ހުކުރު މިސްކިތު ޕާކްގައި ހަދަން އުޅުނީ ލައިބްރަރީއަކާއި ކެފޭއެއް

މާލޭގެ ހުކުރު މިސްކިތުގައި އޮންނަ ޕާކްގައި ހަދަން އުޅުނީ އެންމެންނަށް ހުޅުވާލާފައިވާ ލައިބްރަރީއަކާއި ކެފޭއެއް ކަމަށް ހައުސިން މިނިސްޓްރީން ބުނެފި އެވެ.

ގިނަ ބައެއްގެ ފާޑުކިޔުން އަމާޒުވި އެކަންތައް މިހާރު އޮތީ ދިރާސާތަކެއް ހެދުމަށް ކަމަށް ބުނެ މެދުކަނޑާލައިފަ އެވެ.

ހައުސިން މިނިސްޓްރީގެ އެގްޒެކްޓިވް ކޯޑިނޭޓަރު ހަސަން ވަހީދު މިއަދު ވިދާޅުވީ އެ މިނިސްޓްރީން ކުރިން ނިންމާފައިއޮތީ އެ ސަރަހައްދުގައި ދެ ބުރީގެ އިމާރާތެއް އެޅުމަށް ކަމަށެވެ. އޭގެ ތެރެއިން ތިރީ ބުރީގައި ލައިބްރަރީއެއް ހެދުމަށް ނިންމާފައިވާއިރު މަތީ ބުރީގައި ހަދަން ނިންމާފައިވަނީ ތައްޔާރީ ކާނާ ވިއްކާ ތަނެއް ކަމަށް އޭނާ ވިދާޅުވި އެވެ.

ހައުސިން އިން މިހާރު ބާތިލްކޮށްފައިވާ އިއުލާންގައި، އެ ސަރަހައްދުގައި ހަ ސްޓަޑީ ކިއޮސްކާއި ފުޑް އައުޓްލެޓެއް ހަދަން ވެސް ހުޅުވާލައިފައި ވެ އެވެ.

ހަސަން ވިދާޅުވީ އެ މަސައްކަތް ކުރަން ނިންމީ ހެރިޓޭޖް ޑިޕާޓްމަންޓާ ވެސް މަޝްވަރާކޮށްފައި ތާރީހީ އެއްވެސް އެއްޗަކަށް ގެއްލުން ނުވާނެ ގޮތަށް ކަމަށެވެ.

ނަމަވެސް ހެރިޓޭޖް ޑިޕާޓްމަންޓުގެ މީޑިއާ އޮފިޝަލް ހަސަން މުހައްމަދު ވިދާޅުވީ އެ ބޭފުޅުންގެ ކަންބޮޑުވުންތަކެއް ހުރުމުގެ ސަބަބުން ހައުސިން އާ މަޝްވަރާ ކުރުމަށް ނިންމާފައިވާ ކަމަށެވެ.

ހުކުރު މިސްކިތަކީ ދުނިޔޭގެ ތަރިކައިގެ ވަގުތީ ލިސްޓުގައި ހިމެނޭ ތަނަކަށް ވާއިރު އެ ތަނުގައި ކެފޭއެއް ހަދައިފި ނަމަ އެތަން އެ ލިސްޓުން އުނިވާނެ ކަމަށް ވެސް އެ ދާއިރާގެ ތަޖުރިބާކާރުން ވަނީ ބުނެފަ އެވެ.

ޔުނެސްކޯއިން މިހާރު ލަފާދީފައި ވަނީ ހުކުރު މިސްކިތް ވަށައިގެން ބޮޑު ހުސް ޖާގައެއް ބޭއްވުމުގެ ފުރުސަތު ކުޑަވުމުން އެ ސަރަހައްދުގައި ތަރައްގީގެ މަޝްރޫތައް ނުހިންގުމަށެވެ.