ވެމްކޯ އިން ހުޅުމާލޭގައި ކުނި އުކާލަން ފަށަނީ

ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން މުޅި ހުޅުމާލެ އިން ކުނި އުކައިދިނުމުގެ ހިދުމަތް ފަށަން ނިންމައި، އެކަމަށް ރަޖިސްޓްރީވުމުގެ ފުރުސަތު މިއަދު ހުޅުވާލައިފި އެވެ.

ވެމްކޯ އިން ބުނި ގޮތުގައި ކުރިއަށް އޮތް ހަތަރު ދުވަހު ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ހުޅުމާލެ ފެރީ ޓާމިނަލް ސަރަހައްދުގައި ހިދުމަތަށް ރަޖިސްޓްރީ ކުރެވޭނެ އެވެ. އޭގެ ފަހުން ވެމްކޯގެ އޮފީހާއި ވެބްސައިޓުގެ އިތުރުން އެޗްޑީސީން ވެސް ރަޖިސްޓްރީ ފޯމު ލިބޭނެ ކަމަށް އެތަނުން ބުންޏެވެ.

އެޗްޑީސީގައި ބޭއްވި ނޫސްވެރިންގެ ބައްދަލުވުމެއްގައި އެ ކުންފުނީގެ ޑިރެކްޓަރު އަހުމަދު ފާތިހު ވިދާޅުވީ މި މަހުގެ 21 އިން ފެށިގެން ހުޅުމާލޭގައި ކުނި އުކާ ދިނުމުގެ ހިދުމަތް ފަށާނެ ކަމަށެވެ. އެކަމުގެ ބޭނުމަކީ އެހެން ތަންތަނެކޭ އެއްގޮތަށް ހުޅުމާލޭގައި ވެސް އެއް އުސޫލެއްގެ ދަށުން، އެއް ކުންފުންޏެއް މެދުވެރިކޮށް ހަރުދަނާ ގޮތެއްގައި ކުނި މެނޭޖް ކުރެވޭނެ ނިޒާމު ގާއިމު ކުރުން ކަމަށް އޭނާ ވިދާޅުވި އެވެ.

އެހެންވެ، ހުޅުމާލޭގައި އުޅޭ އާންމުންގެ އެއްބާރުލުމަށް އޭނާ ވަނީ އެދިވަޑައިގެންފަ އެވެ.

ކޮމިއުނިޓީ ޑަސްބިންތައް ނަގަނީ!

އެޗްޑީސީން ބުނި ގޮތުގައި ވެމްކޯ އިން ކުނި އުކާދިނުމުގެ ހިދުމަތް ފެށުމާއެކު ހުޅުމާލޭގެ ދެ ސަރަހައްދެއްގައި ބަހައްޓާފައި ހުރި ޑަސްބިންތައް ނެގުމަށް ވަނީ ހަމަޖެހިފަ އެވެ. އެއީ ޗައިނާ ފްލެޓްތައް ހުންނަ ނިރޮޅުމަގުގައި ހުންނަ ޑަސްބިނާއި ހިތިގަސް މަގުން ސިންތެޓިކް އެތުލެޓިކްސް ޓްރެކް ކައިރީ ހުންނަ ޑަސްބިނެވެ.

ވެމްކޯ އިން ހިދުމަތް ހޯދަން ބޭނުންނުވާ ފަރާތްތަކުން ދެން ޖެހޭނީ މާލޭ ވޯޓާ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) ކުރިމަތީގައި ހުންނަ ބޮޑު ގޮނޑަށް ކުނި އުކާލާށެވެ. އެޗްޑީސީން ވެސް ބުނި ގޮތުގައި ހުޅުމާލޭގައި އުޅޭ އާންމުންނަށް އޮތީ ރަޖިސްޓްރީވުން ނުވަތަ ހުޅުމާލެ ބޮޑު ގޮނޑަށް ކުނި އުކާލުމެވެ. ހުޅުމާލެ ބޮޑު ގޮނޑު ހުންނަނީ މީހުން ދިރިއުޅޭ ސަރަހައްދާ ވަރަށް ދުރުގަ އެވެ.

ވެމްކޯ އިން ވަނީ ވީހާ ވެސް އަވަހަކަށް އާންމުން ރަޖިސްޓްރީ ކުރަން އެދިފަ އެވެ. އަދި ހުޅުމާލޭން ކުނި އުކާލަދޭނީ މާލޭގައި ވެސް އެކަން ކުރަމުން އަންނަ އުސޫލުން އެއް އަގެއްގައި ކަމަށް ވެސް އެ ތަނުން ބުންޏެވެ.

ވެމްކޯ އިން ކުނި އުކައިދޭން ނަގަނީ ގޭބިސީއަކުން މަހެއްގެ މައްޗަށް 150ރ. އެވެ. އިމާރާތަކުން ނަމަ 100ރ. އެވެ. ވިޔަފާރިކުރާ ތަންތަނުން ކުނި އުކައިދެނީ ޑަސްބިންގެ ސައިޒުން ލީޓަރަކަށް 10ރ.ގެ މަގުންނެވެ. އެއީ މިސާލަކަށް 10 ލީޓަރުގެ ޑަސްބިންއެއް ނަމަ 100ރ. އަށެވެ.

ހުޅުމާލޭގައި ކުނި އުކާލުމުގެ ހިދުމަތް ދިނުމަށް ވެމްކޯ އިން ނިންމިއިރު، މާލެ އާއި އައްޑޫގައި ކުނި އުކާދިނުމުގެ ހިދުމަތް އެ ކުންފުނިން އަންނަނީ ދެމުންނެވެ.

ކުނި އުކާލުމުގެ މައްސަލަ ބޮޑު މާލޭގައި ފަސޭހަކަމާ އެކު އެކަން ކުރެވޭނެ އިންތިޒާމް ހަމަޖައްސަން ވެމްކޯއިން ވަނީ ކޮމްޕެކްޓަ ޓްރަކް، ޑަމްޕް ޓްރަކް އަދި ޓްރައިސިކަލް ފަދަ އުނޅަދުތައް ހޯދައިފަ އެވެ. މިއީ ތިމާވެއްޓާ ރައްޓެހި އަދި އީޕީއޭގެ މިންގަނޑުތަކަށް ފެތޭ އުނޅަދުތަކެއް ކަމަށް ވެސް ވެމްކޯ އިން ބުންޏެވެ.