އައިޔޫއެމް އިން 14 ބުރީގެ ޓަވަރު އަޅާނެ ބަޔަކު ހޯދަނީ

ހުޅުމާލޭގެ ދެ ވަނަ ފިޔަވަހީގައި ހިއްކާފައިވާ ސަރަހައްދުގައި 14 ބުރީގެ ޓަވަރެއް އަޅައިދޭނެ ބަޔަކު ހޯދަން އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް) އިން މިއަދު އިއުލާނުކޮށްފި އެވެ.

އެ ޔުނިވާސިޓީން ކުރި އިއުލާނުގައި ބުނީ މަސައްކަތް ކުރާ ކުންފުނިން އަމިއްލަ އަށް ހަރަދުކޮށްގެން ޓަވަަރު އަޅަން ޝައުގުވެރިިވާ ފަރާތްތަކުން އަންނަ ހަފުތާގެ ބުދަ ދުވަހުގެ ކުރިން ބީލަން ހުށަހަޅަން ފުރުސަތު ދީފަ އެވެ.

އައިޔޫއެމް އިން އަޅާ ޓަވަރުގެ ބޮޑުމިނަކީ 14،343.11 އަކަފޫޓެވެ. އަދި އެ ޓަވަރު އަޅާ ބިމުގެ ބޮޑުމިނަކީ 19،369 އަކަފޫޓެވެ.

ހުޅުމާލޭގެ ދެ ވަނަ ފިޔަވަހީގައި 240 ހެކްޓަރުގެ ބިން ހިއްކާފައިވާ އިރު، އެ ތަނުގައި 15،000 ފްލެޓު އަޅަން ސަރުކާރުން ވަނީ ނިންމައިފަ އެވެ. އަދި "ހިޔާ" މަޝްރޫއުގެ ދަށުން އަޅާ ހައުސިން ޔުނިޓްތައް 2019ގެ ތެރޭގައި ނިމެނޭ ކަމުގެ ޔަގީންކަން ރައީސް އަބްދުﷲ ޔާމީން ވަނީ ދެއްވައިފަ އެވެ.

އަށްޑިހަ ހާސް މީހުންގެ އާބާދީއަކަށް އަމާޒުކޮށްގެން 25 ބުރީގެ 62 ޓަވަރު އަޅަން ސަރުކާރުން ވަނީ ނިންމައިފަ އެވެ. އޭގެ ތެރެއިން ބައެއް ޓަވަރުތައް ހަދަން ސަރުކާރުގެ ބައެއް ކުންފުނިތަކާ ހަވާލުކުރުމުން، އެ ކުންފުނިތަކުން އަންނަނީ އެކަން ކުރާނެ ބަޔަކު ހޯދަން އިއުލާނު ކުރަމުންނެވެ.