ހިލްޓަން އިން ދައުވާކުރުމުން ސިންގަޕޫރު ސުޕްރީމް ކޯޓަށް ސަން ޓްރެވަލްސް ހާޒިރުކޮށްފި

ނ. އިރުފުށި ރިސޯޓް ހިންގަން ހިލްޓަން އިންޓަނޭޝަނަލާ އެކު ހެދި އެއްބަސްވުން ސަން ޓްރެވަލްސް އެންޑް ޓުއާސް އިން އުވާލި މައްސަލާގައި ހިލްޓަނަށް 26 މިލިއަން ޑޮލަރު ދޭން ސިންގަޕޫރު އާބިޓްރޭޝަނުން ކޮށްފައިވާ އަމުރު ރާއްޖޭގައި ތަންފީޒު ނުކުރެވި އެންމެފަހުން ސިންގަޕޫރުގެ ސުޕްރީމް ކޯޓަށް މައްސަލަ ހުށަހަޅައި އަޑުއެހުންތައް ފަށައިފި އެވެ.

މި މައްސަލައިގެ ފުރަތަމަ އަޑުއެހުން ސިންގަޕޫރު ސުޕްރީމް ކޯޓުގައި މިއަދު ވަނީ ކުރިއަށް ގެންގޮސްފަ އެވެ. ސިންގަޕޫރު ގަޑިން މެންދުރު ފަހު 2:30 ގައި ބޭއްވި އަޑުއެހުމާ ގުޅޭ ތަފްސީލެއް އަދި ނުލިބެ އެވެ.

ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަދި ވެރިކަން ކުރާ ޕާޓީ، ޕީޕީއެމް ކޯލިޝަން ޕާޓްނަރު އެމްޑީއޭގެ ލީޑަރު އަހުމަދު ސިޔާމް މުހައްމަދުގެ ސަން ޓްރެވަލްސް އިން 2013 ވަނަ އަހަރު އެއްބަސްވުން އުވާލުމުން، އެ އެއްބަސްވުމުގައިވާ ގޮތުގެ މަތިން ހިލްޓަން އިން އެ މައްސަލަ ހުށަހެޅީ ސިންގަޕޫރުގެ އާބިޓްރޭޝަނަށެވެ. ހިލްޓަނަށް 26 މިލިއަން ޑޮލަރު ބަދަލުގައި ދޭންޖެހޭނެ ކަމަށް އާބިޓްރޭޝަނުން ނިންމުމުން އެކަން ތަންފީޒުކުރަން ސިވިލް ކޯޓަށް ހުށަހެޅި އެވެ. ނަމަވެސް ސިވިލް ކޯޓުން ނޮވެމްބަރު 29، 2016 ގައި ނިންމީ އާބިޓްރޭޝަންގެ ނިންމުންތައް ތަންފީޒުކުރާނީ ހައި ކޯޓުން ކަމަށެވެ.

އެކަމަކު މިދިޔަ އޭޕްރީލް މަހު 20 ގައި ހައި ކޯޓުން ނިންމީ އެއީ ސިވިލް ކޯޓުން ތަންފީޒުކުރަންޖެހޭ މައްސަލައެއް ކަމަށެވެ.

ދުނިޔޭގެ އެންމެ ބޮޑު އެއް ހޮޓެލް ޗެއިން ކަމަށްވާ ހިލްޓަން އާއި ސަން ޓްރެވަލްސްއާ ދެމެދު ވެފައިވާ އެއްބަސްވުމުގައި އޮންނަނީ މައްސަލައެއް ދިމާވެ ހައްލު ނުހޯދިއްޖެ ނަމަ އެކަން ހުށަހަޅާނީ ސިންގަޕޫރުގެ އާބިޓްރޭޝަނަށް ކަމަށާއި އެތަނުގެ ނިންމުމަށް ދެ ފަރާތުން ވެސް އިހްތިރާމް ކުރާނެ ކަމަށެވެ. ނަމަވެސް ސިންގަޕޫރު އާބިޓްރޭޝަންގެ ނިންމުން ރާއްޖޭގައި ތަންފީޒު ނުކުރެވި އޮއްވައި ސަން ޓްރެވަލްސް އިން ހިލްޓަންއާ ދެކޮޅަށް ސިވިލް ކޯޓަށް ހުށަހެޅި މައްސަލައެއްގައި ސަން ޓްރެވަލްސް އަށް 16 މިލިއަން ޑޮލަރު ދައްކަން ހިލްޓަންގެ މައްޗަށް ވަނީ ހުކުމް ކޮށްފަ އެވެ. އެއީ އިރުފުށި ހިންގުމުގެ އެއްބަސްވުމުގައި މަކަރާއި ހީލަތުން ސޮއިކުރުވި ކަމަށް ބުނެ އެވެ.

އެއްބަސްވުމާ އެއްގޮތަށް، އާބިޓްރޭޝަނުން ގޮތެއް ނިންމާފައި ވަނިކޮށް ހިލްޓަންގެ މައްޗަށް އެ މައްސަލާގައި ދައުވާ ނުކުރެވޭނެ ކަމަށް ބުނެ ހިލްޓަން އިން ވަނީ ރާއްޖޭގެ ހައި ކޯޓުގައި މައްސަލަ އިސްތިއުނާފު ވެސް ކޮށްފަ އެވެ.

ހިލްޓަނަށް ދިމާވި މައްސަލާގައި ރާއްޖެއިން ހައްލެއް ނުލިބި އަހަރުތަކެއް ވެގެން ގޮސްފައި ވާއިރު އެ މައްސަލާގައި ހިލްޓަން އިން ސަރުކާރަށް ސިޓީ ވެސް ފޮނުވާފައިވެ އެވެ.

ސިންގަޕޫރުގެ އާބިޓްރޭޝަންގެ ނިންމުމަށް އިންޓަނޭޝަނަލް ޗެމްބާ އޮފް ކޮމާސް (އައިސީސީ) ގެ އިންޓަނޭޝަނަލް ކޯޓް އޮފް އާބިޓްރޭޝަނުން ވެސް ތާއީދުކޮށްފައި ވާއިރު ވެސް އެކަމުގައި ސަން ޓްރެވަލްސް އިން އަމަލުކުރާ ގޮތުން ރާއްޖޭގެ ޓޫރިޒަމް އިންޑަސްޓްރީ އަށް ބޮޑު ގެއްލުމެއް ވެދާނެ ކަމަށް ހިލްޓަން އިން 2015 ވަނަ އަހަރު، އޭރުގެ ނައިބު ރައީސް އަހްމަދު އަދީބަށް ފޮނުވި ސިޓީއެއްގައި ބުނެފައިވެ އެވެ.