މާލެއިން އަނެއްކާ ވެސް އިތުރު ހަތަރު މަސާޖުޕާލާއެއް ބަންދުކޮށްފި

މާލޭގައި ހިންގާ އިތުރު ހަތަރު މަސާޖުޕާލާއެއް އިއްޔެ ބަންދުކޮށް، ގަވާއިދާ ހިލާފަށް ރާއްޖޭގައި އުޅޭ ތިން ބިދޭސީއަކު މޯލްޑިވްސް އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށް އެ އިދާރާ އިން މިއަދު ބުނެފި އެވެ.

އެ އިދާރާ އިން ބުނީ، މާލޭގައި ހިންގަމުން އައި ހަތަރު މަސާޖު ޕާލާއެއް އިއްޔެ ބަލައިފާސްކުރި ކަމަށެވެ. އަދި އެ ހަތަރު ތަނުގައި ހިންގާ ވިޔަފާރި "ވަގުތުން ހުއްޓުވުމުގެ ފިޔަވަޅުތައް" އިކޮނޮމިކް މިނިސްޓްރީން އަޅާފައިވާއިރު ގަވާއިދާ ހިލާފަށް އުޅޭ ތިން ބިދޭސީއަކު ފުލުހުންގެ ބެލުމުގެ ދަށަށް ގެނައި ކަމަށް ބުންޏެވެ.

ރާއްޖޭގައި ގަވާއިދާ ހިލާފަށް ބިދޭސީން ވިޔަފާރިކުރާ ތަންތަން އަތުލައިގަންނަން ހާއްސަ ޓާސްކުފޯހުން ހިންގާ އޮޕަރޭޝަންގެ ދަށުން މިދިޔަ އަންގާރަ ދުވަހުގެ ރޭ ވެސް މާލެ އިން ހަތަރު މަސާޖުޕާލާއެއް ބަންދުކޮށް، އެ ތަންތަނުގައި ގަވާއިދާ ހިލާފަށް އުޅޭ ހަތަރު ބިދޭސީއަކު އިމިގްރޭޝަންގެ ބެލުމުގެ ދަށަށް ގެނަ އެވެ.

މަސާޖުޕާލާތަކުގެ ނަމުގައި މާލޭގައި ތަންތަން ހިންގާއިރު އެއީ ހަށިވިއްކުމަށް ހިންގާ ވިިޔަފާރިތަކެއް ކަމުގެ ތުހުމަތު ދަނީ ކުރަމުންނެވެ. ހާއްސަކޮށް ސޯޝަލް މީޑިއާގައި އެ ގޮތަށް ފާހަގަވާ ގޮތަށް އިޝްތިހާރުކޮށް، ބިދޭސީން ފާޅުގައި ދަނީ ބޮޑު އާމްދަނީއެއް ހޯދަމުންނެވެ.

އެ ތަންތަން ރަޖިސްޓަރީ ކޮށްފައި ހުންނަނީ ދިވެހިންގެ ނަމުގައި ކަމަށް ވިޔަސް ހުރިހާ ބާރެއް ބިދޭސީންނަށް ދޫކޮށް، މާލޭގެ އެކި އެޕާޓުމަންޓުތައް ހިފައިގެން "ހަށިވިއްކާ" މައްސަލަ ވަނީ ވަރަށް ބޮޑުވެފަ އެވެ. އެ ބިދޭސީން ގެންދަނީ އެ މީހުންގެ އަމިއްލަ ފޮޓޯ އާއި މޮބައިލް ނަމްބަރު ވެސް ސޯޝަލް މީޑިއާގައި ފަތުރައި، އިޝްތިހާރު ކުރަމުންނެވެ.

ރައީސް ޑރ. މުހައްމަދު މުއިއްޒު މާލޭގެ ތިން އަވަށުގެ ރައްޔިތުންނާ ދާދި ފަހުން ބައްދަލުކުރެއްވިއިރު ވެސް ބައެއް މީހުންގެ އެންމެ ބޮޑު ޝަކުވާއަކީ މަސާޖުޕާލާތަކުގެ ނަމުގައި "ހަށިވިއްކާ" ތަންތަން ހިންގާ މައްސަލައެވެ. އެ މީސްމީހުން ކަންބޮޑުވުމާ އެކު ވަނީ އެކަން ރައީސްގެ ސަމާލުކަމަށް ގެނެސްފަ އެވެ.