ސީޝެލްސްގެ ކުރީގެ ރައީސް ރާއްޖޭގައި ގަތަރުގެ ބަޔަކާ ބައްދަލުކޮށް ވިއްކާލި ކަމަށް ބުނާ ރަށެއްގެ މައްސަލަ ބަލަނީ

ސީޝެލްގެ ކުރީގެ ރައީސް ވަވެލް ރަމްކަލާވަން 2023 ވަނަ އަހަރު ރާއްޖެއަށް ކުރެއްވި ރަސްމީ ދަތުރުގައި ގަތަރުގެ ބަޔަކާ ބައްދަލުކުރައްވައި ސީޝެލްގެ "އެސޮމްޕްޝަން އައިލެންޑް" ވިއްކާލުމަށް ހެދި ކަމަށް ބުނާ ޑީލެއްގެ މައްސަލަ ބަލަން އިންކުއަރީ ކޮމިޝަނެއް ހަދައިފި އެވެ.

އިންކުއަރީ ކޮމިޝަން ހެދުމާ ގުޅިގެން ރަމްކަލަވަން ނެރުއްވި ބަޔާނެއްގައި ވިދާޅުވީ އެ ކޮމިޝަނަށް ފުރިހަމައަށް އެއްބާރުލުން ދެއްވާނެ ކަމަށެވެ. ހާމަކަން ބޮޑު ގޮތެއްގައި، އާންމުންނަށް ވަގުތުން ފެންނަ ގޮތަށް އިންކުއަރީގެ ތަހުގީގުތަކަށް ހާޒިރުވެ ވަޑައިގެން ޖަވާބުދާރީ ވުމުގެ ފުރުސަތު ދެއްވުމަށް ވެސް އޭނާ ވަނީ އެދިވަޑައިގެންފަ އެވެ.

ރަމްކަލާވަން ވިދާޅުވީ އޭނާ 2023 ވަނަ އަހަރުގެ ޖޫން 11-14 އަށް ދިވެހިރާއްޖެއަށް ކުރެއްވި ރަސްމީ ދަތުރުގައި ގަތަރުގެ އިންވެސްޓަރުންނާ ބައްދަލުކުރައްވައި ރަށުގެ ކަންކަމުގައި މަޝްވަރާކުރެއްވި ކަމަށް އޮތް ތުހުމަތު ވެސް ކޮމިޝަނުން ބަލަން ނިންމާފައި ވާތީ އެކަމުގެ ތަފްސީލް ވެސް ދެއްވާނެ ކަމަށެވެ. އެ ދަތުރާ ބެހޭ ހުރިހާ މައުލޫމާތެއް ހާމަކުރައްވާނެ ކަމަށާއި އެކަމާ ގުޅޭ ގޮތުން ފޮރިން މިނިސްޓްރީގައި ހުރި މައުލޫމާތު ވެސް ހާމަކޮށް އެ މިނިސްޓްރީން ވެސް އެއްބާރުލުން ދޭނެ ކަމަށް އުންމީދުކުރައްވާ ކަމަށް ވިދާޅުވި އެވެ.

ނާޒުކު ތިމާވެއްޓެއް އޮންނަ އަދި ދުނިޔޭގެ އެހެން އެއްވެސް ތަނަކުން ނުފެންނަ އެތައް ދިރުމެއް ފެންނަ ރަށުގައި މަތީ ފެންވަރުގެ ރިސޯޓެއް ތަރައްގީކުރުމުގެ މައްސަލަ އަކީ މިދިޔަ އޮކްޓޫބަރު މަހުގެ 26 ވަނަ ދުވަހު ވެރިކަމާ ހަވާލުވެ ވަޑައިގަތް ޕެޓްރިކް ހާމިނީ އިންތިހާބަށް ކެމްޕެއިން ކުރެއްވި އިރު އެންމެ ބޮޑަށް ނެންގެވި އެއް މައްސަލަ އެވެ. ކުރީގެ ރައީސް ރަމްކަލަވަންގެ މައްޗަށް ދެ ވަނަ ބުރުގައި 52.7 ޕަސެންޓުގެ ވޯޓުން ކާމިޔާބު ހޯއްދެވުމުގައި ހާމިނީގެ އެންމެ ވަރުގަދަ އެއް ހަތިޔާރަކަށް ހެއްދެވީ ވެސް މި ރަށުގެ މައްސަލަ އެވެ.

އޭނާ ވިދާޅުވެފައިވާ ގޮތުގައި އެ ރަށުގެ ޑީލުން ސީޝެލްއަށް ލިބުނީ "ޕީނަސްޓް" އެވެ. އިންތިހާބު ކާމިޔާބުކުރައްވައި ވެރިކަމާ ހަވާލުވެ ވަޑައިގަތުމުގެ ކުރިން ވެސް އޭނާ ވަނީ ޕްރޮޖެކްޓް ހުއްޓުވާނެ ކަމަށް ވިދާޅުވެފަ އެވެ.

ސީޝެލްސްގެ އަލްޑަބްރާ އަތޮޅުގައި އޮންނަ އެސޮމްޕްޝަން އައިލެންޑަކީ ދުނިޔޭގެ އެއްވެސް ހިސާބަކުން ނުފެންނަ 400 އަށް ވުރެ ގިނަ ދިރުމުގެ މަންޒިލެކެވެ.

މެދުއިރުމަތީގެ އިންވެސްޓްމަންޓް ކުންފުންޏެއް ކަމަށްވާ އެސެޓްސް ގްރޫޕް މެދުވެރިކޮށް ގަތަރުން ދަނީ ސީޝެލްސްގެ މައި ރަށް މާހޭގެ ހުޅަނގު ދެކުނުން 1،140 ކިލޯމީޓަރު ދުރުގައި އޮންނަ އެސޮމްޕްޝަން އައިލެންޑްގައި 40 ލަގްޒަރީ ވިލާ އިމާރާތް ކުރަމުންނެވެ. އަދި އެގްޒެކެޓިވް ޖެޓްތައް ބެހެއްޓުމަށް އެއާ ސްޓްރިޕް ވެސް ވަނީ އަލުން ހަދައިފަ އެވެ.

ރަމްކަލާވަން ވަނީ މިއީ ސީޝެލްސްއަށް ބޭރުގެ އިންވެސްޓްމަންޓްތައް ގެނައުމުން މުހިންމުވެފައި ވާތީ ގައުމުގެ މަންފާއަށް ހެއްދެވި ޑީލެއް ކަމަށް ވިދާޅުވެ ދިފާއުގައި ވާހަކަ ދައްކަވައިފަ އެވެ. މި އެއްބަސްވުމުގެ ދަށުން ގަތަރުގެ ކުންފުންޏަށް އެ ރަށް 70 އަހަރަށް ކުއްޔަށް ދޫކޮށްފައިވަނީ 20 މިލިއަން ޑޮލަރު (15 މިލިއަން ޕައުންޑް) ގެ ޑައުންޕޭމަންޓާ އެކު އެވެ.