ޓީޗަރުންނަށް ހާއްސަ އޮންލައިން ޕްލެޓްފޯމެއް ތައާރަފުކޮށްފި

ރަށުގައި ހުރެގެން ޓީޗަރުން މަތީ ތައުލީމް ހާސިލްކުރާނެ ހާއްސަ އީ-ލާނިން ޕްލެޓްފޯމެއް މިއަދު ލޯންޗުކޮށްފި އެވެ.

ނޭޝަނަލް އިންސްޓިޓިއުޓު އޮފް އެޑިއުކޭޝަން (އެންއީއައި) އަދި ޔުނިސެފް ގުޅިގެން އުފެއްދި "އެޑިއުދާލް" ޕްލެޓްފޯމް ލޯންޗުކޮށްދެއްވީ އެޑިއުކޭޝަން މިނިސްޓަރު ޑރ. އާއިޝަތު ޝިހާމެވެ.

މި ޕްލެޓްފޯމް ލޯންޗު ކޮށްދެއްވުމަށް ފަހު ވާހަކަދައްކަވަމުން މިނިސްޓަރު ޑރ. އާއިޝަތު ޝިހާމް ވިދާޅުވީ 2015 ވަނަ އަހަރު އަލަށް ތަންފީޒުކުރަން ފެށި ގައުމީ މަންހަޖުގެ ދަށުން، ދަރިވަރުންގެ ކިބައިގައި އަށަގަންނުވަންޖެހޭ ސިފަތަކާއި ގާބިލިއްޔަތުތައް އަށަގެންނެވުމަށް ޓީޗަރުންނަށް އިތުރު ތަމްރީނުތަކެއް ދޭންޖެހޭ ކަމަށެވެ. އެހެންކަމުން އަލަށް ތައާރަފުކުރި ޕްލެޓްފޯމުގެ ސަބަބުން ރަށުގައި ހުރެގެން ތަމްރީނުތަކާއި އެކި ކޯސްތައް ހިންގުމަށް ފަސޭހަވަގެންދާނެ ކަމަށް މިނިސްޓަރު ވިދާޅުވި އެވެ.

ކިޔަވައިދިނުމުގެ ވައްޓަފާޅި ބަދަލުކޮށް ސްކޫލު ބޭރުން ދަރިވަރުންނަށް ލިބެން ހުރި ޒަމާނީ ވަސީލަތްތަކަށް އަހުލުވެރިކުރުވަން ޖެހޭ ކަމަށް ގަބޫލު ކުރައްވާ ކަމަށް ވެސް މިނިސްޓަރު ވިދާޅުވި އެވެ.

"މި ދެންނެވި ކަންތައްތަކުގެ މައްޗަށް ރިއާޔަތްކޮށް، މުޅި ރާއްޖޭގެ 20 އަތޮޅު ޓެލެކޮންފަރެންސިން ވިއުގައަކުން ގުޅާލައި، ކިޔަވައިދިނުމާއި ތަމްރީނު ހިންގުމުގައި މި ދެންނެވި ވަސީލަތް ބޭނުން ކުރަން ފެށުނު. މީގެ ނަތީޖާއަކަށް ވީ ތަމްރީނު ހިންގުމުގައި ކުރެވޭ ހަރަދު 78 ޕަސެންޓަށް ކުޑަވުން،" ސްޓެލްކޯގައި ބޭއްވި ރަސްމިއްޔާތުގައި މިނިސްޓަރު ވިދާޅުވި އެވެ.

އީ ލާނިންގެ ފުރުސަތުތަކުގެ ސަބަބުން ދުނިޔޭގައި ތައުލީމުގެ ފުރުސަތުތަކަށް ވަރަށް ބޮޑު ހަމަހަމަ ކަމެއް ގެނެސްފައިވާ ކަމަށް ވެސް ވިދާޅުވި އެވެ. އަދި ރާއްޖޭގެ އާބާދީގެ ބޮޑު ބައެއް އިންޓަނެޓް ބޭނުންކުރާއިރު، ތައުލީމް ފޯރުކޮށްދިނުމަށްޓަކައި އީ ލާނިން އަކީ ރާއްޖެއާ ވަރަށް ބޭނުންތެރި މީޑިއަމެއް ކަން މިނިސްޓަރު ފާހަގަކުރެއްވި އެވެ.

ތައުލީމީ ދާއިރާއަށް ޒަމާނީ އިންގިލާބުތަކެއް ގެނައުމުގެ މަސައްކަތް ކުރަމުން އަންނައިރު އަންނަ އަހަރުން ފެށިގެން ރާއްޖޭގެ ހުރިހާ ސްކޫލެއް ޑިޖިޓަލައިޒް ކުރަން ސަރުކާރުން ވަނީ ނިންމައިފަ އެވެ.