ޓާޓާ ފްލެޓަށް ހޮވުނު 160 މީހަކު އާ ލޯނު ސްކީމަށް ހުށަހަޅައިފި

އިންޑިއާގެ ޓާޓާ ކުންފުނިން މާލޭގައި އިމާރާތްކުރި ފްލެޓްތަކަށް ހޮވުނު މީހުންގެ ތެރެއިން ލޯނު ހަމަޖެހިފައިނުވާ 160 މީހަކު އެޗްޑީސީ މެދުވެރިކޮށް އާ ލޯނު ސްކީމަށް ފޯމް ހުށަހަޅައިފި އެވެ.

އެމްއެމްއޭ އާއި ބޭންކުތައް ގުޅިގެން ހަމަޖައްސާފައިވާ "ގެދޮރު އަގު ހެޔޮ ކުރުމުގެ ލޯނު ސްކީމް" މެދުވެރިކޮށް ދޫކުރާ ލޯނަށް ޝަރުތު ހަމަވޭތޯ ބެލުމަށް ފޯމް ހުށަހަޅަން އެޗްޑީސީން ދިން ފުރުސަތު ހަމަވީ މިދިޔަ އަންގާރަ ދުވަހު އެވެ. އެ ފޯމުގައި ދީފައިވާ މައުލޫމާތުތަކަށް ބެލުމަށް ފަހު އެ މީހުންނަށް ލޯނު ހަމަޖައްސަން އެންމެ އެކަށީގެންވާ ބޭންކެއް އަންގާ ގޮތަށް އެ ކުންފުނިން ވަނީ ނިންމައިފަ އެވެ.

އެޗްޑީސީގެ އިސް އޮފިޝަލަކު ވިދާޅުވީ ފޯމް ހުށަހަޅަން ދިން މުއްދަތުގެ ތެރޭގައި ފޮނުވި 160 ފޯމްގެ މައުލޫމާތު މިހާރު ސާފު ކުރަމުން އަންނަ ކަމަށެވެ. އޭގެ ތެރެއިން ލޯނަށް ޝަރުތު ހަމަވާ މީހުން ލޯނުގެ ކަންތައް ހަމަޖެއްސުމަށް ފަހު އަންނަ މަހު 15ގެ ކުރިން އަންގަން ޖެހޭ ކަމަށް ވެސް އޭނާ ވިދާޅުވި އެވެ.

"ސީދާ މި ތަނަށް ފޯމް ހުށަހެޅުމުގެ ބަދަލުގައި ބޭންކުތައް މެދުވެރިކޮށް ވެސް ފައިސާ ހަމަޖެއްސޭނެ. އަޅުގަނޑުމެން މިބަލަނީ ވީހާ ވެސް ގިނަ ބަޔަކަށް އެ ފުރުސަތު ހޯދައިދޭން،" އެ އޮފިޝަލް ވިދާޅުވި އެވެ.

އޭނާ ވިދާޅުވީ އަލަށް ހަމަޖެއްސި ލޯނު ޕްރޮގްރާމްގެ ދަށުން މަހަކު ބޭންކުތަކަށް ދައްކަން ޖެހޭ މިންވަރު 9،000ރ. އާއި 12،000ރ. އާ ދެމެދުގެ އަދަދަކަށް ކުޑަވެގެންދާނެ ކަމަށެވެ.

ޓާޓާ ފްލެޓްތަކުގެ ތެރެއިން މިހާތަނަށް ހަވާލުކޮށްފައިވަނީ 53 އެޕާޓްމަންޓެވެ. ބާކީ ހަވާލުނުކޮށް ހުރީ 235 އެޕާޓްމަންޓެވެ. އެ ތަންތަން ހަވާލުނުކުރެވި ވަނީ ދެ މިލިއަން ރުފިޔާގެ ލޯނު ހަމަނުޖެހިގެންނެވެ.

މަރުކަޒީ ބޭންކުން އަލަށް އަމަލުކުރަން ފެށި ގަވާއިދުގެ ދަށުން ޑައުންޕޭމަންޓަށް 20 ޕަސެންޓަށް ވުރެ މަތީ އަދަދެއް ދައްކާ ނަމަ ލޯނުގެ އިންޓަރެސްޓް ރޭޓަކީ ފަސް ޕަސެންޓެވެ. އަދި 10-20 ޕަސެންޓާ ދެމެދުގެ ޑައުންޕޭމަންޓެއް ދައްކާ ނަމަ ލޯނުގެ އިންޓަރެސްޓް ރޭޓަކީ 5.5 ޕަސެންޓެވެ. ޑައުންޕޭމަންޓް 5-10 ޕަސެންޓާ ދެމެދުގައި ނަމަ އިންޓަރެސްޓް ރޭޓަކީ ހަ ޕަސެންޓެވެ.

