ރޯގާ އުޅޭތީ އެމްއާރު ވެކްސިން ކެމްޕެއިން މެދުކަނޑާލައިފި

ހުމާއި އަރިދަފުސް ރޯގާ އާންމުވުމާ ގުޅިގެން، އެމްއާރު ވެކްސިން ކެމްޕެއިން ވަގުތީ ގޮތުން މެދުކަނޑާލައިފި އެވެ.

ރޯގާ ޖެހުނު ބައެއް މީހުން އެޗް1އެން1 އަށް ވެސް ޕޮޒިޓިވް ވެފައި ވާއިރު ބަލި މީހުން ގިނަވެ ހޮސްޕިޓަލްތަކަށް ވަނީ ބާރު ބޮޑުވެފަ އެވެ.

ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން ރޭ ނެރުނު ނޫސްބަޔާނެއްގައި ބުނީ މިފަދަ ބަލިތަކަކީ ވަރަށް ފަސޭހައިން ގައިން ގަޔަށް އަރާ ބަލިތަކަށް ވުމުން، މީހުން އެއްވެ އުޅުން މަދުކުރުމަށްޓަކައި އިއްޔެއިން ފެށިގެން އެމްއާރް ވެކްސިން ކެމްޕެއިން މެދުކަނޑާލާފައިވާ ކަމަށެވެ.

ހިމަބިއްސާއި ރުބެއްލާއިން ރައްކާތެރިވުމަށް ދޭ އެމްއާރް ވެކްސިން ކެމްޕެއިން އަލުން ފަށާނީ ރޯގާ ކޮންޓްރޯލްވާ މިންވަރަށް ބެލުމަށް ފަހު ކަމަށް އެޗްޕީއޭ އިން ބުންޏެވެ.

މިހާރު އުޅޭ ރޯގާ ފެތުރެން ފެށީ އެމްއާރު ވެކްސިންގެ ސަބަބުން ކަމަށް ބުނާ ވާހަކަ ދޮގުކޮށް، އެޗްޕީއޭ އިން ހޯމަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި، އޭޑީކޭގެ ޗީފް މެޑިކަލް އޮފިސަރު ޑރ. އަބްދުﷲ ނިޔާފު ވިދާޅުވީ އެމްއާރު ވެކްސިނާއި މިހާރު ފެތުރިގެން އުޅޭ ރޯގާއާ އެއްވެސް ގުޅުމެއް ނެތް ކަމަށެވެ.

ދެކުނު އިރުމަތީ އޭޝިއާގެ 11 ގައުމަކުން 2020 ވަނަ އަަހަރު އަންނައިރު، ހިމަބިހި ނައްތާލަން ދުނިޔޭގެ ސިއްހަރު ޖަމިއްޔާ އިން ވަނީ އަމާޒު ހިފައިފަ އެވެ. ރާއްޖޭގައި އެމްއާރް ވެކްސިން ކެމްޕެއިން ފެށީ މި ލަނޑުދަނޑި ހާސިލްކުރުމަށެވެ.