ޕީޕީއެމް ހިންގަނީ އިހުލާސްތެރިންނެއް ނޫން، ހަގީގީ ސަޕޯޓަރުންނާއެކު ވަރަށް އަވަހަށް އަންނާނަން: ފާރިސް

ޕީޕީއެމް މިހާރު ހިންގަނީ ޕާޓީ އަށް އިހުލާސްތެރި ބައެއް ނޫން ކަމަށާއި ޕާޓީ ހަމަ މަގަށް އަޅުވައި މަސައްކަތްތައް ވަރަށް އަވަހަށް ފައްޓަވާނެކަމަށް ކުރީގެ ރައީސް މައުމޫން އަބްދުލްގައްޔޫމުގެ ދަރިކަލުން އަދި ދިއްގަރު ދާއިރާގެ މެމްބަރު ފާރިސް މައުމޫން މިއަދު ވިދާޅުވެއްޖެ އެވެ.

ފާރިސް ކުރެއްވި ޓްވީޓެއްގައި ވިދާޅުވީ ޕީޕީއެމްގެ މަޖިލިސް މެމްބަރުންނާއި ޕާޓީގެ ހަގީގީ ސަޕޯޓަރުންނާއެކު ތަރައްގީގެ ގައުމީ މިސްރާބާ އެކު ޕާޓީ އަށް ވަރަށް އަވަހަށް އެނބުރި ވަޑައިގަންނަވާނެ ކަމަށެވެ.

ޕީޕީއެމްްގެ އެތެރޭގައި ޖެހުނު މައްސަލަތައް ހައްލުނުވެ އެ މައްސަލަ ސިވިލް ކޯޓަށް ހުށަހެޅުމުން، ކޯޓުން ވަނީ ޕާޓީގެ ހިންގުން މުޝްތަޝާރު ރައީސް އަބްުދުﷲ ޔާމީނާ ހަވާލުކޮށްފަ އެވެ. އެ އަމުރާއެކު މިިދިޔަ އަހަރުގެ ފަހުކޮޅުން ފެށިގެން ޕީޕީއެމް ހިންގަމުން އަންނަނީ ރައީސް ޔާމީންގެ ފެކްޝަނުންނެވެ.

ފާރިސް އެހެން ވިދާޅުވިއިރު، މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ ނެގުމަށް ވަނީ މި މަހުގެ 24 ވަނަ ދުވަހު ތާވަލުކޮށްފަ އެވެ. އަދި އެ މައްސަލަ ހުށަހެޅުމަށް ވެރިކަންކުރާ ޕީޕީއެމްގެ 10 މެމްބަރަކު ވެސް ވަނީ ސޮއި ކުރައްވައިފަ އެވެ.

ސަރުކާރުން އަމަލު ކުރާ ގޮތާ މެދު ހިތްހަމަޖެހިވަޑައިނުގަތް މައުމޫން ވަނީ މި ސަރުކާރަށް ކުރެއްވި ތާއީދު ވެސް އަނބުރާ ގެންދަވައިފަ އެވެ. އެއާއެކު ސަރުކާރުގެ އެކި ސިޔާސަތުތަކަށް އެ މަނިކުފާނު ގެންދަވަނީ ފާޑު ވިދާޅުވަމުންނެވެ.