ދަރިވަރަކާ ގަދަކަމުން ބެހެން އުޅުނު ކަމުގެ ތުހުމަތު ކުރެވޭ އެމްއެންޔޫގެ ލެކްޗަރާ މަގާމުން ވަކިކޮށްފި

އަންހެން ދަރިވަރަކާ ގަދަކަމުން ބެހުނު ކަމަށް ތުހުމަތު ކުރެވޭ، މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ)ގެ ފިރިހެން ލެކްޗަރާ މަގާމުން ވަކިކޮށްފި އެވެ.

"މިހާރު" އަށް އެނގިފައިވާ ގޮތުގައި އެމްއެންޔޫގެ ދާއިމީ ލެކްޗަރާއެއްގެ ގޮތުގައި މަސައްކަތް ކުރި އެ މުވައްޒަފު މަގާމުން ވަކިކުރީ މިދިޔަ ހަފުތާގަ އެވެ. މި ހާދިސާ ހިނގީ ވެސް މިދިޔަ ހަފުތާގެ ތެރޭގަ އެވެ.

މި މައްސަލަ ފެންމަތިވުމާއެކު އެ މުވައްޒަފުގެ އަޚުލާގީ މައްސަލައެއް އެމްއެންޔޫން ބެލި އެވެ. އަދި އޭނާ މަގާމުން ވަކިކުރީ އެ މައްސަލަ ބެލުމަށް ފަހު އެވެ.

އެ ދަރިވަރަށް ޖިންސީ ގޯނާކުރި ކަމަށް ތުހުމަތު ކުރެވޭ މައްސަލަ ފުލުހުން ވެސް އަންނަނީ ބަލަމުންނެވެ. އަދި އުމުރުން 18 އަހަރުން ދަށުގެ އެ ކުއްޖާއާ ގަދަކަމުން ބެހެން އުޅުނު ކަމަށް ބުނާ މައްސަލަ ޖެންޑާ މިނިސްޓްރީ އަށް ވެސް ވަނީ ހުށަހަޅައިފަ އެވެ. އެކަމާ ބެހޭ ގޮތުން ސުވާލުކުރުމުން ޖެންޑާ މިނިސްޓްރީން ބުނީ އެތަނަށް މައްސަލައެއް ހުށަހަޅައިފި ނަމަ ރައްކާތެރިކަން ފޯރުކޮށްދޭން ޖެހޭ ކުއްޖެއް ނަމަ އެކަން ކޮށްދޭނެ ކަމަށެވެ. ނަމަވެސް ވަކިވަކި މައްސަލަތަކާ ގުޅޭ މައުލޫމާތު މީޑިއާއާ ހިއްސާ ނުކުރާ ކަމަށް އެ މިނިސްޓްރީން ބުނެ އެވެ.