މިއީ މިހާރު ބޭންކްތަކުން ގެދޮރު ގަންނަން ދޭ ލޯނުގެ 11 ޕަސެންޓްގެ އިންޓަރެސްޓަށް ބަލާއިރު ވަރަށް ބޮޑު ލުޔެކެވެ.

ލޯނު ގޮތުގައި މި ގަވާއިދުގެ ދަށުން ދޫކުރާނީ އެއް މިލިއަން ރުފިޔާ އާއި ދެ މިލިއަން ރުފިޔާ އެވެ. ޓާޓާ ފްލެޓްތައް ވިއްކަނީ ދެ މިލިއަން ރުފިޔާ އަށް ކަމަށް އެޗްޑީސީން ބުންޏެވެ.

ކުރީގެ ސްކީމުގެ ދަށުން 20 ޕަސެންޓްގެ (400،000ރ.) ޑައުންޕޭމަންޓެއް ދައްކައި، 10 އަހަރަށް ލޯނު ބަހާލައިފި ނަމަ ކޮންމެ މަހަކު ދައްކަން ޖެހޭނީ ގާތްގަނޑަކަށް 14،000ރ. އެވެ. އަދި 10 ޕަސެންޓްގެ (200،000ރ.) ޑައުންޕޭމަންޓެއް ދައްކައި، 10 އަހަރަށް ލޯނު ބަހާލައިފި ނަމަ ކޮންމެ މަހަކު ދައްކަން ޖެހޭނީ ގާތްގަނޑަކަށް 16،000ރ. އެވެ. ފަސް ޕަސެންޓްގެ (100،000ރ.) ޑައުންޕޭމަންޓެއް ދައްކައި، 10 އަހަރަށް ލޯނު ބަހާލައިފި ނަމަ ކޮންމެ މަހަކު ދައްކަން ޖެހޭނީ ގާތްގަނޑަކަށް 17،000ރ. އެވެ.

ފްލެޓްތަކަށް ފައިސާ ދެއްކޭނެ ގޮތެއް ނެތިގެން ފްލެޓް ނުލިބޭނެ ކަމަށް ބަލައި، ގިނަ ބަޔަކު އުއްމީދު ކަނޑާލި އެވެ. އޭރު އެޗްޑީސީން ނިންމީ ދެ އިމާރާތުގެ ފްލެޓެއް ދެ މިލިއަން ރުފިޔާ ދައްކާ ބަޔަކަށް ދޫކުރާ ގޮތަށެވެ. ރާއްޖޭގެ ބޭންކްތަކާއި ގެދޮރަށް ލޯނު ދޫކުރާ އެހެން ފަރާތްތަކުން ޑައުންޕޭމަންޓްގެ ގޮތުގައި 20 ޕަސެންޓް ނަގަ އެވެ. އެހެންކަމުން ދެ އިމާރާތުން ފްލެޓް ލިބުނު މީހުން ޑައުންޕޭމަންޓްގެ ގޮތުގައި 400،000ރ. ދައްކަން ޖެހެ އެވެ. އެކަމަކު މިއީ ސޯޝަލް ހައުސިން ސްކީމެއްގެ ދަށުން އިމާރާތްކުރި ފްލެޓްތަކަށް ކުރިމަތިލި ގިނަ ބަޔަކަށް މާލީ ފުދުންތެރިކަން ހުރި ނިސްބަތެއް ނޫނެވެ.

ކުރިން އަރަބިއްޔާ ހުރި ބިމުގައި 90 ފްލެޓް އަދި ގާކޮށީގައި 190 ފްލެޓް ތަރައްގީކޮށްފައިވެ އެވެ. އޭގެ އަގުގެ ގޮތުގައި ސަރުކާރުން ވަނީ، އިންޑިއާގެ ޓާޓާ ކުންފުނީގެ ހިއްސާ އޮންނަ އެޕެކްސް ރިއަލިޓީ އަށް 277 މިލިއަން ރުފިޔާ އެއްފަހަރާ ދައްކައިފަ އެވެ.