މަސްވެރިކަމުގެ މަޝްރޫއަކަށް ވޯލްޑް ބޭންކުން 18 މިލިއަން ޑޮލަރު ދޭން ނިންމައިިފި

ސަރުކާރުން ކުރިއަށްގެންދަން ނިންމާފައިވާ "މޯލްޑިވްސް ސަސްޓެއިނަބްލް ފިޝަރީޒް ރިިސޯސަސް ޑިވެލޮޕްމަންޓް ޕްރޮޖެކްޓް"ގެ ފުރަތަމަ ފިޔަވައްސަށް ވޯލްޑް ބޭންކުން 18 މިލިއަން ޑޮލަރު (277 މިލިއަން ރުފިޔާ) ދޭން ނިންމައިފި އެވެ. މިއީ މަސްވެރިކަމުގެ ސިނާއަތް ތަރައްގީކުރަން ހިލޭ އެހީގެ ގޮތުގައި މިހާތަނަށް ލިބުނު އެންމެ ބޮޑު އެހީކަން މިނިސްޓްރީން ފާހަގަކުރެ އެވެ.

ފިޝަރީޒް މިނިސްޓްރީން މިއަދު ނެރުނު ބަޔާނުގައި ބުނީ "ކަނޑުފަޅުގެ ފައިދާ ނެގުން" ވައުދުގެ ދަށުން ހިންގާ މި ޕްރޮޖެކްޓުގެ ފުރަތަމަ ފިޔަވަހި މިއަހަރުން ފެށިގެން 2021 ވަނަ އަހަރާ ހަމައަށް ކުރިއަށްގެންދާނެ ކަމަށެވެ. އަދި ފުރަތަމަ ފިޔަވަހި ކާމިޔާބު ކަމާއެކު ކުރިއަށް ގެންދެވިއްޖެ ނަމަ، ދެ ވަނަ ފިޔަވަހީގެ މަޝްރޫއަށް ވެސް ފައިސާ ހަމަޖެހިގެންދާނެ ކަމުގެ ޔަގީންކަން ވޯލްޑް ބޭންކުން ދީފައިވާ ކަމަށް ބަޔާނުގައި ބުންޏެވެ.

ވޯލްޑް ބޭންކާއެކު ފުރަތަމަ މަޝްވަރާ ކުރީ ނުވަ މިލިއަން ޑޮލަރު ހޯދުމަށް ކަމަށާއި ނަމަވެސް އެ އެހީ 18 މިލިއަން ޑޮލަރަށް އިތުރުވެގެން ދިޔައީ، ބަޔާނުގައި ބުނެފައިވާ ގޮތުގައި، މަސްވެރިކަން ތަރައްގީކުރަން ރާއްޖެއިން ސަރަހައްދީ ފެންވަރުގައި ކުރަމުން އަންނަ މަސައްކަތްތަކުގެ ސަބަބުން ކަމަށެވެ.

ސަސްޓެއިނަބްލް ފިޝަރީޒް ރިިސޯސަސް ޑިވެލޮޕްމަންޓް ޕްރޮޖެކްޓްގެ ދަށުން ކުރިއަށް ގެންދަން ނިންމާފައިވާ ކަންތައްތަކުގެ ތެރޭގައި ފަހުގެ ޓެކްނޮލޮޖީގެ އެހީއާއެކު މަސްވެރިންނަށް ފަސޭހަކަމާއެކު ބޭނުންކުރެވޭނެ ފުރިހަމަ ވެސެލް ލޮކޭޓިން ޑިވައިސް ސިސްޓަމެއް ގާއިމްކުރުން ހިމެނެ އެވެ.

އެ ނިޒާމް ގާއިމްކުރުމުން، ދިވެހިން ބާނާ މަހަށް އެންމެ ރަނގަޅު އަގު ހޯދުމަށްޓަކައި ބައިނަލްއަގުވާމީ ގޮތުން ލާޒިމްކުރާ ތަފާސްހިސާބުތައް ފަސޭހަކަމާއެކު ލިބޭނެކަން ބަޔާނުގައި ފާހަގަކޮށްފައި ވެ އެވެ. އަދި އެ ނިޒާމުގެ ސަބަބުން މަސްވެރިން ހޭދަކުރަންޖެހޭ ހަރަދު އެތައް ގުނައެއް ކުޑަވެގެންދާނެ ކަމަށް ވެސް ބުންޏެވެ.

ރާއްޖެ ބައިވެރިވެފައިވާ ސަރަހައްދީ ޖަމިއްޔާތަކަށް، މަސްވެރިކަން ބެލެހެއްޓުމަށްޓަކައި ހުށަހަޅަންޖެހޭ ތަފާސްހިސާބުތައް ނެގުމަށް 20 އިލެކްޓްރޯނިކް އޮބްޒާވާ ސިސްޓަމާއި ފަރުމަސްވެރިކަމުގެ މައުލޫމާތު ނެގުމަށްޓަކައި ޕީޑީއޭ ވަސީލަތްތަކެއް ވެސް އެ ޕްރޮޖެކްޓުގެ ތެރެއިން ތައާރަފްކުރެވިގެންދާނެ ކަމަށް ފިޝަރީޒް މިނިސްޓްރީން ބުންޏެވެ. މީގެ އިތުރުން "އެން ވަތް" ބަދަލުކުރުމަށްޓަކައި މަސްވެރިންނަށް ލުއި ލޯނު ދޫކުރަން ވެސް ވަނީ ހަމަޖައްސައިފަ އެވެ.

ވަކި ސިނާއަތެއްގެ ގޮތުގައި މެރިކަލްޗާ ގާއިމްކުރަން ސަރުކާރުން ކުރަމުން އަންނަ މަސައްކަތްތަކަށް އެހީތެރިވުމުގެ ގޮތުން، އެ ޕްރޮޖެކްޓްގެ ދަށުން ތަފާުތު ބާވަތްތައް އާލާކުރާނެ މަލްޓި ސްޕީސިސް ހެޗަރީއެއް ގާއިމްކުރާނެ އެވެ. މެރިކަލްޗާ މަސައްކަތް ކުރަން ޝައުގުވެރިވާ އާއްމުންނަށް ހެޗަރީން ތަފާތު ބާވަތްތަކުގެ ޅަދިރުން ފަސޭހަކަމާއެކު ލިބޭނެ ގޮތް ހަމަޖެހިގެންދާނެ ކަމަށް ފިޝަރީޒް މިނިސްޓްރީން ނެރުނު ބަޔާނުގައި ބުންޏެވެ.

އެ މަސައްކަތުގެ ފުރަތަމަ ދެ އަހަރު އަމާޒުކޮށްފައިވަނީ ފާނަ އާއި އެން އާލާކުރުމަށެވެ. އެ މަސައްކަތް ކުރަން ބޭނުންވާ މީހުންނަށް ލޯނު ވެސް ދޭނެ ކަމަށާއި އާމްދަނީ ހޯދޭނެ އިތުރު މަގުފަހިވެ، ޒުވާނުންނަށް ވަޒީފާގެ ފުރުސަތު ފަހިވެ ފުދުންތެރި މުޖުތަމައެއް ގާއިމްކުރަން މަގުފަހިވެގެންދާނެ ކަމަށް ވެސް މިނިސްޓްރީން ބުންޏެވެ.