އެކްސިޑެންޓްތަކާ ގުޅިގެން ފިޔަވަޅު ނޭޅޭތީ ޕީޖީ އާއި ފުލުހުން މަޖިލީހަށް ހާޒިރުކުރަން ހުށަހަޅައިފި

ރާއްޖޭގައި ހިނގާ އެކްސިޑެންޓްތަކާ ގުޅިގެން އިހުމާލުވާ ފަރާތްތަކާ މެދު އެކަށީގެންވާ ފިޔަވަޅު ނޭޅޭ މައްސަލާގައި ޕްރޮސެކިއުޓާ ޖެނެރަލާއި ފުލުހުންގެ އިސްވެރިން ރައްޔިތުންގެ މަޖިލީހަށް ހާޒިރުކޮށް، ސުވާލުކުރަން މަޖިލީހަށް ހުށަހަޅައިފި އެވެ.

މިދިޔަ އާދިއްތަ ދުވަހުގެ ރޭ މާލޭގައި ހިނގި ނުރައްކާތެރި އެކްސިޑެންޓްގައި 17 އަހަރުގެ ކުއްޖަކު މަރުވެ، އަދި ދެ މީހަކަށް ސީރިއަސް އަނިޔާތަކެއް ލިބިފައިވެ އެވެ. އެފަދަ ހާދިސާތަކުގައި ފިޔަވަޅު ނޭޅޭ ކަމަށް ބުނެ އެ މައްސަލަ މަޖިލީހަށް ހުށަހެޅުއްވީ އެމްޑީޕީއަށް ނިސްބަތްވާ ގަލޮޅު އުތުރު ދާއިރާގެ މެމްބަރު މުހައްމަދު އިބްރާހިމް (ކުޑޫ) އެވެ.

މިދިޔަ ހޮނިހިރު ދުވަހު މަޖިލީހަށް ކުޑޫ ފޮނުއްވި ސިޓީގައިވަނީ ވޭތުވެދިޔަ ހަ މަސް ދުވަހު އެކަނި ވެސް މާލޭ ސަރަހައްދުގައި ހާހަކަށް ވުރެ ގިނަ އެކްސިޑެންޓް ހިނގާފައިވާއިރު، އެކްސިޑެންޓްތަކާ ގުޅިގެން އިހުމާލުވާ ފަރާތްތަކާ މެދު ގާނޫނީ ފިޔަވަޅު ނޭޅި، އެ މީހުން މުޖްތަމައުގެ ތެރެއަށް ދޫވަމުންދާ ކަމުގެ ކަންބޮޑުވުން އަބަދުވެސް އޮންނަ ކަމަށެވެ. އަދި މަރުވާ މީހުންގެ އަދަދު އިތުރުވެ އަދި ނުކުޅެދުންތެރިކަމާ ކުރިމަތިލާންޖެހޭ މީހުންގެ އަދަދު ވެސް އިތުރުވަމުންދާ ކަމަށް އެ ސިޓީގައިވެ އެވެ.

އެހެންވެ، ކުޑޫގެ ސިޓީގައި ހުށަހަޅުއްވާފައިވަނީ އެކްސިޑެންޓްތަކާ ގުޅިގެން އިހުމާލުވާ ފަރާތްތަކާ މެދު ގާނޫނީ ފިޔަވަޅު އެޅުމުގައި ހުރި ގޮންޖެހުންތައް ބެލުމަށް ޕްރޮސެކިއުޓާ ޖެނެރަލާއި ފުލުހުންގެ އިސްވެރިން މަޖިލީހުގެ ކޮމެޓީއަށް ހާޒިރުކޮށް، ސުވާލު ކުރުމަށެވެ.

މީގެ އިތުރުން އެކަމާ ގުޅިގެން މާލޭ ސިޓީ ކައުންސިލް ވެސް މަޖިލީހުގެ ކޮމެޓީއަށް ހާޒިރުކުރަން އޭނާ ހުށަހަޅުއްވާފައިވެ އެވެ.

މިދިޔަ އާދިއްތަ ދުވަހުގެ ރޭ މާފަންނު ބަސް ޓާމިނަލް ކުރިމަތީގައި އެކްސިޑެންޓް ހިނގީ މީހަކު މަގުހުރަސް ކުރަނިކޮށް ބާރު ސްޕީޑްގައި އައި ސައިކަލެއް ކޮންޓްރޯލް ނުވެ، އެ މީހާގެ ގައިގައި ޖެހި އަދި އެ މީހުން ވިއްސައިގެން ގޮސް ޕިކަޕެއްގައި ޖެހިގެންނެވެ.

އެ ހާދިސާގައި ނިޔާވީ ސައިކަލުގައި އިން 17 އަހަރުގެ ކުއްޖެކެވެ. އޭނާއަކީ ލަވަކިޔުންތެރިޔާ މުހައްމަދު އަބްދުލްޣަނީ (ތޭރަވާ) އާއި މަރިޔަމް އަޝްފާގެ ހުރި ހަމައެކަނި ދަރިފުޅެވެ. އެ ކުއްޖާގެ ޖަނާޒާ އިއްޔެ ވަނީ ބާއްވައިފަ އެވެ.

މަގުހުރަސް ކުރަނިކޮށް ސައިކަލުން ޖެހުނު 40 އަހަރުގެ މީހާއަށް އައިސީޔޫގައި ފަރުވާ ދެމުންދާއިރު، ތިން ވަނައަށް އަނިޔާވި 16 އަހަރުގެ ކުއްޖާ މިހާރު ވަނީ ވޯޑަށް ބަދަލުކޮށްފަ އެވެ.