އެމްޑީޕީ އޮތީ އުނދަގޫ ހާލަތެއްގައި، ބޭނުންވަނީ އެންމެން އެކުވާން: ނަޝީދު

އެމްޑީޕީ އަށް މި ވަގުތު ދިމާވެފައިވަނީ އުނދަގޫ ހާލަތެއް ކަމަށާއި އެކަމުން އަރައިގަންނަން މުޅި ޕާޓީ އެކަތިގަނޑެއްގެ ގޮތުގައި މަސައްކަތް ކުރަންޖެހޭ ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

ކުރީގެ ރައީސް އިބްރާހިމް މުހައްމަދު ސޯލިހާ ދެމެދު އުފެދުނު ސިޔާސީ ނުތަނަސްކަމުގެ ތެރޭގައި އެމްޑީޕީއާ ދުރުގައި ހުންނެވުމަށް ފަހު، މި އަހަރުގެ ޖޫން 23 ގައި އަލުން އެ ޕާޓީއާ ގުޅިވަޑައިގެންނެވި ނަޝީދު އެހެން ވިދާޅުވިއިރު، ކުރިއަށް އޮތް 2028 ގެ ރިޔާސީ އިންތިހާބަށް ނެރޭނެ ކެންޑިޑޭޓަކު ކަނޑައެޅުމުގައި ވެސް އެމްޑީޕީ މިހާރު ވަނީ ބައިބައިވެފަ އެވެ.

އަދި އެމްޑީޕީގެ ޗެއާޕާސަންގެ މަގާމުން ފައްޔާޒު އިސްމާއީލް އިސްތިއުފާ ދެއްވި މައިގަނޑު އެއް ސަބަބަކީ ވެސް ނަޝީދާއި ކުރީގެ ރައީސް އިބްރާހިމް މުހައްމަދު ސޯލިހާ ދެމެދު އުފެދިފައިވާ ނުތަނަވަސްކަމުން އަރައި ނުގަނެވުން ކަމަށް ވަނީ ވިދާޅުވެފަ އެވެ. ހާއްސަކޮށް އެމްޑީޕީއާ ދުރުގައި ދެ އަހަރެއްހާ ދުވަސް ވަންދެން ހުންނެވުމަށް ފަހު، ނަޝީދު އަލުން އެ ޕާޓީއާ ގުޅިވަޑައިގަތުމުން އެ މަނިކުފާނު ބަލައިގަތުމާ މެދު ވަނީ ބޮޑު ދެބަސްވުމެއް އުފެދިފަ އެވެ.

އޭގެ ފަހުން، ވަގުތީ ޗެއާޕާސަންގެ މަގާމަށް ބޭފުޅަކު އައްޔަނު ކުރުމާ މެދު ޕާޓީގެ ދެ ފެކްޝަންގެ މެދުގައި ބޮޑެތި ހިލާފުތައް އުފެދިފަ އެވެ. އެ ކަމަށްޓަކައި ރޭ ބޭއްވި އެމްޑީޕީގެ ގައުމީ މަޖިލިސް ވެސް ހުއްޓާލީ ބޮޑު އަރައިރުމަކަށް ގޮސް ނިޒާމު ގެއްލުމުންނެވެ.

ނަމަވެސް، ނަޝީދު އެކްސްގައި މިއަދު ކުރެއްވި ޕޯސްޓެއްގައި ވިދާޅުވީ، އެމްޑީޕީން ތަޖުރިބާކުރަމުންދާ އުނދަގޫ ދުވަސްތަކުން އަރައިގަނެވޭނެކަމަށް ޝައްކު ނުކުރައްވާ ކަމަށެވެ.

"މިއަދު އެމްޑީޕީގެ ވަރަށް ގިނަ މެމްބަރުން އެ ބުނަމުންދަނީ މުހިންމީ ޕާޓީގެ ޔުނިޓީކަމަށް،" ނަޝީދު ވިދާޅުވި އެވެ.

އެއާ އެކު ނަޝީދު ވަނީ މޯޓަރުގަޑުބަޑުގެ ތާރީހުން، އޭރުގެ ކެބިނެޓުން ދެއްކި އެއްބައިވަންތަކަމުން މިސާލެއް ވެސް މިއަދު ނެންގެވި އެވެ.

މޯޓަރުގަޑުބަޑުގެ ތާރީހީ ހާދިސާ އާ ކުރައްވަމުން ނަޝީދު ފާހަގަކުރެއްވި ގޮތުގައި މުހައްމަދު އަމީން ވިދާޅުވީ، އެންމެ މުހިންމީ ކެބިނެޓުގެ "ޔުނިޓީ" އެވެ.

"ކެބިނެޓުގެ އެކަކަށް ލިބޭ ގެއްލުމެއް އަނެކަކަށް ވެސް ލިބެން ޖެހޭނެ ކަމަށް،" ނަޝީދުގެ ޕޯސްޓުގައި ވެ އެވެ. އަދި އެ ދުވަސްވަރު ދަރަވަންދޫގެ ހުސައިން ސަލާހު ލިޔުއްވި ޅެންބައިތެއް ނަޝީދު ހަނދާނަށް ގެންނެވި އެވެ. އެ ޅެމުގައި ވިދާޅުވެފައި ވަނީ:

އުނިކަން ނުވާ މާތް ދޫފުޅުން

އެ ދުވަހު ވިދާޅުވީ

ޔުނިޓީއަކީ ފަހެ ހަސަދަޔާ މަކަރަށް ނުވާނެ ބާ.