ތާރާގެ 30 ވަނަ އުފަންދުވަސް ރާއްޖޭގައި

ބޮލީވުޑްގެ އެކްޓްރެސް ތާރާ ސުތާރިއާ އޭނާގެ 30 ވަނަ އުފަންދުވަސް އިއްޔެ ފާހަގަކުރުމުގެ ރާއްޖޭގައި ޗުއްޓީ ހޭދަކޮށްފި އެވެ.

ތާރާއަށް 30 އަހަރުވީ އިއްޔެ އެވެ. އެކަމަކު، އުފަންދުވަހުގެ ކުރިން އޭނާ ވަނީ ޗުއްޓީއަށް ރާއްޖެ އައިސް، އެ މުނާސަބަތު ފާހަގަކޮށްފަ އެވެ. އޭނާ ރާއްޖޭގައި ޗުއްޓީ ހޭދަކުރީ މާލެ އަތޮޅުގައި އޮންނަ ޖޭ ޑަބްލިއު މެރިއޮޓް މޯލްޑިވްސް ރިސޯޓް އެންޑް ސްޕާގަ އެވެ.

ރާއްޖޭގައި ހޭދަކުރި ޗުއްޓީގެ ބައެއް ފޮޓޯތައް މިދިޔަ އާދިއްތަ ދުވަހު ތާރާގެ އިންސްޓަގްރާމްގައި ހިއްސާކޮށްފައިވެ އެވެ.

ތާރާގެ އުފަންދުވަސް ފާހަގަކުރަން އޭނާގެ ލޯބިވެރިޔާ އަދި ބޮލީވުޑްގެ އެކްޓަރު ވީރް ޕަހަރިޔާ ރޭ ވަނީ ޕާޓީއެއް ވެސް ބާއްވައިފަ އެވެ. ނަމަވެސް، އެ ޕާޓީ ބޭއްވީ ރާއްޖެއަށް ކުރި ދަތުރު ނިންމާލުމަށް ފަހު، އިންޑިއާގެ މުމްބާއީގައި އެވެ. އެ ޕާޓީގައި ކޭކު ފަޅާ ވީޑިއޯ އާއި ފޮޓޯތައް އެމީހުންގެ ސޯޝަލް މީޑިއާގައި ޕޯސްޓުކޮށްފައިވެ އެވެ.

އެ ޕާޓީގައި ތާރާގެ ގާތް ރައްޓެހިގެން އިތުރުން ބޮލީވުޑްގެ ސްޓާރުންނާ މިހާރު ވަރަށް ގާތް ސެލެބްރިޓީއެއް ކަމަށްވާ އޮރީ ވެސް ހުއްޓެވެ.

ރިޕޯޓްތައް ބުނި ގޮތުގައި، ތާރާ އާއިި ވީރް ލޯބީގެ ގޮތުން ގުޅުނީ މި އަހަރު ކުރީކޮޅެވެ. އެމީހުންގެ މެދުގައި އެ ގުޅުން އޮތްކަން ޔަގީންވީ މި އަހަރުގެ މެދު ތެރޭގައި ސޯޝަލް މީޑިއާގައި ކުރި އެކި ޕޯސްޓުތަކުންނެވެ.