަން ސެމީ ފައިނަލުން ޖާގަ ހޯދައިފި އެވެ.

ފުރިހަމަ ވަގުތު ހަމަވިއިރު ދެ ޓީމު 2-2 އިން އެއްވަރުވުމުން ޕެނަލްޓީ ޝޫޓައުޓްގައި ގަން މޮޅުވީ 4-3 އިންނެވެ. ފުރަތަމަ ހާފުގައި ނިޝާމް މުހައްމަދު ރަޝީދާއި މުއާޒް އަލީ ޖަހައިދިން ގޯލުތަކުން އޭދަފުށި ލީޑު ނަގާފައި ވަނިކޮށް ދެ ވަނަ ހާފުގައި ގަމަށް ނަތީޖާ އެއްވަރު ކޮށްދިނީ މެޗުގެ މޮޅު ކުޅުންތެރިއަކަށް ވެސް ހޮވުނު ހަސަން ފައްވާޒް ގާތްގާތުގައި ޖަހައިދިން ދެ ގޯލުންނެވެ.

މި މެޗުގައި އޭދަފުށީގެ ގޯލު ބެލެހެއްޓި އަބްދުﷲ ނާސިހުގެ ބަދަލުގައި ޕެނަލްޓީގައި ގޯލަށް އެރުވީ އައުޓްފީލްޑް ކުޅުންތެރިޔާ މުހައްމަދު އަޖުފާން އެވެ. އޭދަފުށީގެ ފުރަތަމަ ޕެނަލްޓީ މުހައްމަދު ފާސިރު ކާމިޔާބު ކޮށްފައި ވަނިކޮށް ގަމުގެ ފުރަތަމަ ޕެނަލްޓީ ފޮނުވާލީ ކެޕްޓަން އަހުމަދު ހަލީމް (އަންމަޑޭ) އެވެ. އޭނާގެ ޕެނަލްޓީ އަޖުފާން މަތަކުރި ވަގުތު ގޯލް ލައިން ހުރަސް ނުކުރާ ކަމަށް ރެފްރީ އަހުމަދު ޝިހާމް އާއި އަލީ ފާއިޒް ވަގުތުން ނިންމުމުން ގަމުގެ ބެންޗުން ދަނޑަށް އަރައި ހިތްހަމަނުޖެހުން ފާޅުކޮށް، އެއީ ގޯލެއް ކަމަށް ވަރަށް ބޮޑަށް އެޕީލް ކުރި އެވެ.

އަދި އޭގެ 10 ވަރަކަށް މިނިޓު ފަހުން ރެފްރީން އެ ނިންމުން ބަދަލު ކޮށްފައި ވަނީ ގަމުގެ އެސިސްޓެންޓް ކޯޗު އިބްރާހިމް ރަޝީދު، ޕެނަލްޓީގެ ރީޕްލޭއެއް ދެއްކުމުންނެވެ.

ރެފްރީންގެ ނިންމުން ބަދަލު ކުރުމާ އެކު އޭދަފުށީގެ އޮފިޝަލުންނާއި ކުޅުންތެރިން ވެސް ނިންމުމާ މެދު ހިތްހަމަނުޖެހުން ފާޅުކުރަން ފެށުމުން، ރެފްރީ ވަނީ ޕެނަލްޓީ ކުރިއަށް ނުގެންދެވިގެން އޭދަފުށީގެ މެނޭޖަރު ސަލްމާން ވަހީދާއި ދެ އޮފިޝަލުން ކަމަށްވާ އަލީ ޝިފާއު އާއި މުހައްމަދު ޖަޒްލާން ޖާދުﷲ އަށް ރަތް ކާޑު ދައްކައިފަ އެވެ. ފުލުހުން ދަނޑަށް އަރައި ރަތް ކާޑު ދެއްކި އޮފިޝަލުން ދަނޑުން ބާލުވައި ޕެނަލްޓީ ޝޫޓައުޓް ކުރިއަށް ގެންދިޔައީ މެދުކެނޑުނުތާ ފަންސަވީހަކަށް މިނިޓު ފަހުންނެވެ.

އޭދަފުށީގެ ހުސެއިން ޝަރީފް އާއި އަހުމަދު އަޝްރަފް ޔޫސުފްގެ ޕެނަލްޓީ ކާމިޔާބު ކުރި އިރު، އަލީ ނަސީމް ޖެހި ޕެނަލްޓީ، ގަމުގެ އަހުމަދު ހުޝާމް ވަނީ ދިފާއު ކޮށްފަ އެވެ. އަދި ހައްފާފް ސިދުގީ ޖެހި ޕެނަލްޓީ ގޯލާ އަމާޒެއް ނުވި އެވެ. ފައްވާޒް އާއި އަލީ ޝާމިސް އަދި މުހައްމަދު ރަޒާން ވަނީ ގަމުން ޖެހި ޕެނަލްޓީތައް ކާމިޔާބު ކޮށްފަ އެވެ.

