ކަނޑުފޭރޭ މީހުން ގެންދިޔަ ފަޅުވެރިން ސަލާމަތްކޮށްފި

މޮގަދިޝޫ (އެޕްރީލް 13) - މި މަހު ކުރީކޮޅު ސޯމާލިއާގެ ކަނޑުފޭރޭ މީހުން ފޭރިގަތް އިންޑިއާގެ ކާގޯ ބޯޓުން ގެންދިޔަ ފަޅުވެރިން ސަލާމަތްކޮށްފި އެވެ.

ބޯޓު ދޫކޮށްލުމަށް ފަހު އެ ބޯޓުގައި ތިބި 11 ފަޅުވެރިންގެ ތެރޭން ނުވަ މީހުން ގޮވައިގެން ކަނޑު ފޭރޭ މީހުން ފިލުމުން އެ މީހުން ހޯދުމަށް ސޯމާލިއާ ސިފައިން ވަނީ އޮޕަރޭޝަނެއް ފަށައިފަ އެވެ.

ބޯޓުގެ ކެޕްޓަން ސާލިމް އުސްމާން ބުނީ އެ މީހުން ސަލާމަތްވުމުގެ ކުރިން ކަނޑުފޭރޭ މީހުންގެ އަތް ދަށުގައި ނުވަ ދުވަހު ތިބެން ޖެހުނު ކަމަށެވެ.

އިންޑިއާގެ ގުޖްރާތު ސްޓޭޓަށް ނިސްބަތްވާ އުސްމާން ބުނީ އަލް ކައުސަރު ބޯޓަށް ކަނޑުފޭރޭ މީހުން އެޕްރީލް 1 ވަނަ ދުވަހު ހަމަލާ ދިން އިރު ބޯޓު ދަތުރު ކުރަމުން ދިޔައީ ދުބާއީ އިން ސޯމާލިއާގެ ބޯސާސޯ ސިޓީ އަށް ކަމަށެވެ.

"ކަނޑުފޭރޭ މީހުން އެދުނީ ފައިސާ އަށް. އަދި ކަނޑުފޭރުމުގެ ހާދިސާތަކުގައި އަތުލައިގަނެގެން އިންޑިއާގެ ޖަލުތަކުގައި ތިބި މީހުން ދޫކޮށްލުމަށް ވެސް އެދުނު،" އުސްމާން ބުންޏެވެ.

އޭނާ ބުނީ ބޯޓުގެ ފަޅުވެރިންނަށް ކަނޑުފޭރޭ މީހުން ބިރުދައްކާ އަނިޔާކޮށް ހަދާފައި ނުވާ ކަމަށެވެ. އަދި އެންމެ އުނދަގޫވީ ކާބޯތަކެތި ނުލިބުމުން ކަމަށް ވެސް އޭނާ ބުންޏެވެ.

"އަހަރެމެން ގެންގުޅުނީ ޖަންގަލި ތެރޭ. ބައެއް ފަހަރު ދެ ދުވަސްވަންދެން ވެސް ކާނެ އެއްޗެއް ނުލިބިދޭ. ސަލާމަތީ ސިފައިން ފަހާ ދުއްވާތީ ކަނޑު ފޭރޭ މީހުން ވެސް ތިބީ ވަރުބަލިވެފައި،" އުސްމާން ބުންޏެވެ.

އޭނާ ބުނީ ސޯމާލިއާ އާއި ޔޫއޭއީއާ ދެމެދު ދަތުރު ކުރާތާ މިހާރު 13 އަހަރު ވެއްޖެ ކަމަށާއި އެކަމަކު މިއީ ކަނޑުފޭރުމުގެ ހާދިސާއެއް ދިމާވި ފުރަތަމަ ފަހަރު ކަމަށެވެ. އަދި މި ހާދިސާގެ ބިރުވެރިކަމާ ގުޅިގެން އޭނާ ބުނީ އަމިއްލަ ގައުމަށް ގޮސް އަހަރެއްހާ ދުވަހު އަރާމުކޮށްލާނީ ކަމަށެވެ. އަދި ގޮތެއް ނިންމާނީ އެއަށް ފަހު ކަމަށް ވެސް ބުންޏެވެ. އުސްމާން ބުނީ އަންބަކާއި 18 މަހުގެ ދަރިއަކު އޭނާގެ ހުންނަ ކަމަށެވެ.

ސޯމާލިއާގެ ސަރަހައްދުގައި ހިންގާ ކަނޑުފޭރުމުގެ ހާދިސާތައް ފަހަކަށް އައިސް ވަނީ އިތުރުވާން ފަށައިފަ އެވެ. ދެހާސް ބާރަ ވަނަ އަހަރުގެ ފަހުން ސޯމާލިއާގެ ސަރަހައްދުގައި ކަނޑުފޭރުމުގެ ފުރަތަމަ ހާދިސާ ހިންގާފައި ވަނީ މިދިޔަ މަހު އެވެ. ކަނޑު ފޭރުމުގެ ހާދިސާތައް 2011 ވަނަ އަހަރު އިންތިހާ އަށް މައްޗަށް ދިއުމުން ބައިނަލްއަގުވާމީ ސިފައިން ވަނީ އެ ސަރަހައްދު ވަރަށް ރަނގަޅަށް ބަލަހައްޓަން ފަށައިފަ އެވެ.