އޮޅުންބޮޅުން: ފަހަތަށް އެއް ފިޔަވަޅު

ޓެލެވިޒަން މޯލްޑިވްސް (ޓީވީއެމް) އަށް 39 އަހަރު ފުރުނީ އެވެ. ފާއިތުވި 39 އަހަރުގެ ތެރޭގައި އެ ސްޓޭޝަނުން ވަނީ ރައްޔިތުންނަށް ޚަބަރު ގެނެސްދިނުމުގައްޔާއި މުނިފޫހިފިލުވައިދިނުމުގެ ގޮތުން ބަލައިގެނެވޭ ފަދަ މަސައްކަތްތަކެއް ކޮށްދީފަ އެވެ. ސަރުކާރުން ކުރާ ތަރައްޤީގެ މަސައްކަތްތަކުގެ ޚަބަރު ވަރަށް ރަނގަޅަށް ގެނެސްދީފައިވެ އެވެ. އިޖްތިމާޢީ ގޮތުން ވެސް، ރައްޔިތުން ހޭލުންތެރިކުރުމުގެ ގޮތުން ކޮންމެވެސް ވަރެއްގެ މަސައްކަތްތަކެއް ކޮށްދީފަ އެވެ. އަޅުގަނޑުގެ ނަޒަރުގައި ރައްޔިތުން ހޭލުންތެރިކުރުވުމަށާއި، ރައްޔިތުންނަށް މަގުދައްކައިދިނުމަށާއި، ރައްޔިތުންގެ ކިބައިގައި ރަނގަޅު އާދަތައް އަށަގެންނެވުމަށާއި، ރާއްޖެ އާއި ބޭރުގެ ޚަބަރު ރައްޔިތުންނަށް ގެނެސްދިނުމަށް އެންމެ ބޮޑު ޚިދުމަތެއް ކޮށްދީފައި ވަނީ "ދިވެހިރާއްޖޭގެ އަޑެވެ." އެއީ ހަގީގަތުގައި ވެސް ދިވެހި ރާއްޖޭގެ އަޑެވެ.

ޓީވީއެމް އުފަންވީއްސުރެ، އެތަނަކީ ކޮންމެވެސް ނުފޫޒެއް ނުވަތަ ކުލައެއްގެ ދަށުން ހިނގަމުން އަންނަ ތަނެކެވެ. ކުލަތައް ރާއްޖޭގެ ސިޔާސީ މައިދާނަށް ތަޢާރަފްވުމުގެ ކުރިން ޓީވީއެމް ދާނެ މަގު އަންގައިދެނީ ކޮންމެވެސް މުހިއްމު ގެއަކުން އަންނަ ފޯނަކުން ކަމުގައި އެތަނުގައި އޭރު މަސައްކަތްކުރެއްވި އިސް ބައެއް ވެރިން ވިދާޅުވި އެވެ. ޓީވީއެމް ހުޅުވައިގެން ހިންގަން ފެށުނު އިރު އެދުވަހު ފޮނުވާނީ ކޮން އާޓިސްޓެއްގެ ލަވަކަން ވެސް އަންގަވަނީ މި ދެންނެވި ފޯނުން ކަމަށްވެ އެވެ. އޭގެ ފަހުން ޖަހާނެ ލަވައިގެ ބައި ހުއްޓިފައި ދެން އައީ ޚަބަރާ ބެހޭ ގޮތުން އަންނަ އެއްކަލަ ކަހަލަ ފޯނެވެ. މިފަހަރު ގެއަކުންނެއް ނޫނެވެ. އޮފީހަކުންނެވެ. އެކަމަކު އެއް ބުރަދަނެއްގަ އެވެ. ބައެއް ޤައުމުތަކުގައި ހިނގާ ބައެއް ކަހަލަ ޚަބަރު ނުދެއްކުމަށް ވެސް އަނގާކަމުގައިވެ އެވެ. ސެޓަލައިޓް މެދުވެރިކޮށް ޚަބަރު ލިބެން ފެށުމަށް ފަހުގައި ވެސް މިގޮތަށް ކަންތައް ހިނގި ކަމަށްވެ އެވެ. އޭރުވެސް ރާއްޖޭގައި ބޭރުގެ ބަސްތައް ދަންނަ މީހުން މިހާރު ތިބިވަރަށް ނެތް ކަމުގައި ވިޔަސް ފުދޭވަރަކަށް ގިނަ އެވެ. ޓީވީއެމް އިން ކުރިން ދެންނެވި ޒާތުގެ ޚަބަރު ނުގެނެވުނުސް އެފަދަ ޚަބަރަށް ޝަޢުޤުވެރިވާ މީހުންނަށް ވާނުވާ ވަރަށް ރަނގަޅަށް އޮޅުންފިލާނެ އެވެ. ރާއްޖޭގެ ސިޔާސީ މައިދާނަށް ކުލަތައް ތަޢާރަފް ވުމަށް ފަހު ޓީވީއެމްގައި ކުލަ ޖެހެން ފެށި އެވެ. އެއިރެއްގައި އޮންނަ މޫސުމެއްގެ ކުލަ އެވެ. ފުރަތަމަ ނޫކުލަ އެވެ. އެއަށް ފަހު ރީނދޫ ކުލަ އެވެ. މިހާރު އަސުރުމާ ކުލަ އެވެ.

