ރޯދަ މަހު ދިރިއުޅުމަށް ގެންނަ ހެޔޮ ބަދަލުގައި ދެމިތިބުމަށް ރައީސްގެ އިލްތިމާސެއް

މާދަމާ ފެށޭ ރޯދަ މަހު އުޅުމާއި ގުޅުންތަކަށް ގެންނަ ހެޔޮ ބަދަލުތަކުގައި އަބަދުވެސް ދެމިތިބުމަށް ރައީސް ޑރ. މުހައްމަދު މުއިއްޒު މިރޭ އިލްތިމާސް ކުރައްވައިފި އެވެ.

ރޯދަ މަހުގެ ތަހުނިޔާއާއި ހެޔޮ އެދުންތައް އަރިސްކުރައްވައި، ރައީސް ފޮނުއްވި ތަހުނިޔާގެ ހިތޯބުގައި ރައީސް ވިދާޅުވީ ގުރުއާން ބާވާލައްވައި، ލައިލަތުލްގަދުރީގެ މަތިވެރި ރޭ ލެއްވެވި ރޯދަ މަހަކީ ނިއުމަތާއި ރަހްމަތުގެ މަހެއް ކަމަށެވެ.

ރޯދަ މަހު ހިފާ ރޯދަ އާއި އަޅުކަމަށް ދޭ ސަމާލު ކަމާއި އެހެން މީހުންނަށް ދޭ އެހީތެރިކަމާއި ކެތްތެރިކަމާއި އިހްސާންތެރިކަމުގައި ދެމިތިބުމަކީ ޖިސްމަށާއި ރޫހަށް ލިބޭ އަގުހުރި ތަރުބިއްޔަތަކަށް ހެދުމަށް ވެސް ރައީސް އެދިވަޑައިގެންނެވި އެވެ.

"ދުންފަތުގެ އިސްތިޢުމާލުކުރުން ފަދަ އަމިއްލަ ނަފުސަށް ގެއްލުންހުރި، ނުކިއްސަރު އާދަތަކާ ދުރުހެލިވުމުގެ ފުރަތަމަ ފިޔަވަޅު މި މަހު އެޅުމަށް ބާރު އަޅުއްވައި، ދޮގާއި ފިތުނަ ފަތުރަން މަސައްކަތްކުރާ ކޮންމެ ބަޔަކާ ދުރުހެލިވެ، ހުލްގު ހެޔޮ އިންސާނެއްގެ ގޮތުގައި ކާމިޔާބު ހަޔާތެއް އުޅުމުގެ އަޒުމު ކަނޑައަޅާ،" ރައީސް އިލްތިމާސް ކުރެއްވި އެވެ.

މީގެ އިތުރުން ކޮންމެ ދިވެއްސަކު އާއިލާ ދެކެ ލޯބިވުމަށާއި އަވަށްޓެރީންނަށް ކަމޭހިތުމަށާއި ރަހްމަތްތެރިކަމުގެ ހައްގު އަދާކުރާ އިހްސާންތެރިއަކަށްވުމުގެ މޮޓޯގައި ރޯދަ މަހުން ފެށިގެން ދެ ތިބުމަށް ވެސް ރައީސް އިލްތިމާސް ކުރެއްވި އެވެ.

ރައީސް ވިދާޅުވީ ކޮންމެ ރޯދަ މަހެއްގައި ވެސް ޔަގީންކުރަންވީ އެއް ކަމަކީ ދިވެހީންގެ ސަލާމަތާއި ކާމިޔާބު ގުޅިފައިވަނީ މާތްވެގެންވާ އިސްލާމް ދީނުގައި ދެމިތިބުމުން ކަން ކަމަށެވެ.