"ގައުމީ ކަމެއް، އެތައް ބައެއްގެ ފުރާނަ ސަލާމަތް ވާނެ"

އެއީ މިދިޔަ ހަފުތާގެ ކުރީކޮޅެވެ. އެ ރޭ ވެސް އޭނާ ހޮސްޕިޓަލަށް ދިޔައީ އަންހެނުން ގޮވައިގެން ޑަޔަލިސިސް ހަދާށެވެ. އަންހެނުން ބޭއްވުމަށް ފަހު، އާދައިގެ މަތިން މަޑު ހިނގުމެއްގައި އަމީނީމަގުން ގެއާ ދިމާ އަށް ދަނިކޮށް މެ އަށް އެރީ ކުއްލި ތަދެކެވެ. ނޭވާ ހާސްވާން ފެށުމުން ދަރިއަކަށް ގުޅައި ބަލާ އަންނަން ވެސް އޭނާ އެދުނެވެ. އެކަމަކު، ފަހުން މާ ބޮޑު ކަމެއް ނުވުމުން، އެއީ ވައިގެ ސަބަބުން ވީ ކަމެއް ކަމަށް ނިންމައި ހިނގާލާފައި ގެ އަށް ދިޔައީ އެވެ.

އޭގެ ތިން ދުވަސް ފަހެވެ. ތަރާވީހުން ނިމިގެން ގެ އަށް ވަން ތަނާ އަނެއްކާވެސް އެއްކަހަލަހެން މެ އަށް އެރީ ކުއްލި ތަދެކެވެ. ސިފައިން ގޭގައި އުޅޭ އޭނާގެ ދަރިއަކު ކައިރި ބުނުމުން އޭނާ ގެންދިޔައީ އަސްކަރީ ހޮސްޕިޓަލް، ސެނަހިޔާ އަށެވެ. އެ ތަނުން ބުނީ ލޭ މަތި ކަމަށެވެ. ވަޔަށް ވެސް ބޭހެއް ދިނެވެ. އެ ބޭސް ކައިގެން ވެސް މޭގައި ރިއްސުމަކަށް އެއްވެސް ލުުޔެއް ނުލިބުނެވެ. އެހެންވެ، އަންހެނުން ބުނި ބުނުމަކަށް އޭގެ އަނެއް ރޭ އައިޖީއެމްއެޗަށް ގޮސް އިމަޖެންސީ އަށް ދެއްކީ އެވެ.

"ޓެސްޓެއް ހަދާފައި ދަރިން ކައިރި ވެސް ބުނެފި ބައްޕަ ގެ އަށް ފޮނުވޭކަށް ނެތޭ. އަދި އިތުރު ޓެސްޓުތަކެއް ހަދަން ޖެހެއޭ. ހިތުގެ ޓެސްޓެކޭ، އެ އަށް ހަތަރު ގަޑިއިރު ވާނެއޭ،" މިދިޔަ ހަފުތާގެ ކުރީކޮޅު މެ އަށް ވާން ފެށި ތަދަކާ އެކު އޮޕަރޭޝަން ކުރަން ޖެހުނު ގޮތް ކިޔައި ދެމުން މުހައްމަދު އަބްދުއްރަހީމް، 59، ބުންޏެވެ.

އެ ޓެސްޓަށް ފަހު އޭނާ ކައިރި ޑޮކްޓަރުން ބުނީ ބިރުވެރި ވާހަކައެކެވެ. ހިތާ ގުޅިފައިވާ ލޭ ހޮޅިއެއްގައި ސަރުބީ ޖަހައި އެއްކޮށް ބެދެން ކައިރި ވެފައިވާ ކަމުގެ އިންޒާރެވެ. މެ އަށް ތަދު ވާ ސަބަބަކީ އެއީ އެވެ. އޮޕަރޭޝަނެއް ކުރަން ޖެހޭ ވާހަކަ ވެސް ބުންޏެވެ. އެކަމަކު، ދެން ބުނީ އެ އަށް ވުރެ ވެސް ހައިރާން ކުރުވަނިވި ވާހަކައެކެވެ؛ މިއީ ރާއްޖޭގައި މި އޮޕަރޭޝަން ކުރާ ފުރަތަމަ ފަހަރެވެ.

އައިޖީއެމްއެޗުގައި އަލަށް ގާއިމްކޮށްފައިވާ ހިތުގެ ބަލިތަކާ ބެހޭ ޚާއްސަ ސެންޓަރުގައި އެ އޮޕަރޭޝަން ކުރަނީ އަލަށް ނަމަވެސް އޭނާގެ ފަރުވާލެއް ނެތެވެ. އައިޖީއެމްއެޗުގެ ވަސީލަތްތަކަށާއި ހާއްސަކޮށް ދިވެހި ޑޮކްޓަރުންނަށް އިތުބާރު ވެސް އޮތެވެ.

