ކުޅުދުއްފުށީގެ މަގު ހެދުމުގެ މަޝްރޫއު ހުއްޓިފައި

ހދ. ކުޅުދުއްފުށީ މަގު ހެދުމުގެ މަސައްކަތް ފެށުމަށް ފަހު ހުއްޓާލާފައި އޮންނަތާ ދެ ހަފްތާއަށް ވުރެ ގިނަ ދުވަސް ވެއްޖެ ކަމަށް ރަށު ކައުންސިލުން މިއަދު ބުނެފި އެވެ.

ގާތްގަނޑަކަށް 10،000 މީހުންގެ އާބާދީއެއް އޮންނަ ކުޅުދުއްފުށީ މަގު ހެދުމުގެ މަޝްރޫއު އެމްއާރްޑީސީއާ ހަވާލުކޮށްފައިވާއިރު ސަބް ކޮންޓްރެކްޓަރެއްގެ ގޮތުގައި އެމަސައްކަތް ކުރިއަށް ގެންދިޔައީ ސްރީ ލަންކާގެ ޝިއަރާ ކުންފުނިންނެވެ.

ކުޅުދުއްފުށީގެ ފަސް މަގެއް ތާރު އަޅައި މިހާރު ވަނީ ނިންމައިފަ އެވެ. މަސައްކަތް ހުއްޓާލި އިރު 12 މަގެއް އޮތީ ނުނިމި އެވެ. އޭގެ ތެރެއިން ބައެއް މަގުތަކުގެ މެދާ ހިސާބަށް ވެސް ތާރު އަޅާފައިވެ އެވެ.

ކުޅުދުއްފުށީ ކައުންސިލްގެ ރައީސް އަބްދުލް ލަތީފް ހަސަން "މިހާރު" އަށް ވިދާޅުވީ މަގު ހެދުމުގެ މަސައްކަތް ހުއްޓުނު ސަބަބެއް ކައުންސިލަށް ވެސް އެނގިފައި ނުވާ ކަމަށެވެ.

"މަގު ހެދުން ހުއްޓުނު ސަބަބު ހޯދަން ސަރުކާރަށް ހުށައަޅާފައިވާނެ. އަދި ޖަވާބެއް ނުލިބޭ. އެހެންވެ މަސައްކަތް ހުއްޓުނު ސަބަބެއް ނޭނގޭ،" ލަތީފް ވިދާޅުވި އެވެ.

މި މައްސަލާގައި އެމްއާރުޑީސީން ވަކި އެއްޗެކޭ ނުބުނެ އެވެ.

ކުޅުދުއްފުށީ މަގުތަކުގެ ދުވާރު މާ ބޮޑުކޮށް ހަދާތީ ރައްޔިތުންގެ މެދުގައި ހިޔާލުތަފާތުވުންތަކެއް ވެސް ވަނީ އުފެދިފަ އެވެ.