ރިޔާޒު އަނެއްކާ ވެސް ފުލުސް އޮފީހަށް ހާޒިރުވާން އަންގައިފި

ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަދި ކުރީގެ ޕޮލިސް ކޮމިޝަނަރު އަބްދުﷲ ރިޔާޒު ފުލުސް އޮފީހަށް ހާޒިރުވުމަށް ފުލުހުން އަންގައިފި އެވެ.

ރިޔާޒު ވިދާޅުވީ ފުލުހުން ތަހުގީގު ކުރަމުންދާ މައްސަލައަކާ ގުޅިގެން، ސުވާލު ކުރުމަށް މިރޭ 8:30ގައި ފުލުސް އޮފީހަށް ހާޒިރު ވުމަށް އޭނާއަށް އަންގާފައިވާ ކަމަށެވެ.

ފުލުސް އޮފީހަށް ހާޒިރުވުމަށް ރިޔާޒަށް އެންގި އިރު ގާނޫނު ތަންފީޒުކުރާ މުވައްޒަފެއްގެ ވާޖިބަށް ގަސްދުގައި ހުރަސް އެޅުމުގެ ދައުވާ އޭނާގެ މައްޗަށް ކޮށް، ޝަރީއަތް މިހާރު ދަނީ ކުރިއަށެވެ. އެއީ ރިޔާޒުގެ މައްޗަށް ތުހުމަތު ކުރެވުނު މައްސަލައެއްގައި ކޯޓު އަމުރެއްގެ ދަށުން އޭނާގެ ފޯނު ހިފަހައްޓައި، ފޯނު ހުޅުވަދޭން ފުލުހުން އެދުމުން އެކަން ނުކުރި ކަމަށް ބުނެއެވެ.

އެ ދައުވާއަށް ރިޔާޒު އިންކާރު ކުރެ އެވެ.

އެކަމަކު އެންމެ ފަހުން ބޭއްވި ޝަރީއަތުގެ އަޑުއެހުމެއްގައި ފުލުހަކު ވަނީ ފޯނު ފުލުހުންގެ ތަހުގީގެއްގައި ހިފަހައްޓާފައި ވަނިކޮށް އެ ފޯނު ނިއްވާލީ ރިޔާޒް އަމިއްލަ އަށް ކަން އެނގިފައިވާ ކަމަށް ބުނެފަ އެވެ. ނަމަވެސް އަޑުއެހުމުގައި ހެކިބަސް ދިން ބައެއް ފުލުހުންގެ ހެކިބަސް ކޮންމެވެސް ވަރަކަށް ފުށުއަރަ އެވެ.

އެ މައްސަލައިގެ ޝަރީއަތް ނިމެންދެން ރިޔާޒް ބަންދުގައި ބެހެއްޓުމުގެ އަމުރަކަށް ދައުލަތުން ފުރަތަމަ އަޑުއެހުމުގައި އެދުނަސް ކޯޓުން ނިންމީ އެފަދަ އަމުރެއް ނެރެދެވެން ނެތް ކަމަށެވެ.

ރިޔާޒު ކުރިން ވިދާޅުވީ އޭނާ ކުށެއް ކޮށްފައި ނުވާނެ ކަމަށާއި އެއީ ސިޔާސީ ބޭނުމަކަށް ކުރާ ދައުވާއެއް ކަމަށެވެ. ރިޔާޒުގެ މައްޗަށް މި ކުށް ސާބިތުވެއްޖެ ނަމަ އެންމެ މަދުވެގެން އެއް މަހާއި ހަ ދުވަަސް އަދި ގިނަވެގެން އެއް އަހަރުދުވަހުގެ ޖަލު ހުކުމެއް އަންނާނެ އެވެ.

ރިޔާޒްގެ އިތުރުން ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ވެސް ދައުލަތުން ވަނީ ތިން ދައުވާއެއް ކޮށްފަ އެވެ. އޭނާ އަށް ދައުވާކުރަނީ މަޖިލީހުގެ މެމްބަރުންނަށް ރިޝްވަތު ދޭން އުޅުނު ކަމަށް ބުނެ އެވެ.