ޓީވީއެމްގެ ބެލެނިވެރި ކުންފުނި ޕީއެސްއެމް އުފެދުނީ ވަކި ފަރާތަކަށް ނުޖެހި ޚަބަރު ގެނެސްދޭންކަމަށް އެތަން އުފެއްދިއިރު އިޢްލާނުކުރި އެވެ. އެތަން ވެސް އުފައްދާފައިވަނީ އަޅުގަނޑުމެން ޓެކްސް އަށް ދައްކާ ފައިސާއިންނެވެ. ރައްޔިތުންގެ ފައިސާ އިން ހިންގާ ތަންތަނުގައި ހަމަހަމަކަން އޮންނަން ޖެހެ އެވެ. އަމިއްލަ މީހެއްގެ ފައިސާ އިން ހިންގާ ތަންތަނުގައި ވެރިމީހާ ބޭނުން ގޮތަކަށް ކަންތައް ކުރިޔަސް ބުނެވޭނެ އެއްޗެއް ނުއޮންނާނެ އެވެ.

އަޅުގަނޑު މެންދުރުގެ ޚަބަރު ގަޑީގައި އިސްކަންދެނީ ސަރުކާރުގެ ސްޓޭޝަނަށެވެ. އެއީ ސަރުކާރުން ކުރާ ތަރައްޤީގެ މަސައްކަތް ދެނެގަންނާށެވެ. އެއީ ސަރުކާރުގެ ޕުރޮޕެގެންޑާ އަށް ވިޔަސް އެމަސައްކަތްތައް އަޅުގަނޑުގެ މަޢުލޫމާތަށް ބޭނުންވަނީ އެވެ. މިހެންވުމާ އެކު އެގަޑިއަށް އަޅުގަނޑު ހުސްވޭތޯ ބަލަމެވެ. ޓީވީއެމްގެ ސިޔާސަތު ރާވާ ފަރާތަށް އެންމެ މުހިއްމުކަން ކުޑައީ ޚަބަރުކިޔާ ގަޑިކަމަށް ވަރަށް ގިނަ ފަހަރު އަޅުގަނޑަށް އިޙްސާސް ކުރެވެ އެވެ. ސަބަބަކީ އެގަޑީގައި ކޮންމެވެސް އެހެން އެއްޗެއް ދައްކާތީވެ އެވެ. ރައީސުލްޖުމްހޫރިއްޔާގެ ވާހަކަފުޅު ޤައުމީ ޓީވީން ގެންނަން ޖެހޭނެ އެވެ. އެއްބަސްވަމެވެ. ދާދި ފަހުން އަޅުގަނޑުމެންނަށް ޚަބަރުގެ ވަގުތުގައި ދެއްކީ ޕީޕީއެމްގެ ޕާލަމެންޓުރީ ގުރޫޕް އިން ބޭއްވި ނޫސްވެރިންގެ ބައްދަލުވުމެކެވެ. ހަމަ އެގޮތަށް ރައްޔިތުންގެ މަޖިލީހުގެ ނައިބް ރައީސް ބޭއްވެވި ބައްދަލުވުމެއް ވެސް ޚަބަރުގެ ގަޑީގައި ދައްކާފައިވެ އެވެ. ޚަބަރު ގަޑި އަތުލެއްވީ އިތުރަށް ފައިސާ ދައްކައިގެން ކަމަށް ވެސް ވެދާނެ އެވެ. އަގު ޖެހުނީމާ މުންޑު ބާލާފައި ވިއްކާލާފައި ރަނގަވާޅުގައި ގެއަށް ދާންވީ ބާވަ އެވެ؟ ރަނގަޅު އަގެއް ލިބުމުން ޓީވީއެމަށް ދޫކޮށްލަން ވަރަށް އުންދަގޫވާނެކަން އެނގެ އެވެ. އެނާޖީ ޑުރިންކުގެ ނުރައްކާތެރިކަމުގެ ވާހަކަ ސަރުކާރުގެ ސިއްޙީ ދާއިރާއިން އަންގަވަމުން ގެންދަވަނީ އެވެ. އަދި އެބުއިމުން ރައްޔިތުން ދުރުކުރުމަށް މި ވަގުތަށް ސަރުކާރުން އެޅެން އޮތް ހުރިހާ ފިޔަވަޅެއް އަޅަމުން ގެންދަނީ އެވެ. ސްކޫލު ކުދިން އެ ބުއިމުން ދުރުކުރުމަށް ތަޢުލީމީ ދާއިރާ އިން ވެސް މަސައްކަތް ކުރައްވަމުން ގެންދަވަނީ އެވެ. އެހެންނަމަވެސް ޓީވީއެމުން ގަދައަށް އެ ބުއިން އިޝްތިހާރު ކުރަމުން ގެންދަނީ އެވެ. އެ ސްޓޭޝަނުގެ އެންމެ މަޤްބޫލު ޕޮރޮގްރާމްގަ އެވެ. "ހަކުރުދެންޏާ ބޮޑުބޭބެ" އެވެ.

