ފުވައްމުލަކު ބަންޑާރަ ކިޅީގެ 360،000 އަކަފޫޓު އަނދައިފި

ފުވައްމުލަކު ފުނާޑު އަވަށު ބަންޑާރަ ކިޅީގައި ރޭ ހިނގި އަލިފާނުގެ ހާދިސާގައި 360،000 އަކަފޫޓަށް ވުރެ ބޮޑު ސަރަހައްދެއް އަނދައިފި އެވެ.

ރޭ 10:00 ހާއިރު ރޯވި އަލިފާން މެންދަމުން އަލިވެ 1:30 ހާއިރު ނިއްވާލެވުނީ އެމްއެންޑީއެފްގެ ފަޔަ އެންޑް ރެސްކިއު އާއި ފުލުހުންނާއި ކައުންސިލްގެ މުވައްޒަފުންނާއި އާއްމުންކުރި މަސައްކަތުން ކަމަށާއި އޭރު 360,586 އަކަފޫޓުގެ ސަރަހައްދެއް އޮތީ އަނދާފައި ކަމަށް ކައުންސިލުން ބުންޏެވެ.

ކުރިން ވެސް އަލިފާނުގެ ހާދިސާތައް ހިންގާފައިވާ އެތަނުގައި ރޯވި ސަބަބެއް ނޭނގެ އެވެ.

ކައުންސިލުން ވަނީ އަލިފާން ނިއްވާލެވިފައި ވިޔަސް އެ ސަރަހައްދުން އަލިފާނުގެ އަސަރު ފެނިއްޖެ ނަމަ ލަސްނުކޮށް ފަޔާ އެންޑް ރެސްކިއުއަށް އަވަހަށް ގުޅުމަށް ވެސް އެދިފަ އެވެ.

ރާއްޖޭގައި އެންމެ ފުރަތަމަ ގާއިމުކުރި ނޭޗާ ޕާކަކީ ފުވައްމުލަކުގެ މި ޕާކެވެ. އެތަން ހުޅުވީ ސެޕްޓެމްބަރު 14، 2018 ގަ އެވެ.

ފުވައްމުލަކު ނޭޗާޕާކްގައި އެކުލެވިގެން ވަނީ ދަޑިމަގު ކިޅި އާއި އެ ކުޅިއާ ގުޅިގައިވާ ޗަސްބިން ސަރަހައްދާއި، ދިގުވާޑު ހޯދަޑު ހިމެނޭ ސަރަހައްދުގެ ޗަސްބިމުގައިވާ ބޯޑްވޯކާއި ބަންޑަރް ކިޅި އާއި އެތަން ހިމެނޭ ސަރައްހަދުގެ ޗަސްބިންތަކާއި ކޮޑަކިޅި އާއި މާލެގަމާއި ފުނާޑު ހިމެނެ ސަރައްދުގައިވާ ބޯޑުވޯކެވެ.