ހުކުރު މިސްކިތް ސަރަހައްދުގައި ކެފޭ އެޅުމަކީ ހެޔޮވާނެ ކަމެއް ނޫން: މައުމޫން

މާލޭ ހުކުރު މިސްކިތް ހިމެނޭ ސަރަހައްދުގައި ކެފޭއެއް އެޅުމަކީ ދީނީ ގޮތުންނާއި ތާރީހީ ގޮތުން ހެޔޮވާނެ ކަމެއް ނޫން ކަމަށް ކުރީގެ ރައީސް މައުމޫން އަބްދުލްގައްޔޫމް މިރޭ ވިދާޅުވެއްޖެ އެވެ.

ހުކުރު މިސްކިތް ހިމެނޭ ސަރަހައްދުން ބައެއް، ބަގީޗާއެއްގެ ގޮތުގައި ތަރައްގީކޮށް އެތަނުގައި ކެފެޓޭރިއާއެއް ހަދަން ހައުސިން މިނިސްޓްރީން ވަނީ ނިންމައިފަ އެވެ.

މި ނިންމުމާ މެދު ނުރުހުންފާޅުކުރައްވައި، މައުމޫން ކުރެއްވި ޓުވީޓެއްގައި ވިދާޅުވީ އެފަދަ ސަރަހައްދުތަކަކީ އަގުހުރި، ދީނީ އަދި އާސާރީ ތަރިކަތަކެއް ކަމަށެވެ. އެހެންވެ، އެފަދަ ތަންތަން ސަލާމަތް ކުރުމަކީ ގައުމީ ވާޖިބެއް ކަމަށް އެމަނިކުފާނު ވިދާޅުވި އެވެ.

މާލޭ ހުކުރު މިސްކިތް ހިމެނޭ ސަރަހައްދުން ބައެއް ތަރައްގީކުރާނީ އެ ސަރަހައްދުގައި ހުރި އާސާރީ އެއްވެސް އެއްޗަކަށް ގެއްލުން ނުލިބޭ ގޮތަށް ކަމަށް ހައުސިން މިނިސްޓްރީން ވަނީ ބުނެފަ އެވެ. އެ މަސައްކަތް ކުރާނެ ބަޔަކު ހޯދަން ވެސް މިހާރު ވަނީ އިއުލާންކޮށްފަ އެވެ.

މިއީ، ސަރުކާރުން ރާއްޖޭގެ ތާރީހީ ބިނާތަކާއި ތާރީހީ ތަންތަން ނައްތާލަން ކުރާ މަސައްކަތުގެ ތެރޭގައި ހިމެނޭ ކަމެއް ކަމަށް ބުނެ، ތާރީހަށް ލޯބިކުރާ ފަރާތްތަކުން ދަނީ ސޯޝަލް މީޑިއާގައި ކަންބޮޑުވުން ފާޅުކުރަމުންނެވެ.

އެނގިފައިވާ ގޮތުގައި، ތަރައްގީ ކުރަނީ މުލިއާގޭ ކުރިމަތީގައި ކުރިން ވެސް ބަގީޗާއެއްގެ ގޮތުގައި އޮތް ސަރަހައްދެވެ. މާލޭގައި މިހާރު ހުރި އެންމެ ތާރީހީ ބިނާތަކުގެ ތެރޭގައި މާލޭ ހުކުރު މިސްކިތް ހިމެނެ އެވެ. އެއީ ރާއްޖޭގެ ތާރީހު ރަމްޒުކޮށްދޭ ބިނާއެކެވެ. ރާއްޖޭގެ ފަންނުވެރިންގެ ކަވި މަސައްކަތްތައް ދައްކުވައިދޭ ތަނެކެވެ. ރާއްޖޭގެ އެކި ރަށްރަށުން ހިރިގާ ނަގައިގެން މާލެ ގެނެސް، ހުކުރު މިސްކިތް ބިނާ ކުރަން ފެށީ 1066ހ. ގަ އެވެ. އެއީ މީގެ 372 އަހަރު ކުރި އެވެ.