ބެންޗާ ކުޅެނީ ސަރުކާރުން ބޭނުންވާ ކަންތައްތަކެއް ނުވެގެން: ނާޒިލް

ސުޕްރީމް ކޯޓުގެ ބެންޗުގެ އަދަދު މަދުކުރަން މަސައްކަތް ކުރަނީ ސަރުކާރުން މި ވަގުތު ބޭނުންވާ ކަންތައްތަކެއް ކޯޓުގެ ތެރެއިން ނުކުރެވިގެން ކަމަށް ހިތަދޫ ދެކުނު ދާއިރާގެ އެމްޑީޕީގެ މެންބަރު އަދި މަޖިލީހުގެ މައިނޯރިޓީ ލީޑަރު އިބްރާހިމް ނާޒިލް މިއަދު ވިދާޅުވެއްޖެ އެވެ.

ފަނޑިޔާރުންގެ ބެންޗު ހަތަކުން ފަހަކަށް މަދު ކުރަން ހޮޅުދޫ ދާއިރާގެ މެންބަރު އަބްދުއްސައްތާރު މުހައްމަދު ހުށަހަޅުއްވާފައިވާ ބިލަށް ބަހުސް ކުރައްވަމުން ނާޒިލް ވިދާޅުވީ، ޝަރުއީ ދާއިރާ އަށް ސަރުކާރުތަކުގެ އިތުބާރު ގެއްލެނީ އެބަޔަކު ބޭނުންވާ ހިނދެއްގައި އެ ބޭނުންވާ ކަމެއް ނުކުރެވުމުން ކަމަށެވެ.

"މިއަދު މި އޮތީ އެ އިތުބާރު ގެއްލިފައި. އެއީ ސަރުކާރުން މި ވަގުތު ބޭނުންވާ ކަންތައްތަކެއް ކޯޓު ތެރެއިން ނުކުރެވުނީމަ އިތުބާރު ގެއްލުނީ. އިތުބާރު ގެއްލުނީމަ ކޯޓުތައް ސައިޒް ކޮށްލަންވީ މިއަދު މިއީ އެ ދުވަސް،" ނާޒިލް ވިދާޅުވި އެވެ.

"މި މަޖިލިސް މެންބަރުން ލައްވާ މިގޮތަށް މިކަން ކުރުވުމަކީ މެންބަރުންގެ ބޮލުގައި އެއިރަކު އޮންނަ ސަރުކާރަކުން އަބަދުވެސް އަޅުވާ ބޮޑު ސިންގާ ކަމެއް."

ނާޒިމް ވިދާޅުވީ ސަރުކާރުން ބޭނުންވާ ކޮންމެ ފަހަރަކު ކޯޓުތަކާ ކުޅެން ފުރުސަތު ދިނުމަކީ މަޖިލިސް މެންބަރުން ކުރަން ހެޔޮވާވަރުގެ ކަމެއް ނޫން ކަމަށާއި އެކަމުގައި ބަދުނާމާއި އިލްޒާމް އެޅެނީ އަބަދުވެސް މެންބަރުންގެ ބޮލުގައި ކަމަށެވެ. އެ ޖަރީމާގެ ޒިންމާވާން ޖެހެނީ މަޖިލިސް މެންބަރުން ކަމަށް އޭނާ ވިދާޅުވި އެވެ.

އެމްޑީޕީއަށް ނިސްބަތްވާ އެހެން ގިނަ މެންބަރުން ވެސް ވަނީ މި ބަހުސްގައި ބައިވެރިވެ، ސުޕްރީމް ކޯޓުގެ ބެންޗު ބަދަލުކުރުމާ ދެކޮޅު ހައްދަވައިފަ އެވެ. މެންބަރުން ވިދާޅުވާ ގޮތުގައި މަޖިލިސް މެންބަރުންނާ ގުޅޭ މައްސަލައެއް ސުޕްރީމް ކޯޓުން ބަލަމުންދަނިކޮށް ބެންޗު ބަދަލުކުރުން ވާނީ ސީދާ ނުފޫޒު ފޯރުވުމަށެވެ.

