ރޮހިންޖާ ކޭމްޕްތަކުގައި ކޮލެރާ ފެތުރިދާނެ: ޑަބްލިއުއެޗްއޯ

ކޮކްސް ބާޒާރު (ސެޕްޓެމްބަރު 25) - މިއަންމާގެ ރޮހިންޖާ މުސްލިމުން އުޅޭ ބަންގްލަދޭޝްގެ ކޭމްޕްތަކުގައި ކޮލެރާ ފެތުރިދާނެ ކަމުގެ އިންޒާރު ދުނިޔޭގެ ސިއްހަތު ޖަމިއްޔާ (ޑަބްލިއެޗްއޯ) އިން ދީފި އެވެ.

މިއަންމާ އިން އެތެރެވި ރެފިއުޖީންނަށް ބަންގްލަދޭޝްގެ ބޯޑަރު ކައިރީ ވަނީ 68 ކޭމްޕް ހަދައިދީފަ އެވެ. މި ތަނުން ސާފު ބޯފެން ނުލިބޭ އިރު ފާޚާނާ ކުރުމުގެ ނިޒާމު ގާއިމްކޮށްފައެއް ނުވެ އެވެ. ޑަބްލިއުއެޗްއޯ އިން ބުނީ ކޭމްޕްތަކުގައި ސާފުތާހިރުކަން ކުޑަ އިރު ބޭހާއި ކާނާ ވެސް ނެތް ކަމަށެވެ.

ރަކީން ސްޓޭޓުން ބަންގްލަދޭޝް އަށް ހިޖުރަކޮށްފައިވާ ރެފިއުޖީންގެ އަދަދު 436،000 އަށް އަރާ ކަމަށް އދ. އިން ވަނީ ބުނެފަ އެވެ.

ޑަބްލިއުއެޗްއޯ އިން ބުނީ ރެފިއުޖީ ކޭމްޕްތަކުގައި މޯބައިލް މެޑިކަލް ސެންޓަރުތަކެއް ގާއިމްކޮށްފައިވާ ކަމަށެވެ. ބަންގްލަދޭޝްގެ ސިއްހީ އޮފިޝަލުން ބުނީ ބޭރަށް ހިންގުން ޖެހިގެން ވޭތުވެދިޔަ މަހެއްހާ ދުވަހު ތެރޭ ރޮހިންޖާ 4،500 މީހުންނަށް ފަރުވާ ދީފައިވާ ކަމަށެވެ. އަދި މީޒަލްސް އާއި ޕޯލިއޯ އަށް 80،000 ކުދިންނަށް ވެކްސިން ދީފައިވާ ކަމަށް ވަނީ ބުނެފަ އެވެ. ބަންގްލަދޭޝްގެ ހެލްތު ޑިޕާޓްމަންޓުން ބުނީ ރޮހިންޖާ ރެފިއުޖީންގެ ތެރޭން 10 މީހުން މަރުވެފައިވާ ކަމަށެވެ. މި އެންމެންނަކީ ވެސް ރަކީން ސްޓޭޓުން އައި އިރު އެ މީހުން ގަޔަށް ވަޒަން އަރާފައިވާ މީހުން ކަމަށް ވެސް ބުނެފައިވެ އެވެ.