ޓީވީއެމްގެ 39 ވަނަ އަހަރީ ދުވަހުގެ މުނާސަބާގައި ވާހަކަދެއްކެވި ވެރިއަކު ވިދާޅުވި ގޮތުގައި އަދިވެސް އެބޭފުޅުން ގެންގުޅުއްވަނީ ޓީވީއެމް އުފެއްދެވި ބޭފުޅުން ގެންގުޅުއްވި ބައެއް ސާމާނެވެ. ކޮން ފަދަ ބޮޑު އިތުރުފުޅެއްތޯ އެވެ؟ ޓީވީއެމް ފެށުނީ ޖަޕާނުގެ ސަރުކާރުގެ ފަރާތުން ހަދިޔާއެއްގެ ގޮތުގައި ދެއްވި ސާމާނުންނެވެ. އަހަރުތަކަކަށް ފަހު ޓީވީއެމް އާއި ދިމާވި މައްސަލައަކީ އެ ސާމާނުގެ ސްޕެއާގެ ބައިތައް ނުލިބުމެވެ. އެވައްތަރުގެ ސާމާނު އުފެއްދުން އެ ކުންފުނީން ހުއްޓާލީ އެވެ. ޓެކްނޮލަޖީ ބަދަލުވީ އެވެ. ނަތީޖާ އަކަށްވީ ޓީވީއެމުން އަލުން ސާމާނު ހޯދަން ޖެހުމެވެ. މިޒަމާނުގައި ޓެކްނޮލޮޖީ ބަދަލުވާ ހަލުއިކަމުން އެންމެ ކުޑަމިނުން ގެއެއްގައި ހަރުކޮށްފައި ހުންނަ އިލެކްޓްރޯނިކް ރަނގަބީލަށް ވެސް ދެތިން އަހަރު ފަހުން މައްސަލައެއް ޖެހެއްޖި ނަމަ އެސިސްޓަމްގެ ސްޕެއާއެއް ހޯދުމަކީ އުނދަގޫކަމަކަށް ވެއެވެ. ޓެކްނޮލޮޖީ ބަދަލުވާ ހަލުއިކަމުންނެވެ.

