ވަރުގަދަ އަސްކަރީ ބާރެއްގެ ގޮތުގައި ރާއްޖެ އޮންނަންޖެހޭ: ރައީސް

އިގްތިސާދު ހަރުދަނާކޮށް، ތަރައްގީ ހާސިލުކުރެވޭ ވަރުގަދަ ގައުމަކަށް ރާއްޖެ ހެދުމުގައި އަސްކަރިއްޔާގެ ބާރު ވަރުގަދަ ކުރުމަކީ ކޮންމެހެން ކުރަންޖެހިފައިވާ ކަމެއް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ދިވެހި ސިފައިންގެ ވައިގެ ހިދުމަތުގެ ފުރަތަމަ އެއާ ސްޓޭޝަން، އައްޑޫ ގަމުގައި ގާއިމުކޮށް، އެތަން ހުޅުވުމަށް މިއަދު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ އެ މަރުކަޒު ގާއިމް ކުރުމަކީ މުޅި ރާއްޖެ ވައިގެ މަގުން ބެލެހެއްޓުމަށް ލިބުނު ވަރަށް ބޮޑު ކުރިއެެރުމެއް ކަމަށެވެ.

ރާއްޖޭގެ އުތުރުން ށ. ފުނަދޫގައި ވެސް ވައިގެ ސްޓޭޝަނެއް ގާއިމް ކުރުމުގެ މަސައްކަތް ކުރަމުންދާ ގެންދާކަން ފާހަގަ ކުރައްވައި، ރައީސް ވިދާޅުވީ އެތަނުގެ މަސައްކަތް ވެސް ބާރު ސްޕީޑެއްގައި ކުރިއަށް ގެންދާ ކަމަށެވެ.

ރައީސް ވިދާޅުވީ ސިފައިންގެ ހިދުމަތުގެ ފެންވަރު ރަނގަޅުކުރުމަށް އިތުރު ވަސީލަތްތައް ހޯދުމުގެ މަސައްކަތް ކުރަމުންދާ ކަމަށާއި އޭގެ ތެރޭގައި ކޯސްޓްގާޑުގެ ފްލީޓް ދެގުނަ ބޮޑު ކުރުމަށް ކަނޑައެޅި ސިޔާސަތުގެ ދަށުން ކާމިޔާބު މަސައްކަތްތަކެއް ކުރެވެމުންދާ ކަމަށް ވެސް ރައީސް ވިދާޅުވި އެވެ. އަދި ސިފައިންގެ މެރިން ކޯގެ ކެޕޭސިޓީ އިތުރު ކުރުމަށް ފަށާފައިވާ މަސައްކަތްތަކުގެ ތެރެއިން ވެސް ބައެއް ކަންކަން ހާސިލުކުރެވިފައިވާ ކަމަށް އެމަނިކުފާނު ވިދާޅުވި އެވެ.

ސިފައިންގެ ހިދުމަތުގެ ތެރެއިން އިންސާނީ ތަރައްގީއަށް ވެސް ކޮށްދޭންޖެހޭ މަސައްކަތްތައް އެބަހުރި ކަމަށާއި އެ ކަންކަމަށް އަންނަ އަހަރުގެ ބަޖެޓުގައި ފައިސާ ހިމަނާފައިވާ ކަމަށް ރައީސް ވިދާޅުވި އެވެެ. އަދި އެ ކަންކަމުގެ ސަބަބުން ގައުމާއި ރައްޔިތުންނަށް ވެސް ފައިދާވާނެ ކަމަށް އެމަނިކުފާނު ވިދާޅުވި އެވެ.

ރައީސް ވިދާޅުވީ ގައުމަށް ބޮޑެތި އިންވެސްޓްމަންޓްތައް އަންނާނީ އެ ގައުމަކީ ރައްކާތެރި ތަނެއްގެ ގޮތުގައި އެ އިންވެސްޓަރުންނަށް ގަބޫލުކުރެވޭ ހިނދެއްގައި ކަމަށެވެ. އެހެންވެ، ރާއްޖޭގެ ވައިގެ މަރުކަޒުގެ ގާބިލުކަން އިތުރުކޮށްފައިވާނަމަ، ގައުމުގެ އިގްތިސާދު ވެސް ދާނީ ކުރިއަށް ކަމަށް އެމަނިކުފާނު ވިދާޅުވި އެވެ.

ރައީސް ވިދާޅުވި ގޮތުގައި ދުނިޔޭގައި ތަރައްގީވެފައިވާ އިސްލާމީ އަރަބި ގައުމުތަކަށް ބަލާއިރު އެ ގައުމުތަކުން ވެސް ކަން ކުރަމުންދަނީ އެ އުސޫލުންނެވެ.

"އެހެންވީމަ އަޅުގަނޑުމެންގެ ނޭޝަނަލް އައިޑެންޓިޓީ ހިމާޔަތްކުރެވި އިސްލާމީ ވަހުދަތު ކަށަވަރުކުރެވި އޮންނަ ގޮތަށް އަޅުގަނޑުމެންގެ ގައުމު އިގްތިސާދީ ގޮތުން ހުޅުވާލުމަށްޓަކައި މި ކުރެވޭ މަސައްކަތުގައި މި ގައުމުގައި ވަރުގަދަ މިލިޓަރީ ބާރެއް ގާއިމުވެފައި އޮތުމަކީ ކޮންމެހެން ވެސް ކުރަންޖެހޭ ކަމެއް،" ރައީސް ވިދާޅުވި އެވެ.

