އީދަށް 36 ރަށެއް ދިއްލަން 28 މިލިއަނަށް ލައިޓު ގެންނަނީ

މިދިޔަ އަހަރުގެ ފިތުރު އީދަށް ލައިޓް ނުލިބޭ 36 ރަށަކަށް މި އަހަރު ލައިޓް ހޯދުމުގެ މަސައްކަތް ކުރަމުން އަންނަ ކަމަށާއި އެކަމަށް 28 މިލިއަނެއްހާ ރުފިޔާ ހަރަދުވާނެ ކަމަށް ސިޓީސް، ލޯކަލް ގަވަމަންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފް ވިދާޅުވެއްޖެ އެވެ.

އީދުގެ އުފާ ފާޅުކުރަން، މިދިޔަ އަހަރު ވެސް ވަނީ ސިޓީތަކާއި އަތޮޅު ވެރިކަން ކުރާ ރަށްތައް ގިޑިގެތަކާއި ކުލަބޮކިތަކުން ދިއްލާލައިފަ އެވެ. އެކަން ފެއްޓެވީ ރައީސް ޑރ. މުހައްމަދު މުއިއްޒު މާލޭގެ މޭޔަރު ކަމުގައި ހުންނެވި އިރެވެ. އެ ފަހަރު ވަނީ މާލެ އާއި ހުޅުމާލޭގެ އިތުރުން ވިލިމާލެ ވެސް ބޮކިތަކުން ޒީނަތްތެރިކޮށްފަ އެވެ.

ރައީސް އޮފީހުގައި ބޭއްވި ޕްރެސްއެއްގައި އާދަމް ޝަރީފު ވިދާޅުވީ މިއަހަރުގެ އީދަށް ވެސް ރަށްރަށް ދިއްލާލުމުގެ މަސައްކަތް ކުރަމުން އަންނަ ކަމަށެވެ. މިފަހަރު ލައިޓު ގެންނަނީ އިތުރު 36 ރަށަށް ކަމަށް އޭނާ ވިދާޅުވި އެވެ.

އެކަމަށް ކިހާ ހަރަދެއް ހިނގާތޯ ނޫސްވެރިއަކު ސުވާލުކުރުމުން އާދަމް ޝަރީފް ވަނީ 28 މިލިއަން ރުފިޔާ، އެކަމަށް ހޭދަވިޔަސް އެކަމަކީ ކުރަން ރަނގަޅު ކަމެއް ކަމަށް ވިދާޅުވެފަ އެވެ.

"ލައިޓުތަކަކީ ވެސް ކުރިއަށް އޮތް ތަނުގައި ބޭނުންކުރެވޭނެ އެއްޗެހި. މާލެއަކަށް ނުގެންނަން. ކުރިން ގެނައި ރަށްރަށަށް ނުގެންނަން. އެހެންވީމަ މިއަހަރު 36 ރަށަށް ހޭދަވާނެ ކަމަށް އެންމެ ގިނަވެގެން ވެސް ހޭދަވާނެ ކަމަށް ބެލެވެނީ 28 މިލިއަން،"

މިނިސްޓަރު ވިދާޅުވި ގޮތުގައި ރާއްޖެއަކީ ތަހުޒީބު، ރީއްޗަށް ލޯބިކުރާ ބަޔަކު އުޅޭ ތަނެކެވެ. އަދި އީދުގެ އުފާވެރިކަމާއި ހިތްހަމަޖެހުން ވަރަށް ބޮޑަށް ބޭނުންވާ ބައެއް ކަން ވެސް ފާހަގަކުރެއްވި އެވެ.

މިނިސްޓަރު ވިދާޅުވި ގޮތުގައި ރާއްޖެއަށް ގެންނަ އީދު ލައިޓުތަކަކީ އިސްލާމީ ޝިއާރު ފާޅުކުރުމާއި ތަކުބީރު އިވުން ކަހަލަ ކަންކަން ވެސް ހިމެނޭ ލައިޓުތަކެއް ކަމުން، އެކަމަކީ އިސްލާމީ ވަހުދަތު ރައްކާތެރިކުރުމަށް ރައީސް ދެއްވާ އިސްކަން ހާމަވާ ކަމެކެވެ.

"އަޅުގަނޑުމެން މި ގެންނަ އީދު ލައިޓުތަކަކީ ދެ ކަމަކަށް ފޯކަސްކުރާ ލައިޓުތަކެއް. އެއްކަމަކީ ވަރަށް ބޮޑަށް އިސްލާމީ ޝިއާރު ފާޅުކުރުމާއި ތަކުބީރު އިވުމާއި އަޅުގަނޑުމެންގެ އިސްލާމީ ވަހުދަތު ރައްކާތެރިކުރުމަށް ރައީސް ދެއްވާ އިސްކަމާއި އަހަމިއްޔަތުކަން އަދި ދިވެހިންގެ ތެރޭގައި އެ ލޯތްބާއި އިހުތިމާރު އޮތް ކަން ފާހަގަވާ ކަމެއް،" މިނިސްޓަރު ވިދާޅުވި އެވެ.

މިނިސްޓަރު ވިދާޅުވި ގޮތުގައި މި ލައިޓުތައް، އެންމެ ފުރަތަމަ މާލެއަށް ތައާރަފު ކުރުމާ އެކު އެހެން ރަށްރަށުން ވެސް ވަނީ ލައިޓު ހޯދަން ބޭނުންވެގެން އެދިފަ އެވެ.

"އެއާ އެކު ދިވެހިންނަކީ ވަރަށް ބޮޑަށް އީދު ފާހަގަކުރާ ބަޔަކަށް ވުމުން، މިކަން މާލޭގައި ތައާރަފުކުރުމުން ޑިމާންޑު ވަރަށް ބޮޑުވި. އެކަން ތައާރަފުކުރުމުން މިދިޔަ އަހަރު ރަށްތަކުން ވެސް ރިކުއެސްޓް ކުރި އިތުރަށް ލައިޓު ބޭނުންވާތީ،"

އާޑަމް ޝަރީފް ވިދާޅުވީ މިއީ ހަމައެކަނި އީދުގެ ތިން ދުވަހު ދިއްލުމަށް ގެންނަ ލައިޓުތަކެއް ނޫން ކަމަށެވެ. ބައެއް ރަށްތަކުން ވަނީ އީދުގެ އިތުރުން ވެސް ޖުލައި 26 އާއި ގައުމީ ދުވަސް ފަދަ ހާއްސަ ދުވަސްތަކުގައި ވެސް މި ލައިޓުތަކުގެ އެކި ބައިތައް ބޭނުންކޮށްގެން ރަށް ދިއްލާލާފައި ކަމަށް ވިދާޅުވި އެވެ.

މިފަހަރު ލައިޓު ގެންނަނީ ކުރިން ލައިޓު ނުލިބޭ އިތުރު 36 ރަށަށެވެ. މިއީ ރައްޔިތުންގެ ހިތްހަމަޖެހުމަށް ކުރަންޖެހޭ ހަރަދެއް ކަމަށް ވެސް އޭނާ ވިދާޅުވި އެވެ.

"އަޅުގަނޑު ގަބޫލުކުރަނީ ރައްޔިތުންގެ ހިތްހަމަޖެހުމަށް މިކުރާ ހޭދައަކީ އޭގެ ޒާތުގައި ވަރަށް މުހިއްމު ކަމެއް ކަމަށް،" އެ ޕްރެސްގައި އޭނާ ވިދާޅުވި އެވެ.