މަޖިލީހުގައި މިއަދު އޮތީ އަަވަގުރާނަ ގޮވުމާއި ތަޅާފޮޅުން!

ރައްޔިތުންގެ މަޖިލީހުގެ މިއަދުގެ ޖަލްސާގައި، ވެރިކަން ކުރާ ޕީޕީއެމާއި އިދިކޮޅު މެމްބަރުންނާ ދެމެދު ހޫނު ޒުވާބުތަކެއް ހިނގައި، އެއް ބަޔަކު އަނެއް ބައެއްގެ ގަޔަށް އަތްލައި ތަޅާފޮޅައިފި އެވެ.

މިއަދުގެ ޖަލްސާ ވެސް ފެށީ ގިނަ އަދަދެއްގެ ސިފައިން މަޖިލީހުގެ ތަޅުމަށް ވައްދައިގެންނެވެ. މިގޮތަށް ކޮންމެ ދުވަހަކު ޖަލްސާ ބޭއްވިޔަ ނުދޭނެ ކަަމަށް ބުނެ އިދިކޮޅު މެމްބަރުން ހަޅޭއްލަވަން ފެއްޓެވުމާ އެކު، ސަރުކާރު މެމްބަރުން ވެސް ތެދުވެވަޑައިގެން ޒުވާބު ފެއްޓެވީ އެވެ.

ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ ހިމާޔަތުގައި ރިޔާސަތު ވަށައިގެން ސިފައިންގެ ފައުޖެއް ތިބިއިރު، މަސީހާ ދިމާލަށް އިދިކޮޅު މެމްބަރުން އަޑުގަދަކުރިޔަ ނުދޭންވެގެން ސަރުކާރު މެމްބަރުން މިއަދު ތިއްބެވީ ސިފައިންނާ ޖެހިގެން އަތާ އަތްގުޅާލައިގެންނެވެ.

މި މަންޒަރުތައް ބައެއް މެންބަރުން ފޭސްބުކުން ލައިވްކުރަމުން ދިޔައިރު މަޖިލީސް ތެރެއިން ފެނުނީ ވަރަށް ހުތުރު މަންޒަރުތަކެކެވެ. އެއް މެމްބަރަކު އަނެއް މެމްބަރަކަށް އަވަގުރާނަ ގޮވުމާއި ޒުވާބު ކުރުމެވެ. ޒާތީ ގޮތުން ދިމާކޮށް، ހަޑިހުތުރު ބަސްތަކުން ވާހަކަ ދެއްކެވި ތަނެވެ. އެއް ބޭފުޅަކު އަނެއް ބޭފުޅަކަށް އަދަބެއް އިހްތިރާމެއް ނެތެވެ. މި ޒުވާބުގެ ތެރޭގައި، މެދު ހެންވޭރު ދާއިރާގެ އެމްޑީޕީ މެމްބަރު އަލީ އާޒިމާއި ފަރެސްމާތޮޑާގެ ޕީޕީއެމް މެމްބަރު ހުސެއިން މުހައްމަދާ ދެމެދު ވަނީ މާރާމާރީ ހިނގައިފަ އެވެ.

އެއް ބޭފުޅަކު އަނެއް ބޭފުޅަކު ކޮއްޕައި، ހަޅޭއްލަވަމުން ގޮސް މެމްބަރު ހުސެއިންގެ އަނގަމަތީގައި އާޒިމް ޖަހާ މަންޒަރު ވީޑިއޯ އިން ފެނެ އެވެ. އެކަމާ ރުޅިގަދަވެ، އަލީ އާޒިމާ ދިމާލަށް މެމްބަރު ހުސެއިން ވަޑައިގަތުމުން އެކަން ހުއްޓުވީ އެތަނުގައި ތިއްބެވި އެހެން މެމްބަރުންނެވެ.

އެ މަރާމާރީއާ ގުޅިގެން މެމްބަރުންގެ ޒުވާނު އިތުރަށް ހޫނުވެ، ކެލާ ދާއިރާގެ މެމްބަރު އަލީ އާރިފް، އެމްޑީޕީގެ ޕާލަމެންޓްރީ ގްރޫޕުގެ ލީޑަރު އިބްރާހިމް މުހައްމަދު ސޯލިހުގެ ކޮޓަރީގެ ދޮރުގައި ކޮޅުފައިން ޖައްސަވައި ދޮރު ހުޅުވާ މަންޒަރު ވެސް ފެނެ އެވެ.

އަލީ އާރިފް އެ ކޮޓަރި އަށް ވަދެވަޑައިގެން މޭޒު މަތީ ވަރަށް ބާރަށް އަތުން ޖައްސަވައި އިބޫއާ ދިމާލަށް އަޑުގަދަކުރެއްވި އެވެ. އޭނާ އެދިވަޑައިގަންނަވަނީ އިދިކޮޅު މެމްބަރުން މަޖިލިސް ތެރޭގައި ހިންގާ އަމަލުތައް ހުއްޓުވައި ދެއްވުމަށެވެ. އެއާއެކު، އޭނާ އަށް ތާއީދު ކުރައްވައި، އެއީ އިބޫގެ ޒިންމާއެއް ކަމަށް ވިދާޅުވެ ޕީޕީއެމްގެ ލީޑަރު އަހްމަދު ނިހާން ހުސެއިން ވެސް އިބޫ އަށް ދިމާލަށް އަޑުގަދަކުރައްވާ މަންޒަރު ވީޑިއޯއިން ފެނެ އެވެ.

އިބޫގެ ދިފާއުގައި އެމްޑީޕީގެ މެމްބަރުން ވިދާޅުވީ ސިފައިން ލައްވައި މަޖިލީސް ހިސޯރުކޮށްގެން އުޅެނީ އިބޫ ނޫން ކަމަށެވެ. މައްސަލަ ހައްލުވާނީ، މެމްބަރުންގެ އިތުބާރު ގެއްލިފައިވާ މަޖިލީހުގެ ރައީސް މަސީހު މަގާމުން ދުރުކޮށް، ސިފައިން ލައްވައި މަޖިލީސް ހިސޯރުކުރުން ނިމުމަކަށް ގެނައުމުން ކަމަށް ވެސް މެމްބަރުން ވިދާޅުވި އެވެ.

އިދިކޮޅު މެމްބަރުންގެ ހުރަސްއެޅުއްވުންތަކާއި ހަޅޭކުގެ ތެރޭގައި ޖަލްސާ ބާއްވައި، ސްރީ ލަންކާގައި ހުންނަވާ ދިވެހި ސަފީރަކަށް މުހައްމަދު ހުސެއިން ޝަރީފް ހަމަޖެއްސުމަށް ޕީޕީއެމުގެ މެމްބަރުން ވަނީ ރުހުން ދެއްވައިފަ އެވެ. އޭނާ ސަފީރު ކަމަށް އައްޔަންކުރަން ލިބުނީ 28 ވޯޓެވެ.

މި ޖަލްސާއަކީ ވެސް ސައްހަ ޖަލްސާއެއް ނޫން ކަމަށް އިދިކޮޅު މެމްބަރުން ގެންދަވަނީ ވިދާޅުވަމުންނެވެ. އަދި ޖަލްސާގައި ނެގި ވޯޓުގައި އެ މެންބަރުން ބައިވެރިވެވަޑައެއް ނުގަންނަވަ އެވެ.