ގައުމީ ޓީމުގެ ދިފާއީ ޕްލޭނުގައި ހައްލުތަކެއް ހޯދިއްޖެ: މޯހަން

ގައުމީ ފުޓްބޯޅަ ޓީމުގެ ދިފާއީ ޕްލޭނުގައި ހައްލުތަކެއް ހޯދިއްޖެކަމަށް ކޯޗު މުހައްމަދު ޝިޔާޒު (މޯހަން) ބުނެފި އެވެ.

އޯގަސްޓް މަހު ރާއްޖޭގެ ކޯޗުކަމާ ހަވާލުވި މޯހަންގެ ކޯޗުކަމުގެދަށުން ރާއްޖޭން ކުޅޭ ފަސްވަނަ މެޗުގައި މާދަމާ ހަވީރު ނުކުންނާނީ ފިލިޕީންސާ ދެކޮޅަށެވެ.

ގައުމީ ޓީމުގެ އެސިސްޓެންޓް ކޯޗުކަން ވެސް ދިގު މުއްދަތަކަށް ކުރިން އަދާކުރި މޯހަން ބުނީ ރާއްޖޭގެ ޓީމަށް ކުރިމަތިވާ އެންމެ ބޮޑު ގެންޖެހުމަކީ ދިފާއީ މައްސަލަ ކަމަށެވެ.

"އާންމުކޮށް އަޅުގަނޑުމެންގެ ދިވެހި ޓީމަށް ދިމާވާ އެންމެ ބޮޑު މައްސަލައަކީ އާދައިގެ ގޯލް ނުވަތަ ސިމްޕަލް ގޯލް، ފަސޭހަ ގޯލް ވަދެގެން ދިއުން. އެހެންވީމާ އެކަން ހުއްޓުވަން ކުރަން ޖެހޭ މަސައްކަތްތަކަށް ވަރަށް ބޮޑަށް ފޯކަސް ކުރިން،" ފިލިޕީންސް މެޗަށް ޓީމުގެ ތައްޔާރީތަކާ ބެހޭގޮތުން މޯހަން ބުންޏެވެ.

މޯހަން ބުނި ގޮތުގައި ދިފާއީ ގޭމް ޕްލޭނުގައި ހުރި މައްސަލަތައް ހައްލުކުރުމުގައި ކުރިއެރުންތަކެއް ވެސް ހޯދިފައިވާކަން ހިތްހަމަޖެހުމާ އެކު މޯހަން ފާހަގަ ކުރި އެވެ.

"އެއްކަމަކީ މިދިޔަ ހަތަރު މެޗުގައި ސެޓްޕެލޭއަކުން (އަޅުގަނޑުމެންގެ ކޮޅަށް) ގޯލެއް ނުޖަހާ. ބޮލަކުން ގޯލެއް ނުޖަހާ ހުރަހެއް (ނަގައިގެން) ވެސް. އެހެންވީމަ އެއީ ވަރަށް ބޮޑު ހިތްހަމަޖެހުމެއް،" ޕްރީ މެޗު ޕްރެސް ކޮންފަރެންސްގައި މޯހަން ބުންޏެވެ.

"އިދިކޮޅު ޓީމުތަކުގައި ބޮޑެތި (އިސްކޮޅުން ދިގު އަދި ފިޒިކަލީ ވަރުގަދަ) ކުޅުންތެރިން ތިބިއިރު އޭގެ އެޑްވާންޓޭޖް ނެގިޔަ ނުދީ އަޅުގަނޑުމެންނަށް ކުޅެވޭކަން. އެ ޑިސިޕްލިން ވަރަށް ރަނގަޅު. އޭރިއާތެރޭގައި މާކިއާ މިކަންކަން ވަރަށް ރަނގަޅު."

ނަމަވެސް އަދިވެސް ދިފާއީ ޕްލޭނުގައި ހައްލުތަކެއް ހޯދަންޖެހޭ ކަންކަން ހުރިކަން އޭނާ ފާހަގަ ކުރި އެވެ.

"މިހާރުވެސް ވަދެގެން މިދަނީ ވަރަށް ސިމްޕަލް ގޯލްތަކެއް. އެއީ މިހާރު އަޅުގަނޑުމެން ހުއްޓުވަންޖެހޭ މަސައްކަތަކީ. އަނެއްކާ ގޯލް ވަންނަ ވަގުތު. ހާފު ފަށައިގެން 10 މިނެޓްތެރޭގައި ބައިކޮޅަށް ގޯލް ވަނުން. އެއީ ހަމަ ގައިމުވެސް ވަރަށް މާޔޫސްވާކަމެއް. އެހެންވެ އެކަންކަންކަމަށް އަޅުގަނޑުމެން މިފަހަރު ވަރަށް ބޮޑަށް ފޯކަސްކޮށްފައި އޮންނާނީ،" މޯހަން ބުންޏެވެ.

އޭނާ ބުނީ ސީޒަން ފަށައިގެން މިހާރު ކުރިއަށްދާތީ ކުޅުންތެރިންގެ ފިޓްނަސް މައްސަލައެއް ކުރިމަތިނުވާ ކަމަށެވެ.

ފިލިޕީންސްގައި ނެޗްރަލައިޒޭޝަން އުސޫލުން ރަށްވެހިކަން ދީގެން އެ ގައުމުގެ ގައުމީ ޓީމަށް ކުޅުވާ ކުޅުންތެރިން ގިނަ އެވެ. އެހެންވެ އެ ގުރޫޕްގައި އޮތް އެންމެ ވަރުގަދަ ޓީމަކީ ފިލިޕީންސްކަމަށް އޭނާ ބުންޏެވެ.

ހާއްސަކޮށް އެ ޓީމުގައި އިންޑަވިޖުއަލް މޮޅު ކުޅުންތެރިން ގިނަކަން މޯހަން ފާހަގަ ކުރި އެވެ.

ފިލިޕީންސާ ދެކޮޅަށް ގައުމީ ފުޓްބޯޅަ ދަނޑުގައި ރާއްޖޭން މާދަމާ ކުޅޭ މެޗު ފަށާނީ ހަވީރު 3:30 ގަ އެވެ.