ރާއްޖެއަށް ކުރިމަތިވެގެން އުޅޭ ހާލަތުގެ ހިއްސާދާރަކީ އެމްޑީޕީ: ސައީދު

ރާއްޖެ އަށް މިހާރު ކުރިމަތިވެގެން މިއުޅޭ ދަތި ހާލުގެ އެންމެ ބޮޑު ހިއްސާދާރަކީ އިދިކޮޅު އެމްޑީޕީ ކަމަށާއި އެ ޕާޓީގެ ވެރިކަން 2023 އަށް ނިންމައިލިއިރު 125.2 ބިލިއަން ރުފިޔާގެ ދަރަނި އޮތް ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.

"ރާއްޖެ 40 އަހަރުން އުފެއްދި ނޫނިއްޔާ 50 އަހަރުން އުފެއްދި ދަރަންޏަށް ވުރެ ބޮޑޭ ރައީސް އިބްރާހިމް މުހައްމަދު ސޯލިހުގެ [ސަރުކާރުގެ] ފަސް އަހަރުން އުފެއްދި ދަރަނި،" ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން ސައީދު ވިދާޅުވި އެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ވެސް އިކޮނޮމިކް މިނިސްޓަރުކަން ކުރެއްވި ސައީދު ވިދާޅުވީ، އެ ވެރިކަން ނިންމައިލިއިރު ދައުލަތުގެ ރިޒާވްގައި އެއް ބިލިއަން ޑޮލަރު ހުންނާނެ ކަމަށެވެ. އަދި ޔާމީންގެ ވެރިކަން 2018 އަށް ނިންމައިލިއިރު، ސޮވަރިން ޑިވެލޮޕްމަންޓް ފަންޑުގައި 250 މިލިއަން ޑޮލަރު ހުރި ކަމަށް މިނިސްޓަރު ވިދާޅުވި އެވެ.

އެކަމަކު، އޭނާ ވިދާޅުވީ ރައީސް އިބްރާހިމް މުހައްމަދު ސޯލިހު ވެރިކަމަށް ވަޑައިގެން އެންމެ ފަހު އަހަރު ނިންމައިލެެއްވީ ދައުލަތުގެ ބަޖެޓު 50 ބިލިއަން ރުފިޔާ އަށް އަރުވައި އަދި ގާނޫނުގައި "ތަޅު އަޅުވައި" އިތުރަށް އެތައް ހާސް ޑޮލަރެއް ޗާޕްކޮށްގެން ކަމަށެވެ.

"މާނައަކީ ޗާޕްކޮށްގެން ފައިސާ މާކެޓަށް ނެރުނީމާ ރުފިޔާގެ އަގު އިންތިހާ އަށް ބަލިކަށިވެގެން ދިޔައީ،" ސައީދު ވިދާޅުވި އެވެ.

ސައީދު ވިދާޅުވިިގޮތުގައި ޑިސެމްބަރު 2023 ގައި ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވިއިރު، ދައުލަތުގެ ކުންފުނިތަކުން އެކި ފަރާތްތަކަށް 9.1 ބިލިއަން ރުފިޔާ ދޭން ޖެހިފައި ހުއްޓެވެ. އޭގެ ތެރޭގައި އާރުޑީސީ އާއި ފެނަކަ އާއި އައިއޭއެސް އާއި އެމްޓީސީސީ އަދި މިފްކޯ ފަދަ ކުންފުނިތައް ހިމެނޭ ކަމަށް ވިދާޅުވި އެވެ.

މިނިސްޓަރު ވިދާޅުވީ، އެމްޑީޕީގެ އެންމެ ފަހުގެ ވެރިކަމުގައި ދިމާވި އެންމެ ބޮޑު މައްސަލައަކީ މިދިޔަ 40 އަހަރު ވެސް ދަރަނިވެރި ނުވާ ވަރަށް ސަރުކާރުގެ ހިންގުމަށް ދަރަނިވެރި ކުރުވުން ކަަމަށެވެ.