"މަރު ވާނީ އެއްފަހަރު ނޫންތޯ؟ އަނެއްކާ މި ބޭފުޅުން ވަރަށް ރަނގަޅު. ހިއެއް ނުވޭ ކަމެއް ކުރި ހެންނެއް ވެސް. މެ އަށް ފާޑެއްގެ ފިންޏެއް ވާހެން އެކަނި ހީވަނީ،" ގަޑިއެއް ހާއިރުގެ އޮޕަރޭޝަނާ ބެހޭ ގޮތުން މުހައްމަދު ބުންޏެވެ.

ރާއްޖޭގައި އެންޖިއޯގްރާމާއި އެންޖިއޯޕްލާސްޓީގެ ހިދުމަތް މިދިޔަ ހުކުރު ދުވަހު ފެށިއިރު، އެންމެ ފުރަތަމަ އެ އޮޕަރޭޝަން ކުރި ހަތަރު މީހުންގެ ތެރޭގައި މުހައްމަދު ހިމެނެ އެވެ. އޮޕަރޭޝަން ތިއޭޓަރުގައި ފުރަތަމަ އެނދުގައި އޮތީ އޭނާ އެވެ. ޑޮކްޓަރު ކައިރި ވަރަށް ގަދަ އަށް ކިޔައިގެން ދެ ވަނަ އަށް އޮޕަރޭޝަން ކުރަން ވެއްދި މީހާ އަށް މުހައްމަދު ވި އެވެ. އެއީ، އޭނާ ސިފަކުރި ގޮތުގައި، ލިބުނު ވަރަށް ބޮޑު ޝަރަފެކެވެ.

ހޮސްޕިޓަލުގައި އޮންނަން ޖެހުމުން އެ ލިބޭ ހާސް ކަމަށް ވުރެ ބޮޑަށް މުހައްމަދު ހުރީ އުފަލުންނެވެ. ދެ ދުވަސް ފަހުން އިއްޔެ އޭނާ ހޮސްޕިޓަލުން ދޫކޮށްލިއިރު، އޭނާ އަށް ކުރެވެނީ ހިތްހަމަޖެހުމުގެ އިހުސާސެވެ. އޮޕަރޭޝަން އެހާ ކާމިޔާބުކަމާ އެކު ކުރިއަށް ދިޔައިމަ އެވެ. އަމިއްލަ ގައުމުގައި، އޭނާގެ އަށް ފިރިހެން ކުދިންނާއި އަށް އަންހެން ދަރިންގެ އަޅާލުމާއި ލޯބި ލިބޭ ހިސާބުގައި، ހުރެގެން އެ ވަރުގެ ބޮޑު ކަމެއް ކުރެވުމުންނެވެ.

އެންޖިއޯޕްލާސްޓީގެ އިތުރުން އެންޖިއޯގްރާމްގެ ހިދުމަތް ވެސް އައިޖީއެމްއެޗުން ވަނީ ފުރަތަމަ ފަހަރަށް ފަށާފަ އެވެ. އެ ހޮސްޕިޓަލުން ބުނި ގޮތުގައި 24 ގަޑިއިރު ހިތުގެ ބަލިތަކަށް ފަރުވާ ދޭއިރު، ހުކުރު ދުވަސް ފިޔަވާ އެހެން ކޮންމެ ދުވަހަކު އޯޕީޑީން އެޕޮއިންޓްމަންޓް ހެދޭނެ އެވެ. އައިޖީއެމްއެޗުން ބުނެފައިވާ ގޮތުގައި އެ ހޮސްޕިޓަލުން މަސައްކަތް ކުރަނީ ހިތުގެ ހުރިހާ ބަލިތަކަށް ކުރިއަށް އޮތް ދެ އަހަރެއްހާ ދުވަހުގެ ތެރޭގައި ފަރުވާ ދޭން ފެށުމަށް ކަމަށެވެ.

މި ހުރިހާ ކަމަކާ އެކު، މުހައްމަދު ފަދަ އާ މި ހިދުމަތްތަކުގެ ފައިދާކޮށްފައިވާ ބަލިމީހުން ދެކެނީ މިއީ ގައުމީ ކަމެއްގެ ގޮތުގަ އެވެ؛ "ލާރި އަށް ވުރެ ބޮޑަށް ކިހާ ގިނަ ބަޔަކަށް، ކިހާ ބޮޑު ފައިދާއެއް، ކިހާ ބޮޑު ފަސޭހައެއް މިއީ. އެތައް ބައެއްގެ ފުރާނަ ވެސް ސަލާމަތް ވާނެ."