މިދިޔަ އަހަރުގެ ފައިނަލް ވެސް ކުޅުނު މި ދެ ޓީމު ވަނީ މިއަހަރުގެ ޝީލްޑް މެޗުގައި ވެސް ބައްދަލު ކޮށްފަ އެވެ. އެ މެޗު 1-0 އިން ކާމިޔާބު ކުރީ ގަމެވެ. ރޭގެ މެޗުގައި އޭދަފުށީ ބަލިކޮށް މުބާރާތުގެ ސެމީ ފައިނަލުން ގަން ޖާގަ ހޯދާފައި ވާއިރު، ސެމީގައި ނުކުންނާނީ ހދ. ނައިވާދޫއާ ދެކޮޅަށެވެ.

ނައިވާދޫ ވަނީ ރޭ އދ. މަހިބަދޫއާ ވާދަކޮށް 7-4 އިން މޮޅުވެފަ އެވެ. ނައިވާދޫގެ މުހައްމަދު ޝާއިން ތިން ގޯލު ޖެހި އިރު އަހުމަދު ހަމީދު ވަނީ ދެ ގޯލު ޖަހައިފަ އެވެ. މީގެ އިތުރުން ޔޫސުފް ޝާއިފް އާއި އަބްދުﷲ ވިސާމް ވެސް ވަނީ ލަނޑެއް ޖަހައިފަ އެވެ. މަހިބަދޫގެ ލަނޑުތައް ޖަހައިދިނީ އާދަމް ފަހުމާން އާއި އާދަމް ނާއިލް އެވެ. ފަހުމާން ވަނީ ތިން ލަނޑު ޖަހައި ހެޓްރިކެއް ހަދައިފަ އެވެ.

މުބާރާތުގެ ސެމީ ފައިނަލްގެ ދެވަނަ މެޗުގައި ބައްދަލުކުރާނީ ގދ. ވާދޫ އާއި ކ. ކާށިދޫ އެވެ.

ކާށިދޫ ވަނީ ރޭ ފަހަތުން އަރައި 3-2 އިން ވިލިމާލެ ބަލިކޮށްފަ އެވެ. އަބްދުﷲ ޝައްފާން (ޝާކާ) އާއި އިސްމާއިލް ވިފާގު ވިލިމާލެއަށް ލީޑު ނަގައިދީފައި ވަނިކޮށް ކާށިދޫ މޮޅުވީ ފަހު ހާފުގައި އަޖުލާން އަބްދުލް ހަންނާން އާއި އިސްމާއިލް ރަޔާން ޖަހައިދިން ގޯލުތަކުންނެވެ. މެޗުގެ މޮޅު ކުޅުންތެރިއަކަށް ހޮވުނު އަޖުލާން ވަނީ ދެ ގޯލު ޖަހައިފަ އެވެ.

ވާދޫ މޮޅުވީ އއ. މަތިވެރިއާ ވާދަކޮށް ޕެނަލްޓީ ޖަހައިގެންނެވެ. މި މެޗުގެ ފުރިހަމަ ވަގުތު ހަމަވި އިރު 4-4 އިން އެއްވަރު ވުމުން ޕެނަލްޓީގައި ވާދޫ ކުރި ހޯދީ 4-2 އިންނެވެ.

ވާދޫގެ މުހައްމަދު ނާއިލް ދެ ގޯލު ޖެހި އިރު އަޔާޒް އަހުމަދާއި އަބްދުﷲ އާހިލް އަލީ ވެސް ވަނީ ލަނޑެއް ޖަހައިފަ އެވެ. އެއްވަރުކުރި ލަނޑު މެދު ނިމެން 42 ސިކުންތަށް ވެފައި ވަނިކޮށް ޖަހައިދިނީ އަޔާޒް އެވެ. މަތިވެރި އަށް ލަނޑުތައް ޖަހައިދިނީ މުހައްމަދު ޝަފުރާޒް އާއި ގޯލްކީޕަރު މުހައްމަދު އިމްރާން އަދި އަލީ އަލްސަން އެވެ. ޝަފުރާޒް ވަނީ ދެ ގޯލު ޖަހައިފަ އެވެ.

ޕެނަލްޓީގައި ވާދޫ އަށް ލަނޑު ޖަހައިދިނީ އާހިލް އާއި ޔަޒްދާން އިބްރާހިމް އާއި މުހައްމަދު އިޔާދު އަލީ އަދި އަހުމަދު ޝައިހާން ޖަލީލް އެވެ. މަތިވެރި އަށް ކާމިޔާބު ކުރެވުނީ އަލްސަން އާއި އަހުމަދު ފިރާޝް ފޮނުވާލި ޕެނަލްޓީ އެވެ.

ހުޅުމާލޭ ރެހެންދި ޓާފް ދަނޑުގަގައި ހުކުރު ދުވަހުގެ ރޭ ސެމީ ފައިނަލްގެ ދެ މެޗު ކުޅުމަށް ހަމަޖެހިފައި ވާއިރު، ފައިނަލް މެޗު އޮންނާނީ އަންނަ އަންގާރަ ދުވަހުގެ ރެއެވެ.