4،000 ފްލެޓު ލިިސްޓުގައި ނެތް ބަޔަކަށް ފްލެޓު ދޭން އުޅޭ ކަމަށް އެމްޑީޕީން ތުހުމަތުކޮށްފި

ކުރީގެ ސަރުކާރުން ހިންގި ގެދޮރުވެރިޔާ ސްކީމްގެ ދަށުން ފުރަތަމަ ނިންމާ 4،000 ފްލެޓު ލިބޭ މީހުންގެ ލިސްޓު ރިވިއުކޮށް، މި ސަރުކާރުން އާންމު ކުރި ލިސްޓުގައި ކުރީ ލިސްޓުގައި ނުހިމެނޭ ބަޔަކު ހިމަނާފައިވާ ކަމަށް އިދިކޮޅު އެމްޑީޕީން މިއަދު ތުހުމަތުކޮށްފި އެވެ.

ގެދޮރުވެރިޔާ ސްކީމުގެ ދަށުން ހުޅުމާލޭގައި އިމާރާތް ކުރަމުން އަންނަ 4،000 ފްލެޓް ލިބޭ ކަމަށް ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އިއުލާންކުރި ލިސްޓް ރިވިއުކޮށް، އޭގެ ތެރެއިން ޝަރުތު ހަމަވެ، ފްލެޓް ލިބޭ މީހުންގެ ލިސްޓެއް މި ސަރުކާރުން އާންމުކުރީ މިދިޔަ މަހުގެ 27 ގަ އެވެ.

ކުރީގެ ސަރުކާރުގެ 4،000 މީހުންގެ ލިސްޓުގެ ތެރެއިން މި ސަރުކާރުން ރިވިއު ކުރި ލިސްޓުގައި ފްލެޓް ލިބޭ ކަމަށް ކަނޑައަޅާފައި ވަނީ 1،820 މީހަކަށެވެ. އޭގެ ތެރޭގައި ތިން ކޮޓަރީގެ ފްލެޓް ލިބޭ ކަމަށް ޝަރުތު ހަމަވަނީ 1،423 މީހެކެވެ. އަދި ދެ ކޮޓަރީގެ ފްލެޓަށް ޝަރުތު ހަމަވަނީ 397 މީހެކެވެ.

ފްލެޓު ލިސްޓުގެ މައްސަލަތަކުގެ ކަންބޮޑުވުންތަކާ ގުޅިގެން އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި އެ ޕާޓީގެ ޗެއާޕާސަންގެ ނައިބު އިބްރާހިމް ވަހީދު (އިބްރޭ) ވިދާޅުވީ، މި ސަރުކާރުން ރިވިއުކުރީ 4،000 ފްލެޓު ލިބުނު މީހުން އެކަނި ކަމަށް ބުންޏަސް އޭގައި ނުހިމެނޭ 577 މީހަކު ލިސްޓުގައި ހިމަނާފައިވާ ކަމަށެވެ.

"އަޅުގަނޑުމެން [އާންމުކުރި] 4،000 ފްލެޓު ލިބޭ ލިސްޓުގައި ނުހިމެނޭ 577 މީހެއްގެ މައުލޫމާތު ރިވިއުކޮށްފައި އެ މީހުންނަށް ފްލެޓު ދޭނެ ކަމަށް ޑރ. މުއްތަލިބްގެ [މިހާރުގެ ހައުސިން މިނިސްޓަރު] ލިސްޓުގައި އެބައޮތް އިއުލާނުކޮށްފައި،" އިބްރޭ ވިދާޅުވި އެވެ.

އިބްރޭ ވިދާޅުވީ، މީގެ ތެރެއިން 56 މީހެއްގެ މާކްސް އާ ކުޅެ، ލިބިފައިވާ މާކްސްގެ އަދަދު މަތިކޮށްފައިވާ ކަމަށެވެ.

