މުނާޒް ވިދާލިއިރު ސާއިދު އެއް ވަނަ ހޯދައިފި

ރާއްޖޭގެ އެންމެ ބާރު ދުވުންތެރިއާ ހަސަން ސާއިދާއި އުއްމީދީ ދުވުންތެރިއާ މުހައްމަދު މުނާޒް އަލީގެ ވާދަވެރިކަން ފެނިގެން ދިޔަ އިވެންޓް ކާމިޔާބުކޮށް، ގައުމީ އެތުލެޓިކްސް މުބާރާތުގެ 200 މީޓަރު ދުވުމުން އެއް ވަނަ ސާއިދު ހޯދައިފި އެވެ.

އޭޝިއަން އެތުލެޓިކްސް ޗެމްޕިއަންޝިޕުގެ 100 މީޓަރު ދުވުމުން ހަތަރު ވަނަ ހޯދާފައިވާ ދިވެހި ސިފައިންގެ ކްލަބުގެ ސާއިދު އިއްޔެ ގައުމީ މުބާރާތުގެ 200 މީޓަރު ދުވުމުން އެއް ވަނަ ހޯދީ 23.16 ސިކުންތުން ދުވެގެންނެވެ. މިދިޔަ އަހަރުގެ އިންޓަ ސްކޫލް މުބާރާތުގެ އެއް ވަނަ އެތުލީޓް، އައިލެންޑް ރަނާސް މޯލްޑިވްސްގެ މުނާޒް ދެ ވަނަ އަށް ދިޔައީ 0.79 ސިކުންތުގެ ފަރަގަކުން 23.95 ސިކުންތުން ދުވެގެންނެވެ. މި އިވެންޓުގެ ތިން ވަނަ އަކީ 23.30 ސިކުންތުން ރޭސް ނިންމި ސިފައިންގެ ކްލަބުގެ ހުސެއިން ރިޒާ އެވެ.

މުނާޒް ވަނީ އިއްޔެ 100 މީޓަރު ދުވުމުގައި ވާދަކޮށް ތިން ވަނަ ހޯދައިފަ އެވެ.

އަންހެނުންގެ 200 މީޓަރު ދުވުމުން އެއް ވަނަ މަގާމް ހޯދީ 29.49 ސިކުންތުން ދުވެގެން ޓްރެކް އެންޑް ފީލްޑް އެސޯސިއޭޝަނުގެ މިރުފަތު އަހުމަދެވެ. އެ ޓީމުގެ އަރީން އަލީ ޝަރީފް، 29.63 ސިކުންތުން ދުވެ ދެ ވަނަ ހޯދިއިރު ތިން ވަނަ އަކީ 30.55 ސިކުންތުން ދުވި އައިލެންޑް ރަނާސްގެ އައިޝަތު ޝަބާ އެވެ.

މުބާރާތުގައި ވާދަކުރަމުން އަންނަ ނޭޕާލް ދުވުންތެރިން ވަނީ އިއްޔެ ވެސް ކާމިޔާބީތަކެއް ހޯދައިފަ އެވެ. އެގޮތުން ފިރިހެނުންގެ 800 މީޓަރު ދުވުމުގެ އެއް ވަނަ ހޯދީ އައިލެންޑް ރަނާސް އަށް ދުވަމުން އަންނަ ނޭޕާލުގެ ސޮމް ބަހާދުރް ކުމާ އެވެ. އޭނާ ރޭސް ނިންމީ 1 މިނެޓު 59.01 ސިކުންތުންނެވެ. މި އިވެންޓުގެ ދެ ވަނަ އަކީ ސިފައިންގެ ކްލަބުގެ އަހުމަދު ހަސަނެވެ. އޭނާގެ ޓައިމިން އަކީ 2 މިނެޓު 02.75 ސިކުންތެވެ. ތިން ވަނަ އަށް ދިޔައީ 2 މިނެޓު 04.40 ސިކުންތުން ރޭސް ނިންމި އައިލެންޑް ރަނާސްގެ ހަސަން ފައިހަތު ގުދުރަތުﷲ އެވެ.

ފިރިހެނުންގެ 10،000 މީޓަރު ދުވުން ވެސް ކާމިޔާބުކުރީ އިއްޔެ 5000 މީޓަރުގެ ދުވުން ކާމިޔާބުކުރި ނޭޕާލުގެ ދުވުންތެރިއާ ލާލް ބަހާދުރް ތާޕާ އެވެ. އޭނާ 33 މިނެޓު 48.60 ސިކުންތުން ދުވިއިރު ދެ ވަނަ އަށް ދިޔަ ޒައިދު ޝަރީފް ރޭސް ނިންމީ 35 މިނެޓު 01.70 ސިކުންތުންނެވެ. ތިން ވަނަ އަކީ ހުސެއިން ފަޒީލް ހާރޫނެވެ. އޭނާގެ ޓައިމިން އަކީ 36 މިނެޓު 28.19 ސިކުންތެވެ.