ސްޓެލްކޯ އެޕް ޑައުންވީ ޑީޑޮސް ހަމަލާތަކެއް އަމާޒުވުމުން، މައްސަލަ ހައްލުކޮށްފި

ޑީޑޮސް ހަމަލާތަކެއްގެ ސަބަބުން ސްޓެލްކޯގެ ޕޯޓަލް ޑައުންވި ނަމަވެސް އެ މައްސަލަ ހައްލުކޮށްފައިވާ ކަމަށް އެ ކުންފުނިން ބުނެފި އެވެ.

ކުރިއަށް އޮތް ރޯދަމަހަށް ސަރުކާރުން ދޫކުރާ މަސްދަޅުތައް މާލެ ސަރަހައްދުގައި ބެހުމަށް ބޭނުން ކުރެވޭނެ "ރޯދަ ހަދިޔާ ޕޯޓަލް" ހެދީ މިއަދު އިރުއޮއްސި 6:00ގަ އެވެ. މާ ގިނައިރުތަކެއް ނުވެ, އެ ޕޯޓަލްގައި ބޭނުން ކުރަން ޖެހޭ ސްޓެލްކޯގެ އެޕް ވަނީ ޑައުންވެފަ އެވެ.

ސްޓެލްކޯއިން ބުނީ މަސްދަޅު ބެހުމުގެ ޕްރޮގްރާމަށް އޮންލައިން ޓޯކަން ދޫކުރަން ފެށި ވަގުތާ ދިމާކޮށް، އެ ކުންފުނީގެ މޯބައިލް އެޕްލިކޭޝަނަށް ޑީޑޮސް ހަމަލާއެއް އަމާޒުވެފައިވާ ކަމަށެޗެ.

"އެ ހަމަލާގެ ސަބަބުން ކުޑަ ވަގުތުކޮޅަކަށް އެޕްލިކޭޝަންގެ ހިދުމަތް މެދުކެނޑުނު ނަމަވެސް، މިހާރު އެ ހަމަލާތައް ކާމިޔާބުކަމާއެކު ހުއްޓުވައި، އެޕްލިކޭޝަންގެ ހިދުމަތް އަލުން ފޯރުކޮށްދޭން ފެށިފައި. މިކަމާ ގުޅިގެން ކަސްޓަމަރުންނަށް ދިމާވި ދަތިތަކަށް މައާފަށް އެދެން،" ސްޓެލްކޯއިން ބުންޏެވެ.

މަސްދަޅު ބެހުމަށް ޕޯޓަލް ހެދީ މިދިޔަ ބުރާސްފަތި ދުވަހުގެ ރޭ އެވެ.

އެއީ މާލެ އާއި ވިލިމާލެ އަދި ހުޅުމާލޭގައި މަސްދަޅު ބަހަން ފެށުމުން ގިނަ ބަޔަކު އެއްވެ ބޮޑު ކިއޫއެއްގައި ގިނަ ބަޔަކު ތިބެން ޖެހުމުގެ ޝަކުވާ އާއި ހިތްހަމަނުޖެހުން ވަރަށް ބޮޑުވުމުން އެކަން ފަސޭހަ ކޮށްދިނުމަށެވެ.

މަސްދަޅު ދޫކުރާ ތަންތަނާއި ޓޯކަންގެ އަދަދު:

1- މިފްކޯ މައި އިމާރާތް- 200 ޓޯކަން

2- އެމްޓީސީސީ ސޯމިލް- 200 ޓޯކަން

3- ހެންވޭރު ދަނޑު- 100 ޓޯކަން

4- ގަލޮޅު ދަނޑު (ސެޓަޕް 1) 50 ޓޯކަން

5- ގަލޮޅު ދަނޑު (ސެޓަޕް 2) 50 ޓޯކަން

6- ގަލޮޅު ދަނޑު (ސެޓަޕް 3) 50 ޓޯކަން

7- ގަލޮޅު ދަނޑު (ސެޓަޕް 4) 50 ޓޯކަން

8- ސޯޝަލް ސެންޓަރު- 100 ޓޯކަން

9- ވިލިމާލެ، ވެމްކޯ ސައިޓް- 100 ޓޯކަން

10- ހުޅުމާލެ، އުމަރު ޒާހިރު ބިލްޑިންގް- 100 ޓޯކަން

11- ހުޅުމާލެ، ޕޮލްކޯ ޓަވަރު (ސީ ބްލޮކް) 100 ޓޯކަން

12- ހުޅުމާލެ ހިޔާ ޓަވަރު 10- 100 ޓޯކަން

13- ހުޅުމާލެ، ކާމިލް ދީދީ ޕްރީ ސްކޫލް- 100 ޓޯކަން

މިއީ ހޫނުގަދަ މޫސުމަކަށް ވާތީ ސަރުކާރުން ނިންމީ ރޭގަނޑު މަސްދަޅުތައް ބެހުމަށެވެ. އެއީ މި މަހުގެ ނިޔަލަށް ކޮންމެ ދުވަހެއްގެ ރޭގަނޑު 8 އިން އެ ރެއްގެ 12 ޖަހަންދެންނެވެ.

ސަރުކާރުން ބުނިގޮތުގައި މަސްދަޅު ކޭސްތައް ބަލައި ދާއިރު އެއް މަހުގެ ކަރަންޓު ބިލާައި އައިޑީ ކާޑު ގެންދަން ޖެހޭނެ އެވެ. އެކަކަށް ގިނަ ވެގެން ދޫކުރާނީ ތިން މީޓަރަށް ތިން މަސްދަޅު ކޭސް ކަމަށް ލޯކަލް ގަވަމެންޓް މިނިސްޓްރީން ބުުންޏެވެ.

ހުރިހާ ގެއަކަށް މަސްދަޅު ދޫކުރެވެންދެން މަސްދަޅު ދޫކުރުން ކުރިއަށް ގެންދާނެ ކަމަށް ވެސް މިނިސްޓްރީން ވަނީ ބުނެފަ އެވެ.