އަޅުގަނޑުގެ ނަޒަރުގައި ޓީވީއެމް މެދު އުމުރަށް އަޅައިގަތުމުން ކުރިއަށް ހިނގުމުގެ ބަދަލުގައި ހިނގަން ފެށީ ފަހަތަށެވެ. އެންމެ ފަހުން އެނިންމީ ކާޓޫނު ދެއްކުން ހުއްޓާލާށެވެ. ކުދިންގެ ހިތަށް ޤައުމިއްޔަތުކަން ވައްދައިދޭން ވެގެން ކަމަށް ބުނެ ދިވެހި ކާޓޫނު އުފައްދަނީ ކަމަށް ބުނެ އެވެ. ޤައުމިއްޔަތުކަން ވައްދައިދެނީ ކާޓޫނުންތޯ އެވެ؟ ޓޮމް އެންޑް ޖެރީގައި އުޅޭ ގޮތަށް ކަންތައް ކުރެވިދާނެކަމަށް ވަރަށް ކުޑަކުދިންނަށް ހީވެދާނެ އެވެ. އެކަމަކު ކުޑަދުވަސްކޮޅަކަށް ފަހު އެއީ ކާޓޫނުކަން އެކުދިންނަށް ވެސް އެނގޭނެ އެވެ. ތަރުބިއްޔަތުގެ މައްސަލައަކީ ކާޓޫނެއް ނޫނެވެ. ތަރުބިއްޔަތުގެ މައްސަލައަކީ ކުއްޖާ ބޮޑުވަމުން އަންނަ މާޙައުލެވެ. ގެއެވެ. ބޯޑިންގެވެ. ސްކޫލެވެ. ފަހުން އޮފީހެވެ. ޚިދުމަތު ދޭ ތަނެވެ. މިސާލަކަށް ދަންނަވާ ނަމަ ސިފައިންގެ ގެ އެވެ. ފުލުހުންގެ ޚިދުމަތް ދޭ ތަނެވެ. މިދެންނެވީ ވަކި ގޮތަށް މީހުން ބައްޓަންކުރާ ތަންތަނުގެ ވާހަކަ އެވެ.

ސަލާންގަލާންކުރުމަކީ ދުނިޔޭގެ ހުރިހާ ތަނެއްގައި ވެސް ރީތި އަދަބެވެ. ތިމާއަށް ވުރެ ދޮށީ މީހުންނަށް އިޙްތިރާމް ކުރުމާއި ވެރިންނަށް އަދަބުވެރިކަމާ އެކު ކަންތައް ކުރުމަކީ ހުރިހާ ޤައުމެއްގައި ވެސް ޤަބޫލުކުރާ ގޮތެވެ. ރާއްޖޭގައި ވެސް އެއްޒަމާނެއްގައި އެކަންތައް އޮތީ އެގޮތަށެވެ. ބޭރު ޤައުމުތަކުގައި އަދިވެސް އެކަންތައް އޮންނަނީ އެގޮތަށެވެ. މީގެ ސަތޭކަ ވަރަކަށް އަހަރުގެ ކުރިން އަޅުގަނޑުމެންގެ މަޝްހޫރު ޅެންވެރިޔަކު ވިދާޅުވެފައި ވަނީ ތެދުކަން، ސަރުކާރުގެ ބައެއް އިސް ބޭފުޅުން ވަނަވަރު މޫނު (ފޭސްބުކް) ގައްޔާއި އެފަދަ އެހެން އިޖްތިމާއި ސައްލާކުރެވޭ ތަންތާގައި ލިއުއްވާ ލިއުމުން އެނގެ އެވެ. "ތަރުބިއްޔަތެއް ނެތުމާއެކީ ތަޢުލީމަކީ ލިބެވޭ ފަރުވާއެކޭ އަދި ބޭހެކޭ ބައްޔަށް ލުއެއް ނުލިބޭ" ކަމެވެ.

އަޅުގަނޑުމެން ޤަބޫލުކުރާ ކަންތައްތައް ޤަބޫލުކުރާ، އަޅުގަނޑުމެންނާ ރައްޓެހި ބައެއް ޤައުމުތަކުން، މިޒަމާނުގެ ޙާލަތު މަޖުބޫރުކޮށްގެން އެތަނުން ވަދެފައި އޮތް ތޮށިގަނޑުގެ ތެރެއިން ނުކުންނަނީ އެވެ. އަޅުގަނޑުމެން މިތިބީ ތޮށިގަނޑުގެ ތެރެއިން ނުކުމެ އެވެ. އެކަމަކު އަޅުގަނޑުމެންނަށް މަގުދައްކާ މީހުން ބޭނުންވަނީ އެމީހުންގެ މުހުތާދެއްގައި އެތޮށިގަނޑުގެ ތެރެއަށް އަޅުގަނޑުމެން ވައްދާށެވެ. އެހެންވެއްޖެ ނަމަ އަޅުގަނޑުމެންގެ މުސްތަޤްބަލު ބަނަ އެވެ. އޮޅުދޫކަރަ އާއި އުތުރުކަރައަށް ވެސް ދަތުރުކުރަން އުނދަގޫވެދާނެ އެވެ.