ޔޫކޭއާ އެކު މިނިވަން ވިޔަފާރީގެ އެއްބަސްވުމުގެ މަޝްވަރާ ނުކުރުމުން އެމްޑީޕީގެ ކަންބޮޑުވުން

މޯލްޑިވްސް- ޔޫކޭ ޑަޔަލޮގުގައި، ރާއްޖެއިން އިނގިރޭސިވިލާތަށް ބޭރުކުރާ މަހުގެ ޑިއުޓީ އެއްކޮށް ކަނޑާލުމުގެ މަޝްވަރާ ހިމަނާފައިނުވާތީ އެމްޑީޕީން ކަންބޮޑުވުން ފާޅުކޮށްފި އެވެ.

އެ ޕާޓީގެ ރައީސް އަބްދުﷲ ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ކުރި މަސައްކަތުން، އިނގިރޭސިވިލާތަށް ރާއްޖެއިން ބޭރުކުރާ މަހަށް ނަގަމުން އައި ޑިއުޓީ 24 ޕަސެންޓުން 20 ޕަސެންޓަށް ތިރިކުރެވުނު ކަމަށާއި އެ ޑިއުޓީ އެއްކޮށް ކަނޑާލުމަށް ދެ ގައުމުގެ ދެމެދުގައި ފްރީ ޓްރޭޑް އެގްރީމަންޓެއް ހެދުމުގެ މަސައްކަތް ބާރު ސްޕީޑުގައި ކުރިއަށް ގެންދިޔަ ކަމަށެވެ.

"މިފަހަރުގެ ޑަޔަލޮގުގައި އެކަން އުނިކޮށްފައިވާ ސަބަބު ސަރުކާރުން ރައްޔިތުންނަށް ހާމަކޮށް ދެއްވުމަށް ގޮވާލަން،" ޝާހިދު ވިދާޅުވި އެވެ.

މޯލްޑިވްސް- ޔޫކޭ ޑަޔަލޮގުގެ ބައްދަލުވުން ކުރިއަށް ގެންގޮސްފައިވަނީ މިދިޔަ ބުދަ ދުވަހު އެވެ. އެ ބައްދަލުވުމުގެ އެޖެންޑާގައި މަހުގެ ޑިއުޓީ އެއްކޮށް ކަނޑާލެވޭ ގޮތަށް ގެންނަން މަޝްވަރާކޮށްފައިވާ މިނިވަން ވިޔަފާރީގެ އެއްބަސްވުމުގެ ވާހަކައެއް ނެތެވެ. އޭގެ ބަދަލުގައި އެ ބައްދަލުވުމުގައި މަޝްވަރާކޮށްފައިވަނީ ވިސާ ލިބުމުގެ ދަތިތަކާ ގުޅޭ ގޮތުންނެވެ.

އެކަމާ ކަންބޮޑުވުންވެ، އެމްޑީޕީން މިއަދު ނެރުނު ބަޔާނެއްގައި ބުނީ ރައީސް ސޯލިހުގެ ވެރިކަމުގައި މަސްވެރި ސިނާއަތުގެ މުސްތަގުބަލު ރަނގަޅު ކުރަން ފެށި އެންމެ އެއް މަސައްކަތަކީ އިނގިރޭސިވިލާތަށް ރާއްޖެއިން އެކްސްޕޯޓްކުރާ މަހަށް ނަގާ ޑިއުޓީ ކުޑަކުރުމުގެ މަސައްކަތް ކަމަށެވެ.

ޑިއުޓީ މުޅިން ކަނޑާލަން ބޭނުންވާ މިނިވަން ވިޔަފާރީގެ އެއްބަސްވުން ހަދަން ފުރަތަމަ މަޝްވަރާތައް ނިމި، އިނގިރޭސިވިލާތުގެ ސަރުކާރުން ވަނީ އެ ގައުމުގެ ރައްޔިތުންގެ ހިޔާލު ހޯދަން 2023 ވަނަ އަހަރު ހުޅުވާލައިފައި ކަމަށާއި ދައުރު ނިމުނުއިރު މަސައްކަތް ތާވަލުކޮށްފައިވަނީ 2025 ވަނަ އަހަރު އެއްބަސްވުން ތަންފީޒު ކުރުމަށް ކަމަށް އެމްޑީޕީން ބުންޏެވެ.

"އެމްޑީޕީން ދެކެނީ މި އެގްރިމެންޓަކީ މަސްވެރި ސިނާއަތަށް އިންގިލާބީ ބަދަލެއް ގެނެސްދޭނެ ވަސީލަތެއް ކަމަށް، ރާއްޖެއިން ވެލިއުއެޑް ކުރެވިގެން އެންމެ ގިނައިން އެކްސްޕޯޓް ކުރަނީ ދަޅުމަސް ކަމަށްވާއިރު މީގެތެރެއިން 50 ޕަސެންޓަށް ވުރެ ގިނައިން އެކްސްޕޯޓް ކުރަނީ އިނގިރޭސިވިލާތަށް،" އެމްޑީޕީން ބުންޏެވެ.

އެ ޕާޓީން ނެރުނު ބަޔާނުގައި ބުނީ އިނގިރޭސިވިލާތުން ރާއްޖޭގެ މަހުގެ ބާވަތްތަކަށް ނަގާ އިމްޕޯޓު ޑިއުޓީ 0 ޕަސެންޓަށް ބަދަލުވެގެން ދިއުމަކީ ދިވެހި މަސްވެރިކަމުގެ ސިނާއަތަށް ލިބޭ ބޮޑު ކުރިއެރުމެއްކަން ޔަގީން ކަމަށާއި މަސްވެރިން އަތުން ގަންނަ މަހުގެ އަގު އެއާ އެކު މަތިވެގެންދާނެ ކަމަށެވެ.

"މި އުއްމީދުގައި ރައްޔިތުން ތިބިހިނދު މިދިޔަ ހަފުތާގައި ބޭއްވި މޯލްޑިވްސް-ޔޫކޭ ޑަޔަލޮކްގެ ބައްދަލުވުމުގައި އެޕްޓީއޭގެ ވާހަކަ ހިމަނާފައި ނުވާކަން ވަނީ ހާމަވެފައި. މިއީ އެމްޑީޕީން ނިހާޔަތަށް ކަންބޮޑުވާ ކަމެއް. މި ޑަޔަލޮގުގައި އެފްޓީއޭގެ ވާހަކަ އުނިކޮށްފައިވާ ސަބަބު ސަރުކާރުން ދިވެހި ރައްޔިތުންނަށް ހާމަކޮށް ދިނުމަށް ގޮވާލަން،" އެމްޑީޕީން ބުންޏެވެ.