ރާއްޖެ އަށް ދަތުރު ކުރުމުގައި ސަމާލުވާން އިނގިރޭސި ވިލާތުން އިލްތިމާސްކޮށްފި

ރާއްޖެ އަށް ދަތުރު ކުރުމުގައި ސަމާލުވުމަށް އިނގިރޭސި ވިލާތުން އެ ގައުމުގެ ރައްޔިތުންނަށް މިއަދު ޓްރެވަލް އެޑްވައިޒަރީއެއް ނެރެފި އެވެ.

ރައްޔިތުންގެ މަޖިލީހުގެ ބައެއް މެމްބަރުން މަޖިލީހަށް ވަންނަން އުޅުމުން އެކަމަށް ސަލާމަތީ ބާރުތަކުން ހުރަސް އަޅައި އަދި މަޖިލީހަށް ވަތް މެމްބަރުން ގަދަކަމުން އެ ތަނުން ނެރުމާ ގުޅިގެން ހިނގި ހަމަނުޖެހުންތަކާ ގުޅިގެން އިނގިރޭސި ވިލާތުން ނެރުނު ޓްރެވަލް އެޑްވައިޒަރީގައި ވަނީ ރާއްޖެ އަންނައިރު އެކަށީގެންވާ ގޮތެއްގައި ސަލާމަތީ ފިޔަވަޅުތައް އެޅުމަށާއި މީހުން ގިނައިން އެއްވާ ތަންތަނަށް ނުދިއުމަށާއި މުޒާހަރާތަކާއި ރެލީތައް ހިނގާ ސަރަހައްދުތަކަށް ނުދިއުމަށެވެ.

މީގެކުރިން ހިނގި ބައެއް މުޒާހަރާތަކުގައި ހަމަނުޖެހުން ހިނގައި، ބައެއް މީހުން ހައްޔަރު ކޮށްފައިވާ ކަން އެ އެޑްވައިޒަރީގައި ފާހަގަ ކޮށްފައިވެ އެވެ.

މިއީ މިއަދު ހިނގި ކަންތައްތަކާ ގުޅިގެން ގައުމަކުން ޓްރެވަލް އެޑްވައިޒަރީއެއް ނެރުނު ފުރަތަމަ ފަހަރެވެ.

މިއަދު ހިނގި ކަންކަމާ މެދު ކަންބޮޑުވުން ފާޅުކޮށް، ބޭރުގެ ބައެއް ޖަމާއަތްތަކުން ވަނީ ކަންބޮޑުވުން ފާޅުކޮށްފަ އެވެ.