ނަމަވެސް ހައުސިން މިނިސްޓްރީން ބުނީ، ވެރިފައި ކުރީ ތިން ކޮޓަރި ބޭނުންވެގެން ހުށަހަޅެޅި މީހުންގެ ތެރެއިން ތެރެއިން 75 ޕޮއިންޓް ލިބިފައިވާ މީހުންނާއި ދެ ކޮޓަރިއަށް އެޕްލައި ކުރި މީހުންގެ ތެރެއިން 73 ޕޮއިންޓް ލިބިފައިވާ މީހުން ކަމަށެވެ. އަދި 75 ޕޮއިންޓުން ގުރުއަތަށް ދާން ކަނޑައަޅައި އާންމުކޮށް އިޢުލާން ކޮށްފައިވާއިރު، ވެރިފިކޭޝަންގައި އެ މީހުން ހިމެނުމަކީ އެންމެ އިންސާފުވެރި ގޮތަށް ވާތީ އެކަން އެހެން އެގޮތަށް ކުރީ ކަމަށް އެ މިނިސްޓްރީން ބުންޏެވެ.

ހައުސިން މިނިސްޓްރީން ބުނިގޮތުގައި ތިން ކޮޓަރީ ފްލެޓަށް އެދި ހުށަހެޅި މީހުންގެ ތެރެއިން 75 ޕޮއިންޓަށް ވުރެ ދަށްކޮށް މާކްސް ލިބުނު އެއްވެސް މީހެއްގެ ފޯމު ބަލާފައި ނުވާނެ އެވެ.

އެމްޑީޕީގެ ވެރިކަމުގައި ހައުސިންގެ ސްޓޭޓް މިނިސްޓަރުކަން ކުރެއްވި އަދި ފްލެޓު ކޮމިޓީގައި އެންމެ އިސްކޮށް ހަރަކާތްތެރި އަކްރަމް ކަމާލުއްދީން ވިދާޅުވީ މި ސަރުކާރުން ލިސްޓު އެކުލަވާލާފައިވަނީ ބޭނުންވާ ބަޔަކަށް ފްލެޓު ދިނުމުގެ މަގުސަދުގައި ކަމަށެވެ.

ހައުސިން މިނިސްޓްރީން ކުރިން ބުނެފައި ވަނީ، ފްލެޓް ލިބިފައިވާ އެއްވެސް މީހަކަށް ކަޑައަޅާފައިވާ ފްލެޓް އެހެން މީހަކަށް ހަމަޖައްސާފައި ނުވާނެ ކަމަށެވެ.

މިއީ ސީދާ ގިނަ ބައެއްގެ ހައްގުތަކަށް އަރައިގަތުން ގޮތުން ގޮތުގައި އަކްރަމް ވަނީ ސިފަ ކޮށްފަ އެވެ. އަދި ހައްގު ގެއްލުނު މީހުންގެ ހައްގުގައި އެމްޑީޕީން ނިކުންނަން ޖެހިފައިވާ ކަމަށް އޭނާ ވިދާޅުވި އެވެ.

އެމްޑީޕީން ފްލެޓް ލިސްޓާ ގުޅޭ ޝަކުވާތައް އެ ޕާޓީ އަށް ހުށަހެޅުމުގެ ފުރުސަތު ވެސް މާދަމާ ރެއިން ފެށިގެން ހުޅުވާލައިފަ އެވެ.

"މާދަމާ ރެއިން ފެށިގެން ކޮންމެ ރެއެއްގެ 9:15 އިން ފެށިގެން 11:30 އަށް ޗާންދަނީ މަގުގައި ހުންނަ ދަނޑިކޮށީ ހަރުގެއަށް ވަޑައިގެން ވެސް ޝަކުވާ ހުށަހެޅުމުގެ ފުރުސަތު އޮންނާނެ،" އެ ޕާޓީން ބުންޏެވެ.

މި ސަރުކާރުން އާންމުކުރި ފްލެޓު ލިސްޓަށް ޝަކުވާ ހުށަހެޅުމުގެ ފުރުސަތު އޮތީ އެއް މަސް ދުވަހަށް ހުޅުވާލައިފަ އެވެ. ރިވިއު ކުރި ލިސްޓުގައި ވަނީ 424 މީހެއްގެ ޕޮއިންޓުތަކަށް އައި ބަދަލާ އެކު ފްލެޓް ލިބޭ މީހުންގެ ލިސްޓުން އެ މީހުން އުނިކޮށްފައިވެ އެވެ. އަދިި ފްލެޓަށް އެދުނު މީހުން ޝަރުތު ހަމަނުވާ ސަބަބުތައް ވެސް މި ލިސްޓުގައި ހިމަނާފައިވެ އެވެ.