މި ބިލާ މެދު ޕީއެންސީގެ ތެރޭގައި ހިޔާލު ވަނީ ތަފާތުވެފަ އެވެ. އެ ބިލާ ގުޅޭ ގޮތުން އިއްޔެ ބޭއްވި ޕީއެންސީ ޕީޖީ ބައްދަލުވުމުގައި ބައިވެރިވެވަޑައިގެންނެވި ސާޅީހަކަށް މެމްބަރުންގެ ތެރެއިން މަދު ބޭފުޅުންތަކެއް ހިޔާލު ތަފާތުވި ކަމަށް ވެ އެވެ. އެ ބޭފުޅުންގެ ކަންބޮޑުވުމަކަށްވީ މުހިންމު މައްސަލައެއްގެ ޝަރީއަތް ކުރިއަށް ދަނިކޮށް އެފަދަ ބަދަލެއް ގެނައުމެވެ.

ނަމަވެސް. މިއަދުގެ ބަހުސްގައި ބައިވެރިވި ޕީއެންސީގެ މަދު މެންބަރުން ވަނީ ބިލަށް ތާއިދު ކުރައްވާ ވާހަކަ ދައްކަވައިފަ އެވެ. އެ ބޭފުޅުން ވިދާޅުވި ގޮތުގައި މި އިސްލާހު މަޖިލީހުން ފާސްކުރާނެ އެވެ.

ޕީއެންސީގެ ޕީޖީ ގްރޫޕްގެ ލީޑަރު އިބްރާހިމް ފަލާހު ވަނީ ބިލަށް ތާއީދު ކުރައްވައި، މަޖިލީހުގައި ބަހުސް ކުރުމަށް މެންބަރުންނަށް އަންގަވައިފަ އެވެ. ޕީޖީ ގުރޫޕްގެ ވަޓްސްއެޕް ގުރޫޕަށް ފަލާހު ރޭ ފޮނުއްވި މެސެޖުގައި ވިދާޅުވެފައިވާ ގޮތުގައި ސައްތާރުގެ ބިލަށް ތާއިދު ކުރަން އެ ޕާޓީގެ ލީޑަޝިޕުން ވަނީ ނިންމައިފަ އެވެ.

ކޯޓުތަކުގެ ގާނޫނަށް މެންބަރު ސައްތާރު އިސްލާހު ހުށަހަޅުއްވާފައިވަނީ ފަނޑިޔާރުންގެ އަދަދު ފަހަކަށް ތިރިކޮށް، ބިލް ފާސްކުރާތާ ހަތް ދުވަސް ތެރޭ، ފަނޑިޔާރު ކަމަށް ގާބިލް ނޫން ދެ ބޭފުޅުން މަގާމުން ވަކިކުރުމުގެ ހުރިހާ ކަމެއް ނިންމުމަށެވެ.

ސަރުކާރުގެ ތާއީދާ އެކު ސުޕްރީމް ކޯޓުގެ ފަނޑިޔާރުންގެ ބެންޗަށް ގެންނަ މި ބަދަލު ވާހަކަ ފެށުނީ މަޖިލީހުގެ މެންބަރުންގެ ގޮނޑި ގެއްލޭ އިސްލާހު ބާތިލް ކުރަން ފުލް ބެންޗުން މައްސަލައެއް ބަލަމުން ދަނިކޮށެވެ. ދައުލަތުން އެ ބެންޗުގައި އެދުނީ ގާނޫނުއަސާސީ އަށް ގެނައި އިސްލާހުގެ މައްސަލަ ނުބެލޭނެ ކަމަށް ނިންމުމަށެވެ. ނަމަވެސް ފަނޑިޔާރުންގެ ނިންމާފައިވަނީ އެ މައްސަލައިގެ ޝަރީއަތް ކުރިއަށް ގެންދިއުމަށެވެ.