ކުދިންނަށް ބުރަ ނުވާނެ ގޮތަކަށް އިތުރު ހަރަކާތްތައް ހިންގަން މިނިސްޓަރު އެދިވަޑައިގެންފި

ސްކޫލުތަކުގައި އިތުރު ހަރަކާތްތައް ބާއްވާއިރު، ކުދިންގެ ކިޔެވުމަށް ބުރޫނާރާނެ ގޮތަށް އެ ކަން ކުރުމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިއަދު އިލްތިމާސް ކުރައްވައިފި އެވެ.

މިނިސްޓަރު އެގޮތަށް އިލްތިމާސް ކުރެއްވީ، ސްކޫލްތަކުގައި އިތުރު ހަރަކާތްތައް އިންތިޒާމު ކުރާނެ ގޮތާ ގުޅޭގޮތުން މަޝްވަރާ ކުރުމަށް ތައުލީމީ ދާއިރާގެ މީހުންނާއި އަމިއްލަ ޖަމިއްޔާ އަދި ޖަމާއަތްތަކާ އެކު މިއަދު ފެށި ބައްދަލުވުމެއްގައި ވާހަކަ ދައްކަވަމުންނެވެ.

އެ ބައްދަލުވުން ޝަރަފުވެރި ކޮށްދެއްވަމުން އިސްމާއިލް ވިދާޅުވީ، ކުދިންނަށް ހިންގާ އިތުރު ހަރަކާތްތައް އިންތިޒާމް ކުރާ ގޮތަކުން އޭގެ ނޭދެވޭ އަސަރު ކުދިންގެ ކިޔެވުމަށް ކުރާ ކަމަށެވެ.

"އަޅުގަނޑުމެން ބަލައިލިން ދެ އަހަރެއްގެ އެކްޓިވިޓީ ކަލަންޑަރަށް، 2019 ވަނަ އަހަރު 200 އިތުރު ހަރަކާތްތަ ދަރިވަރުންނަށް ކުރިއަށް ގެންދިޔަ. އެ އޯވާލޯޑަށް ކޮންމެވެސް ވަރެއްގެ ލުޔެއް ހޯދައިދިނުމަށް މިދިޔަ އަހަރު އަޅުގަނޑުމެން ވާނީ އެ އަދަދު 111 އަށް ދަށް ކޮށްފައި،" ޕްރެޒެންޓޭޝަނެއް ހުށަހަޅުއްވަމުން މިނިސްޓަރު ވިދާޅުވި އެވެ.

އެހެންވެ، ކުދިންގެ ކިޔެވުމަށް ބުރޫ ނާރާނެ ގޮތަކަށް އިތުރު ހަރަކާތްތައް ރޭވުމަށް މަޝްވަރާކޮށް، ރަނގަޅު ހައްލެއް ގެނެވޭނެ ގޮތަށް އިންތިޒާމުތައް ހަމަޖައްސައި ދިނުމަށް މިނިސްޓަރު އެދިވަޑައިގަތެވެ.

"އަޅުގަނޑު ތިބޭފުޅުންގެ ޑިސްކަޝަނަށް 3-4 ކަމެއް ހުށަހަޅާލަން ބޭނުން. ދަރިވަރުންގެ ލާނިން އަށް ފަހިވާންޖެހޭނެ ކަމަށް. ޓީޗަރުންނާއި ދަރިވަރުންގެ ވެލްބީން އަށް ކޮންސިޑާ ކުރެވެން ވާނެ ކަމަށް. ޕޭރަންޓް މޮނިއުނިޓީ ޕާޓިސިޕޭޓް ވާއިރު އެ ޕާޓިސިޕޭޝަނަކީ ވެސް އެ ބޭފުޅުންނަށް ވޭނަކަށް ނޯންނަ މިންވަރަކަށް މިކަން ވާން ޖެހޭނެ ކަމަށް. އަދި ރާއްޖޭގެ މި ޖިއޮގްރަފިކަލް ޑިސްޕާޝަން ކޮންސިޑާ ކުރަން ޖެހޭނެ ކަމަށް އަޅުގަނޑު ގަބޫލު ކުރަން މިކަހަލަ ކަންކަން ރޭވިގެންދާއިރު،" އިތުރު ހަރަކާތްތައް ރާވާއިރު، ވިސްނަން ޖެހޭނެ ކަންކަން ފާހަގަކުރައްވަމުން އިސްމާއިލް ވިދާޅުވި އެވެ.

ސްކޫލްތަކުގައި އިތުރު ހަރަކާތްތައް އިންތިޒާމު ކުރާނެ ގޮތާ ގުޅޭގޮތުން މަޝްވަރާ ބައްދަލުވުން ކުރިއަށް ގެންދާނީ މިއަދާއި މާދަމާ އެވެ. އެ ބައްދަލުވުމުގައި 92 ބައިވެރިން ބައިވެރިވެ އެވެ.

އޭގެ ތެރޭގައި މާލޭގެ ހުރިހާ ސްކޫލަކާއި އަތޮޅުތަކުގެ ކޮންމެ ޒޯނަކުން ސްކޫލާއި ރަށްރަށުގެ ބައެއް ކައުންސިލްތަކާއި ކުޅިވަރު ޖަމިއްޔާތަކާއި ސްކޫލްތަކުގެ ކުޅިވަރު ސްޕަވައިޒަރުންނާއި ސްކައުޓް އަދި ކަބް ސްކައުޓުން ވެސް ހިމެނެ އެވެ.