ރައީސް ވިދާޅުވީ އެގޮތުގައި ކުރިއަށް ދިއުމަށް ގިނަ މަސައްކަތްތަކެއް ކުރަމުން ގެންދާ ކަމަށެވެ. އަދި އިންސާނީ ވަސީލަތް ގާއިމް ކުރުމުގެ ގޮތުން ވައިގެ މަރުކަޒުގައި ޓްރެއިނިން ފެސިލިޓީއެއް ގާއިމް ކުރާނެ ކަމަށް އެމަނިކުފާނު ވިދާޅުވި އެވެ. އަދި ސިފައިންގެ އަސްކަރީ ތަމްރީނުތަކުގައި ބޭނުންކުރާ ކ. ގިރިފުށީގެ ބިން ހިއްކުމާއި އެއާ ގުޅިފައިވާ މަސައްކަތްތައް ވެސް ފަށާފައިވާ ކަމަށާއި އަދި ސިފައިން ބޭނުންކުރާ ޅ. މާފިލާފުށީގެ ތަރައްގީގެ ކަންކަން ވެސް ކުރިއަށްދާ ކަމަށް ރައީސް ވިދާޅުވި އެވެ.

މިއަހަރު ފެށި ނޭޝަނަލް ސާވިސް ޕްރޮގްރާމުގެ ދަށުން އަންނަ އަހަރު ރެކްރޫޓުކުރާ މީހުންގެ އަދަދު ބޮޑުތަނުން އިތުރުކުރެވޭނެ ކަމަށް ވެސް އެމަނިކުފާނު ވިދާޅުވި އެވެ. އަދި މާލޭގައި ސިފައިންގެ މަރުކަޒުތައް ގާއިމް ކުރުމާއި އެފަދަ އިތުރު ކަންކަން ވެސް ބަޖެޓުކޮށްފައިވާ ކަމަށް އެމަނިކުފާނު ވިދާޅުވި އެވެ.

ރައީސް ވިދާޅުވީ އެ ހުރިހާ ކަމަކީ ވެސް ގައުމުގެ މުސްތަގުބަލަށްޓަކާ ކުރެވޭ މަސައްކަތްތަކެއް ކަމަށާއި އެ ކަންކަން ކާމިޔާބުވުމުން މިނިވަން މުސްތަގިއްލު އަދި ތަރައްގީ ހާސިލުވަމުންދާ ތަރައްގީ ވެފައިވާ ގައުމަކަށް ހެދުމަށް ކުރާ މަސައްކަތަށް އެހީއަކަށް ވާނެ ކަމަށް އެމަނިކުފާނު ވިދާޅުވި އެވެ.

"މިފަދަ ހުރިހާ ކަމެއް މި ކުރަނީ އަޅުގަނޑު ގަބޫލުކުރާ ގޮތުގައި ދިވެހި ގައުމުގެ މުސްތަގުބަލަށްޓަކާއި ބިނާ ކުރެވޭ ގާއިމް ކުރެވޭ ވަރަށް މުހިއްމު ކަންކަން ގޮތުގައި އަޅުގަނޑުމެންނަށް ގަބޫލު ކުރެވޭތީ. އިރާދަކުރެއްވިއްޔާ މިކަންކަން ކާމިޔާބުވެގެން ދިއުން ވާނީ މި ގައުމު މިނިވަން މުސްތަގިއްލު ތަރައްގީ ހާސިލުވަމުންދާ ތަރައްގީވެފައިވާ ގައުމަކަށް ހެދުމަށް ކުރާ މަސައްކަތުގައި މުހިއްމު ދައުރެއް އަދާކުރާ ކަންކަމަށް." ރައީސް ވިދާޅުވި އެވެ.

ރައީސް ވިދާޅުވީ ރާއްޖެއަކީ ތަރައްގީވެފައިވާ ގައުމަކަށް ހެދުމުގައި ވެސް ވަރުގަދަ އަސްކަރީ ބާރެއް އޮންނަންޖެހޭ ކަމަށް ގަބޫލުފުޅު ކުރައްވާ ކަމަށާއި އެހެންވެ، އެއާ ކޯއަށް އަސްކަރީ މަތިންދާބޯޓު ހޯދުމުގެ މަސައްކަތް ވެސް ފަށާފައިވާ ކަމަށް އެމަނިކުފާނު ވިދާޅުވި އެވެ.

ރައީސް ވިދާޅުވީ އެމްއެންޑީއެފަކީ ކޮންމެ ދަނޑިވަޅެއްގައި ވެސް ގައުމު ހިމާޔަތްކޮށް، ދިފާއުކުރުމުގެ ގާބިލުކަން ހުރި ވަރުގަދަ ބަޔަކަށް ހަދަން ޖެހޭ ކަމަށެވެ.