ފުލުހުންނަށް އިންޒާރު ދިން ކަމުގެ ތުހުމަތުގައި މައުމޫން ފެކްޝަންގެ އެކްޓިވިސްޓަކު ހައްޔަރުކޮށްފި

ފުލުހުންގެ ވާޖިބަށް ހުރަސް އަޅައި، އިންޒާރުދިން ކަމަށް ބުނެ، ޕީޕީއެމްގެ ރައީސް އަދި ކުރީގެ ރައީސް މައުމޫން އަބްދުލްގައްޔޫމް ފެކްޝަންގެ އެކްޓިވިސްޓަކު މާލެއިން އިއްޔެ ހައްޔަރުކޮށްފި އެވެ.

މަސްތުވާތަކެތި ގެންގުޅޭ ކަމަށް ތުހުމަތު ކުރެވިގެން ފުލުހުން ބަލާ ފާސްކުރަން ވަން ގެއަކުން ހައްޔަރު ކޮށްފައިވަނީ މައުމޫން ފެކްޝަނުގެ ސޯޝަލް މީޑިއާ އެކްޓިވިސްޓް ރަހުމާ އައްބާސް އެވެ.

ފުލުސް އޮފީހުން ބުނިގޮތުގައި ރަހުމާ ހައްޔަރު ކުރީ ފުލުހުންގެ ވާޖިބަށް ހުރަސް އަޅައި، ބިރު ދައްކާ އިންޒާރު ދިނުމުންނެވެ.

ރަހުމާ ހައްޔަރު ކުރީ ސިޔާސީ މަގްސަދެއްގައި ކަމާއި އޭނާ ވަގުތުން ދޫކޮށްލުމަށް، ސޯޝަލް މީޑިއާގައި އެކި ފަރާތްތަކުން އަންނަނީ ގޮވާލަމުންނެވެ.

ފުލުހުން ވަނީ މަސްތުވާތަކެއްޗާ އެކު އެ ގެއިން އިތުރު މީހަކު ވެސް ހައްޔަރުކޮށްފަ އެވެ.